Dikon Testigunan di Yehova No Ta Partisipá den Seremonia Patriótiko?

Testigunan di Yehova ta respetá gobièrnu i e emblemanan òf e símbolonan ku gobièrnu ta usa pa representá nan. Ademas, nos ta respetá otro hende ku ta skohe pa saludá bandera òf kanta himno.

Sinembargo, Testigunan di Yehova ta skohe pa no partisipá den seremonia patriótiko pasobra nos ta kere ku esei ta bai kontra loke Beibel ta siña. Nos ta apresiá tambe ora otro hende ta respetá nos kreensianan manera nos ta respetá nan kreensianan.

Den e artíkulo akí

• Ki prinsipio di Beibel nos mester tene kuenta kuné?

• Kiko Testigunan di Yehova ta hasi si lei di un pais ta obligá nan partisipá na seremonia patriótiko?

• Testigunan di Yehova ta skohe un sierto banda di un asuntu sosial òf polítiko?

Ki prinsipio di Beibel nos mester tene kuenta kuné?

Nos mester tene kuenta ku e siguiente dos prinsipionan di Beibel ora nos tuma nos desishon relashoná ku seremonia patriótiko:

• Ta Dios so meresé di haña nos adorashon. Beibel ta bisa: “Ta Yehova bo Dios bo tin ku adorá, i ta na e so bo tin ku rindi sirbishi sagrado.” (Lukas 4:8) Hopi biaha, e letranan di un himno nashonal ta inkluí un promesa ku un persona lo apoyá su pais riba tur otro kos òf persona. P’esei, Testigu di Yehova no ta sinti ku ta bon pa partisipá na seremonia patriótiko.

  Testigunan di Yehova ta pensa ku saludamentu di bandera ta un forma di adorashon òf idolatria. Esei ta algu ku Beibel ta prohibí. (1 Korintionan 10:14) Algun eksperto riba tereno di historia ta rekonosé ku, bon mirá, bandera di pais ta un símbolo religioso. Un historiadó ku yama Carlton J. H. Hayes a skirbi: “Patriotismo ta manera un religion i su símbolo mas importante ta bandera.”a E outor a bisa lo siguiente tokante e kristiannan di promé siglo: “E kristiannan a nenga di . . . hasi sakrifisio pa e emperador [romano]. Awendia, esei lo ta meskos ku nenga di saludá bandera.”b

  Testigunan di Yehova no ta saludá bandera. Pero nan no ta kibra òf kima bandera, ni nan no ta hasi nada ku ta mustra falta di rèspèt pa bandera òf otro símbolo di un pais.

• Tur hende ta igual den bista di Dios. (Echonan 10:34, 35) Beibel ta bisa ku “for di un solo hende” Dios “a traha tur nashon.” (Echonan 17:26) Pa e motibu ei, Testigunan di Yehova no ta haña ku ta bon pa halsa un grupo étniko òf un nashonalidat riba un otro. Nos ta respetá tur hende, sin importá di unda nan ta bini òf unda nan ta biba.—1 Pedro 2:17.

Kiko Testigunan di Yehova ta hasi si lei di un pais ta obligá nan partisipá na seremonia patriótiko?

Testigunan di Yehova no ta kontra gobièrnu. Nos ta kere ku Dios ta permití gobièrnu eksistí komo parti di su propósito. (Romanonan 13:1-7) Ademas, nos ta kere ku hende kristian mester obedesé gobièrnu.—Lukas 20:25.

Sinembargo, kiko un kristian mester hasi si e leinan di un pais ta bisa nos hasi algu ku ta bai kontra e leinan di Dios? Den algun kaso ta posibel pa entregá un petishon ofisial na gobièrnu pa kambia e leinan.c Ora esei no ta posibel, Testigunan di Yehova ta mantené un aktitut respetuoso, pero nan ta skohe pa “obedesé Dios na promé lugá, i no hende.”—Echonan 5:29.

Testigunan di Yehova ta skohe un sierto banda di un asuntu sosial òf polítiko?

Nò. Testigunan di Yehova no ta skohe banda den asuntu sosial òf polítiko. E echo ku nos no ta saludá bandera òf kanta himno, no ta pasobra nos ke skohe un banda den asuntu polítiko. Mas bien, nos ta keda sin hasi e kosnan ei pasobra nos ta obedesé loke Beibel ta bisa tokante seremonia patriótiko.