Kiko Mi Por Hasi Si Ta Bayendo Malu ku Mi na Skol?

“Mi sa mira vários mucha sintá den klas, sin nan bukinan di skol i ku headphone bistí ta skucha muzik miéntras ku e maestro ta papiando. I e muchanan akí ta puntra nan mes dikon ta bayendo malu ku nan na skol! Anto tambe tin mucha manera ami ku ta hasi tur nan esfuerso pa siña, pero tòg ta haña mal sifra na skol. Mi no sa ta dikon esei ta sosodé. No ta dushi pa siña pa vários siman te lat den anochi i despues tòg haña mal sifra.”—Yolanda.

Bo a yega di sinti manera Yolanda? Laga nos ta sinsero, mal sifra na skol por desanimá bo mashá.

Algun hóben ku ta bayendo malu na skol, ta stòp di purba di drecha nan sifranan. Otronan ta asta stòp di bai skol. Aunke e dos opshonnan ei ta fásil pa skohe, tin un otro manera pa trata ku e problema ei. Ban konsiderá seis manera ku bo por mehorá bo sifranan.

• Loke bo por hasi

• Loke otro hóben ta bisa

Loke bo por hasi

• Bai tur bo lèsnan. Kisas bo ta pensa ku tur hende sa esei kaba, pero si bo falta hopi di bo lèsnan, esei lo no duna bo bon resultado.

  “Na e skol ku mi ta bai, e muchanan ku no ta preokupá ku nan sifranan, ta nèt esnan ku no ta bai skol, i asina nan ta perhudiká nan mes.”—Matthew.

  Beibel ta bisa: “Pues, kiko ku un hende sembra, esei lo e kosechá tambe.”—Galationan 6:7.

• Saka lo mihó for di kada lès. Ta bon pa ta presente na kada lès, pero esei ta djis e promé stap. Purba di saka lo mihó for di kada lès. Hasi anotashon. Purba di komprondé loke bo maestro ta splika. Si ta posibel, hasi pregunta durante di e lès.

  “Ami ta hasi hopi pregunta durante lès, pasobra ora un maestro ripará ku un alumno no ta komprondé e materia muchu bon, e ta bai splika e tópiko mas mihó ku ta posibel.”—Olivia.

  Beibel ta bisa: “Presta atenshon na e manera ku boso ta skucha.”—Lukas 8:18.

• Resistí e tentashon di spik. Bo no ta onesto si bo spik. Tin hopi manera pa spik na skol. Un manera ta ora bo kopia e tarea di otro hende. Pero esei no solamente ta algu desonesto, sino ku bo no ta siña nada tampoko.

  “Si bo no ta komprondé algu, no kopia e kontesta for di un otro alumno su prufwèrk. Si bo spik, bo no ta yuda bo mes. Na lugá di siña resolvé bo mes difikultatnan, bo ta siña dependé riba otro hende pa resolvé nan pa bo.”—Jonathan.

  Beibel ta bisa: “Pero laga kada un di boso analisá su mes akshonnan, anto e ora ei lo e tin motibu pa ta masha kontentu ku su mes.”—Galationan 6:4.

• Hasi trahamentu di hùiswèrk un prioridat. Si ta posibel traha bo hùiswèrk promé ku bo hasi otro kos—spesialmente promé ku bo bai rekreá.a Ora bo kaba di traha bo hùiswèrk, bo por disfrutá mihó di bo tempu liber!

  “Mi a pone prioridat pa traha mi hùiswèrk i esaki a yuda mi mehorá mi sifranan na skol. Ora mi yega kas, hopi biaha mi sa tin gana di bai drumi òf skucha muzik. Pero mi a kuminsá purba di traha mi hùiswèrk promé i despues bai sosegá.”—Calvin.

  Beibel ta bisa: “Sigui hasi sigur kiko ta e kosnan mas importante.”—Filipensenan 1:10.

• Pidi Yudansa. No sinti bèrgwensa pa pidi otro hende yuda bo. Pidi bo mayornan konseho. Pidi bo maestro pa yuda bo mehorá bo sifranan. Tin biaha bo por haña asta beilès.

  “Bai mesora serka bo maestro. Pidié pa e yuda bo komprondé e lès mihó i mehorá bo sifranan. Kisas e maestro lo keda impreshoná ku bo determinashon pa mehorá i e lo yuda bo.”—David.

  Beibel ta bisa: “Kaminda tin hopi konsehero tin viktoria.”—Proverbionan 11:14

• Probechá di kada oportunidat ku presentá. Den algun pais, nan ta pone pregunta adishonal den prufwèrk pa yuda bo mehorá bo sifra. Bo mes tambe por pidi pa tarea èkstra pa mehorá bo sifra. Si bo no a traha bo prufwèrk bon, kisas bo por pidi pa bo hasié di nobo.

  

  “Si mi ke mehorá mi sifranan den un sierto lès, ami tin ku hasi esfuerso pa logr’é. Mi ta puntra mi maestro si tin tarea èkstra ku mi por traha pa mehorá mi sifra òf si mi por traha e prufwèrk di nobo.”—Mackenzie.

  Beibel ta bisa: “Den tur trabou tin ganashi.”—Proverbionan 14:23