Un Kristian Por Aseptá Tratamentu Médiko?
E kontesta ku Beibel ta duna
Klaru ku sí. Hesus a indiká ku su siguidónan por buska tratamentu médiko ora el a bisa ku “hende bon di salú no tin mester di dòkter, ma hende malu sí.” (Mateo 9:12) Aunke Beibel no ta un buki médiko, e ta kontené prinsipionan pa guia hende ku ke agradá Dios.
Pregunta ku bo tin ku hasi bo mes
1. Mi ta komprondé e tratamentu ku dòkter ke duna mi? Beibel ta konsehá nos pa buska informashon konfiabel en bes di “kere tur kos.”—Proverbionan 14:15, Beibel Santu.
2. Mi mester buska un di dos òf di tres opinion? Ta bon ku bo por akudí na algun di e ‘hopi konseheronan’ ku tin, spesialmente ora bo kondishon di salú ta grave.—Proverbionan 15:22, Beibel Santu.
3. E tratamentu ta bai kontra e mandamentu di Beibel pa ‘apstené di sanger’?—Echonan 15:20.
4. E diagnóstiko òf tratamentu tin di haber ku spiritismo òf bruheria? Ta bon pa sa esei, pasobra Beibel ta kondená “bruheria.” (Galationan 5:19-21) Pa bo haña sa si e tin di haber ku spiritismo òf bruheria, hasi bo mes e siguiente preguntanan:
E persona ku ta duna tratamentu ta praktiká spiritismo?
E tratamentu ta basá riba e kreensia ku ta un enemigu ku ta praktiká bruheria òf un dios ku bo a ofendé a kousa e malesa?
E persona ku ta duna tratamentu ta usa rito religioso, magia, opheto òf otro praktiká di bruheria tantu den preparashon komo den uso di remedi?
5. Mi ta demasiado preokupá ku mi salú? Beibel ta konsehá: “Laga tur hende mira ki rasonabel boso ta.” (Filipensenan 4:5) Ora bo ta rasonabel, esei lo yuda bo konsentrá riba “e kosnan mas importante,” manera asuntunan spiritual.—Filipensenan 1:10; Mateo 5:3.