Kiko Ta e Reino di Dios?

E kontesta ku Beibel ta duna

E Reino di Dios ta un gobièrnu real ku Yehova Dios a establesé. “E Reino di Dios” ta ser yama tambe den Beibel “e Reino di shelu” ya ku ta for di shelu e ta goberná. (Marko 1:14, 15; Mateo 4:17) Aunke e tin hopi kos meskos ku gobièrnunan humano, tòg e ta superior den tur sentido.

• Gobernante. Dios a apuntá Hesukristu komo Rei di e Reino i a dun’é mas outoridat ku kualke gobernante humano hamas por tin. (Mateo 28:18) Hesus ta usa e poder akí solamente pa hasi bon. De echo, el a demostrá di ta un Lider konfiabel i yen di kompashon. (Mateo 4:23; Marko 1:40, 41; 6:31-34; Lukas 7:11-17) Bou di e guia di Dios, Hesus a skohe personanan for di tur nashon ku ‘komo rei lo goberná e tera’ huntu kuné den shelu.—Revelashon 5:9, 10.

• Durashon. Na kontraste ku gobièrnunan humano ku ta bai i bini, e Reino di Dios “nunka lo no wòrdu destruí.”—Daniel 2:44, Beibel Santu.

• Súpdito. Kualke hende ku ta hasi loke Dios ta bisa, por ta un súpdito di e Reino di Dios sin importá nan nashonalidat òf unda nan a nase.—Echonan 10:34, 35.

• Lei. E leinan (òf mandamentunan) di e Reino di Dios ta hasi mas ku djis prohibí mal kondukta. E leinan akí ta hisa balor moral tambe di nan súpditonan. Por ehèmpel, Beibel ta bisa: “‘Stima Yehova bo Dios ku henter bo kurason, ku henter bo alma i ku henter bo mente.’ Esaki ta e mandamentu di mas grandi i esun di promé. E di dos, igual kuné, ta esaki: ‘Stima bo próhimo meskos ku bo mes.’” (Mateo 22:37-39) Amor pa Dios i pa próhimo ta motivá súpditonan di e Reino pa tene kuenta ku interes di otronan.

• Edukashon. E Reino di Dios tin normanan haltu pa su súpditonan pero tambe e ta siña hende kon pa tene nan mes na e normanan ei.—Isaías 48:17, 18.

• Meta. E Reino di Dios no ta hasi su gobernantenan riku a kosto di su súpditonan. En bes di esei, e Reino lo kumpli ku e boluntat di Dios, inkluso e promesa ku esnan ku ta stim’é lo biba pa semper den paradeis riba tera.—Isaías 35:1, 5, 6; Mateo 6:10; Revelashon 21:1-4.