Yudansa pa Trahadó di Hospital Ku Ta Lucha ku Strès

Bryn, di Nort Carolina (Merka), ta forma parti di un di e Komiténan di Kontakto ku Hospital ku tin den e área ei. E komiténan ei ta kolaborá estrechamente ku hospital pa atendé nesesidat di pashènt ku ta Testigu di Yehova.

Debí na e pandemia di COVID-19, hopi hospital no tabata permití nan pashèntnan haña bishita. Bryn a bèl e direktor di e departamento di kuido pastoral i spiritual di un hospital lokal pa sa kon lo e por duna sosten na e pashèntnan ku ta Testigu di Yehova.

Nan a pasa Bryn su yamada pa e asistente di e direktor. Komo ku no tabatin mag di bishitá pashènt, Bryn a puntra si nan por duna e pashèntnan ku ta Testigu di Yehova su number di telefòn pa asina e por papia ku nan. E asistente a bai di akuerdo pa hasi esei.

Anto Bryn a papia ku e asistente tokante e personal di hospital. Bryn a bis’é ku e ta apresiá mashá tur e trabounan ku nan ta hasi i ku e ta spera ku nan ta bon di salú. El a bisa e asistente ku el a lesa un kaminda ku hopi hende, foral esnan ku ta traha na hospital, ta bou di strès pa motibu di e pandemia.

E asistente a konfirmá ku COVID-19 a kousa hopi strès na hospital.

E ora ei, Bryn a bisa: “Nos website tin informashon ku por yuda hende trata ku strès. Si bo bai na jw.org i bo taip ‘strès’ den e hòki Buska, lo bo haña algun artíkulo ku por animá e trahadónan di hospital.”

Miéntras nan tabata papia, e asistente a bai na e website, taip e palabra “strès” den e hòki Buska, i el a mira e artíkulonan ku tabatin. E di: “Tremendo! Mi ta bai mustra e direktor. Esaki lo por yuda e hendenan ku ta traha na hospital i tambe otro hende. Mi ta bai prent algun di e artíkulonan akí i parti nan.”

Un par di siman despues, Bryn a papia ku e direktor, kende a konfirmá ku nan a subi e website i prent vários artíkulo tokante strès i otro tema relashoná ku esei. Nan a duna e artíkulonan ei na bruder i zùster i tambe na otro trahadó di hospital.

Bryn a bisa: “E direktor a yama mi masha danki pa nos trabou i pa e artíkulonan asina bon skirbí. El a bisa ku el a haña nan masha práktiko.”