Kiko Ke Men Ser un Kristian?—Kiko Beibel Ta Bisa?

Rònt mundu, hopi hende ku masha orguyo ta bisa ku nan ta kristian. Sinembargo, nan komportashon ta laga masha hopi di deseá; nan ta trata otro hende malu. Nan ta egoista, desonesto i niun tiki amabel. Tin di nan ta asta infiel na nan kasá. Tur e tipo di kosnan ei ta pone hende puntra nan mes: ‘Kiko ser un kristian ta nifiká realmente?’

Loke ser un kristian ta nifiká

Ta fásil pa un hende bisa ku e ta kristian. Pero djis bisa ku bo ta kristian no ta sufisiente. Segun Beibel, un kristian ta un disipel òf siguidó di Hesus. (Echonan 11:26) Kiko Hesus mes a bisa tokante esei? El a bisa: “Si boso keda fiel na mi palabranan, boso realmente ta mi disipelnan.” (Huan 8:31) Niun hende no por semper hasi presis presis loke Hesus a bisa. Pero un kristian ta hasi su bèst pa apliká loke Hesus a siña hende. Anto hende lo por mira esei na su komportashon i na e desishonnan ku e ta tuma. Ban wak algun ehèmpel di esei.

Un kristian ta mustra amor

Loke Hesus a bisa: “Mi ta duna boso un mandamentu nobo: stima otro; meskos ku ami a stima boso, boso tambe stima otro. Na esaki tur hende lo sa ku boso ta mi disipelnan, esta, si boso ta stima otro.”—Huan 13:34, 35.

Loke Hesus a hasi: Hesus tabata stima tur hende; e no tabata egoista. Ademas pa Hesus, no tabata importante si un hende tabatin plaka òf nò, si un hende tabata prominente òf di unda un hende tabata. Hesus a kura hende ku tabata malu; el a duna hende ku tabatin hamber kos di kome, i el a asta entregá su bida pa otro hende.—Mateo 14:14-21; 20:28.

Loke un kristian ta hasi: Un kristian ta mustra ku e stima hende ora ku e ta gusta kompartí, ora e no ta hasi distinshon di persona, i ora e ta kla pa pordoná. Un kristian ta yuda hende ku ta den nesesidat, i e ta dispuesto pa hasi sakrifisio pa yuda otro hende.—1 Huan 3:16.

Un kristian ta onesto

Loke Hesus a bisa: “Ami ta . . . e bèrdat.”—Huan 14:6.

Loke Hesus a hasi: Hesus semper tabata papia bèrdat, i e tabata onesto den tur loke e tabata hasi. Nunka e no a manipulá hende pa hasi loke e ke, ni e no a laga hende kere kos ku no ta bèrdat. E tabata konosí komo un hende ku ta onesto, asta ora esei a hink’é den problema.—Mateo 22:16; 26:63-67.

Loke un kristian ta hasi: Un kristian no ta gaña. E ta paga belasting, i e no ta hòrta. E ta traha duru na su trabou, kumpliendo ku e oranan di trabou ku su doño di trabou ta pag’é p’e. (Romanonan 13:5-7; Efesionan 4:28) E no ta estafa hende, ni spik na skol, ni pone informashon falsu den su c.v. ni riba kualke otro dokumento.—Hebreonan 13:18.

Un kristian ta trata hende na un manera amabel

Loke Hesus a bisa: “Bini serka mi, boso tur ku ta traha duru i ku ta kargá, i lo mi refreská boso. Tuma mi yugo riba boso skouder i siña di mi, pasobra mi tin un genio suave i un kurason humilde, i boso alma lo keda refreská. Pasobra mi yugo ta suave, i mi karga no ta pisá.”—Mateo 11:28-30.

Loke Hesus a hasi: Hesus tabata amabel, i e tabata laga hende sinti ku nan por aserk’é. E tabata laga mucha bini libremente serka dje. E tabata konsolá hende ku tabata sufri, i e tabata trata hende ku dignidat i rèspèt.—Marko 10:13-15; Lúkas 9:11.

Loke un kristian ta hasi: Un kristian ta papia ku hende na un manera amabel; e no ta ònbeskòp ni e no ta papia kos ofensivo. (Efesionan 4:29, 31, 32) E ta mustra interes den otro hende, i e ta buska oportunidat pa yuda nan.—Galationan 6:10.

Un kristian ta keda fiel na su kasá

Loke Hesus a bisa: “No laga ningun hende separá loke Dios a uni bou di un yugo.”—Marko 10:9.

Loke Hesus a hasi: Aunke Hesus mes no a kasa nunka, el a animá pareha kasá pa nan ta fiel na otro. (Mateo 19:9) El a spièrta hende pa tene kuidou ku kos ku por kibra matrimonio.—Mateo 5:28.

Loke un kristian ta hasi: Un kristian ta evitá di hasi kualke kos ku ta mustra falta di rèspèt pa su matrimonio. (Hebreonan 13:4) Un esposo i esposa ta trata otro ku amor i rèspèt.—Efesionan 5:28, 33.