SIGUI VIGILÁ!

Rònt Mundu Tin Oumento di Violensia ku Arma di Kandela—Kiko Beibel Ta Bisa?

INFORMASHON AKTUALISÁ: 27 di aprel 2023

Arma di kandela ta sigui ta e kousa di morto di hopi hende rònt mundu. Aki ta sigui algun suseso ku a tuma lugá resientemente:

‘Merka ta birando e pais ku mas kaso di tiroteo den kua hopi hende ta pèrdè nan bida. Tin mas o ménos un kaso pa siman.’—21 di aprel 2023, e korant The Guardian.
‘Durante un tiroteo na un kas na Suráfrika, dies miembro di un famia a ser matá. Entre e personanan ku a muri, tabatin shete hende muhé i un mucha hòmber di 13 aña di edat.’—21 di aprel 2023, AP News.
‘Na Hamburg, Alemania, na un lugá kaminda Testigunan di Yehova ta reuní, un hòmber a tira 6 persona mata. Despues, el a tira su mes mata.’—10 di mart 2023, Reuters.

Beibel ta duna konsuelo na hende ku ta sufri pa motibu di suseso trágiko manera esnan menshoná ariba. Pa mira un kaso real, wak e vidio DeJanerio Brown: Tumbá Pero No Kompletamente Destruí.

Beibel ta yuda nos komprondé dikon suseso trágiko ta tuma lugá. Pa mas informashon, wak e vidio Dikon Dios Ta Permití Sufrimentu?

Durante luna di yüli 2022, rònt mundu tabatin vários kaso di violensia ku arma di kandela ku a laga hende den shòk:

“Un hòmber a mata un di e polítikonan mas konosí di Hapon [Eks Promé Minister Shinzo Abe]. Esei a laga e pais tur aribabou, i hopi hende rònt mundu a keda den shòk. E suseso tabata spesialmente sorprendente komo ku no tin hopi krímen violento na e pais, i nan tin lei hopi estrikto relashoná ku poseshon di arma di kandela.”—10 di yüli 2022, e korant The Japan Times.
“Dinamarka ta den shòk! Un hòmber a tira tres hende mata den un sentro komersial na Kopenhagen.”—4 di yüli 2022, Reuters.
“Suráfrika: 15 hende a muri despues ku un hòmber a basha bala riba hende den un bar na Soweto.”—10 di yüli 2022, e korant The Guardian.
“Mas ku 220 hende a muri debí na violensia ku arma di kandela na Merka durante e wikènt di selebrashon di 4 di yüli.”—5 di yüli 2022, CBS News.

Tin speransa ku e aktonan di violensia ei lo kaba un dia? Kiko Beibel ta bisa?

Violensia Lo Kaba

Beibel ta deskribí e tempu ku nos ta biba aden komo “e último dianan.” Beibel ta bisa ku e tempu akí hende lo ta feros i kruel. (2 Timoteo 3:1, 3) Pa motibu di e aktonan violento ei, hopi hende ta biba ku miedu. (Lukas 21:11) Sinembargo, Beibel ta primintí ku den futuro lo no tin violensia mas. Beibel ta bisa tambe ku hende “lo biba den un lugá kaminda pas ta reina, den kas sigur i kaminda tin trankilidat i sosiegu.” (Isaías 32:18) Kon violensia lo yega na su fin?

Dios lo kita hende malbado for di riba tera i kaba ku tur arma.

“Pa loke ta hende malbado, nan lo ser eliminá for di riba tera.”—Proverbionan 2:22.
“[Dios] ta kaba ku guera tur kaminda riba tera. E ta kibra bog i kibra sper na wèrki. E ta kima garoshi di guera den kandela.”—Salmo 46:9.

Dios lo kita e kousa prinsipal di violensia; lo e siña hende pa biba na pas ku otro.

“Nan lo no kousa daño ni destrukshon riba henter mi seru santu, pasobra meskos ku laman ta yen di awa, asina tambe tera sigur lo ta yen di hende ku konosé Yehova.”—Isaías 11:9.
For di awor, Dios ta siñando hende rònt mundu pa nan no ta violento i pa nan no usa arma. Sí, e ta siñando hende pa “bati nan spadanan i traha plug ku nan; ku nan spernan, nan lo traha kuchú pa snui mata.”—Mikéas 4:3.

Pa haña sa mas di e promesa di Beibel tokante un mundu sin miedu, lesa e artíkulo na spañó: “Ta Posibel pa Biba sin Miedu?”

Pa haña sa mas tokante e solushon permanente pa violensia, lesa e artíkulo na spañó: “Por Fin Tin Pas Riba Tera!”