Dios Lo Kontestá Mi Orashon?
E kontesta ku Beibel ta duna
Sí. Tantu Beibel komo eksperensia di bida real ta mustra ku Dios ta kontestá orashon. Por ehèmpel, Beibel ta bisa: “[Dios] lo kumpli ku e deseo di esnan ku ta tem’é; tambe e lo tende nan sklamashon i lo salba nan.” (Salmo 145:19, Beibel Santu) Pero, ta dependé di abo mes si Dios lo kontestá bo orashon.
Loke Dios ta rekerí di hende ku resa na dje
Resa na Dios i no na Hesus, Maria, santu, angel òf imágen. Ta Yehova Dios so ta e “Skuchador di orashon.”—Salmo 65:2, Beibel na papiamentu koriente.
Resa pidi pa kosnan ku ta di akuerdo ku Dios su boluntat, manera Beibel ta indiká.—1 Huan 5:14.
Resa den nòmber di Hesus i asina mustra rèspèt pa su posishon. E mes a bisa: “Ningun hende no ta yega serka e Tata si no ta pa medio di mi.”—Huan 14:6.
Hasi orashon ku fe i pidi Dios pa haña mas fe si ta nesesario.—Mateo 21:22; Lukas 17:5.
Sea humilde di kurason. Beibel ta bisa: “Pasobra Jehová ta den haltu, y E ta mira e umilde.”—Salmo 138:6, Salmonan y Proverbionan, Editorial Evangelica.
Perseverá den orashon. Hesus a bisa: “Sigui pidi, i boso lo risibí.”—Lukas 11:9.
Loke no ta importante pa Dios
Rasa òf nashonalidat. Beibel ta bisa: “Dios no ta hasi distinshon di persona, sino ta aseptá tur hende di tur nashon ku ta tem’é i ta hasi loke ta korekto.”—Echonan 10:34, 35.
Posishon di kurpa. Bo por hasi orashon na Dios sea sintá, di bùig òf kabes bahá, na rudia òf pará riba pia.—1 Krónikanan 17:16; Nehemías 8:6; Daniel 6:10; Marko 11:25.
Na bos haltu òf den silensio. Dios ta kontestá asta orashon hasí den silensio.—Nehemías 2:1-6.
Sea bo problema ta grandi òf chikitu. Dios ta animá bo pa ‘tira tur bo inkietut riba dje, pasobra e ta interesá den bo.’—1 Pedro 5:7.