LOKE HÓBEN SA PUNTRA

Dikon Mi Mayornan No Ta Laga Mi Gosa?

Bo amigunan a invitá bo pa bai un fiesta e wikènt akí. Bo ta puntra bo mayornan si bo por bai, ma nan ta bisa bo “Nò.” Bo no a ferwagt otro. Biaha pasá nan a bisa meskos.

Den e artíkulo akí nos lo wak:

Dikon semper mi mayornan ta bisa nò?

Si ta parse ku tur ora bo mayornan ta bisa nò ora bo pidi algu, kisas bo ta pensa ku nan no ke pa bo gosa.

Un hóben ku yama Marie a sintié asina ora el a haña su promé selular. E ta bisa: “Mi tata a pone hopi regla tokante ki app mi por download, ku ken mi por papia i te ki ora mi por papia ku nan. Pero, mi amiganan sí por a hasi loke nan tabata ke!”

Pensa riba esaki: Di bèrdat Marie su tata no tabata ke pa e gosa? Kiko por tabata preokupá su tata?

Un outo ta kore riba kaminda. Na banda di kaminda, tin un bòrchi ku e límite di velosidat “50.” E meter di velosidat ta mustra ku e outo ta kore 50. — Límite di velosidat por frena bo libertat, pero e por protehá bo di peliger. Esei ta konta tambe pa e reglanan ku bo mayornan pone

Purba esaki: Imaginá ku abo ta un mayor i bo tin un yu tiner ku a kaba di haña un selular. Ki preokupashon lo bo tin? Ki regla lo bo pone pa protehá bo yu? Kiko lo bo kontestá si bo yu bisa ku bo no ke pa e gosa?

“Semper mi tata a bisa: ‘Purba di hinka bo mes den mi sapatu.’ Ora m’a hasi esei, m’a mira e balor di e reglanan ku mi tata a pone i tambe dikon el a pone e reglanan ei. Si mi tabatin yu, lo mi tabata ke pa nan sigui e mesun reglanan ku mi tata a pone pa mi.”—Tanya.

Kiko mi por hasi pa mi mayornan bisa sí?

Un mucha hòmber masha rabiá ta para ku man krusá i huma ta sali for di su orea.

No hasi esaki: fada, keha òf pleita.

“Si bo zundra bo no ta logra nada, anto abo i bo mayornan lo keda kansá. Si bo pleita, bo mayornan lo pensa ku bo no ta un persona madurá i ku bo no ta kla pa haña mas libertat.”—Richard.

Purba esaki: No kontestá mesora. En bes di esei, wak e situashon for di e punto di bista di bo mayornan. Puntra bo mes: Nan no ta konfia abo, e lugá ku lo bo bai òf e hendenan ku lo bo ta huntu kuné? Papia ku bo mayornan na un manera trankil, asina bo por komprondé dikon nan a bisa nò.

“Hopi biaha, mi mayornan tin bon motibu pa pone regla. Mi mayornan no ke stroba mi di gosa. Nan ke pa mi gosa, pero sin ku esei ta kousa problema.”—Ivy.

Beibel ta bisa: “Un persona bobo no por dominá su rabia, pero un persona sabí sí ta dominá su mes i keda kalmu.”—Proverbionan 29:11.

Anochi lat, un hóben ta haña i manda mensahe usando ret sosial.

No hasi esaki: Hasi un kos sin ku bo mayornan sa.

“Mi tabata buska èksküs pa mi no obedesé e reglanan ku mi tata a pone pa usa mi selular. Mi tabata buska manera pa manda mensahe pa mi amigunan anochi lat òf download app ku mi tata no tabata di akuerdo kuné. Ku tempu, mi tata a haña sa loke mi a hasi i a pone regla mas strèn, pasobra awor e no por a konfia mi. Nunka ta bon pa bo buska èksküs pa desobedesé regla.”—Marie.

Purba esaki: Mustra bo mayornan ku bo ta dispuesto pa obedesé nan reglanan i gana nan konfiansa.

“Tene pasenshi. Lo tuma tempu pa bo mayornan kambia un regla, pero si nan mira ku bo ta obedesiendo e reglanan ku nan a pone, kisas nan lo duna bo mas libertat.”—Melinda.

Beibel ta bisa: “Yunan, obedesé boso mayornan den tur kos.”—Kolosensenan 3:20.

Un mucha hòmber ta roga su mayornan. Den banda tin tres otro hóben.

No hasi esaki: Pone preshon riba bo mayornan. Kisas bo ta bisa bo mayornan loke otro hóben di bo edat sí tin mag di hasi.

“Si bo keda insistí pa haña loke bo ke, bo bida lo no bira mas fásil ni lo e no yuda bo haña loke bo ke.”—Natalie.

Purba esaki: Usa e blachi di tarea “Hablemos de las normas” pa yuda bo papia di e reglanan ku bo mayornan a pone.

“Un mayor ke mira ku bo por tuma bon desishon. Pues, ora mi papia ku mi mayornan, mi ta purba di rasoná ku nan en bes di laga mi emoshonnan dominá mi. Ora mi hasi esei, ta mas fásil pa mi mayornan laga mi hasi loke mi ta pidi.”—Joseph.

Beibel ta bisa: “Onra bo tata i bo mama.”—Efesionan 6:2.