LOKE HÓBEN SA PUNTRA
Kreashon òf Evolushon—Parti 2: Mi Mester Kere den Evolushon?
Alex ta tur konfundí. Semper el a kere den Dios i kreashon. Pero awe su mener di biologia ta insistí ku e teoria di evolushon ta un echo, ku e ta basá riba investigashonnan sientífiko ku ta bon probá. Alex no ke laga parse ku e ta bobo. E ta bisa den su mes: ‘Kon ku bai bin, si e sientífikonan a proba ku evolushon ta bèrdat, ken ami ta pa kuestioná nan?’
Bo ta rekonosé bo mes den e senario akí? Porta henter bo bida bo a kere loke Beibel ta bisa: “Dios a krea e shelunan i tera.” (Génesis 1:1, Beibel Santu) Pero, últimamente algun hende a purba di konvensé bo ku esaki ta djis un kuenta i ku e siñansa di evolushon ta e bèrdat. Bo mester djis kere nan òf lo ta mihó pa bo analisá e teoria di evolushon promé?
Dos motibu pa analisá e teoria di evolushon
Sientífikonan no ta di akuerdo ku e siñansa di evolushon. Despues di hopi dékada di investigashon, sientífikonan ainda no a haña un splikashon pa e teoria di evolushon ku nan tur ta di akuerdo kuné.
Pa pensa ariba: Si sientífikonan mes no por ta di akuerdo ku evolushon, i nan ta supose di ta e ekspertonan, ta malu pa duda den e teoria ei?—Salmo 10:4.
Loke bo ta kere tin efekto riba bo bida. Un mucha hòmber ku yama Zachary ta bisa: “Si bida a bin na eksistensia djis pa kasualidat, e ora ei nos bida, ni nada otro den e universo no tin sentido.” Loke e ta bisa ta bèrdat. Si e teoria di evolushon ta bèrdat, nos bida no tin un propósito. (1 Korintionan 15:32) Di otro banda, si nos a ser krea, nos por haña kontesta pa preguntanan tokante nos propósito den bida i kiko lo sosodé den futuro.—Yeremías 29:11.
Pa pensa ariba: Si bo sa e bèrdat tokante evolushon i kreashon, esei lo hasi un diferensia den bo bida?—Hebreonan 11:1.
Pregunta pa pensa ariba
LOKE HENDE SA BISA: ‘Tur kos den universo ta eksistí pa puru kasualidat komo resultado di e “big bang,” un eksploshon grandi.’
Ken òf kiko a kousa e eksploshon akí?
Kiko tin mas sentido: bisa ku tur kos a bin di nada òf ku tur kos a originá di algu òf di un persona?
LOKE HENDE SA BISA: ‘Hende a bini di bestia.’
Si hende a bini di bestia, por ehèmpel di makaku, dikon nos ta hopi mas inteligente ku nan?a
Dikon asta e forma di bida di mas “simpel” ta asina kompliká?b
LOKE HENDE SA BISA: ‘Evolushon ta un echo komprobá.’
E persona ku ta bisa esaki, a buska evidensia di loke e ta bisa?
Kuantu hende ta kere den evolushon djis pasobra otronan ta bisa ku tur hende inteligente ta kere esei?
a Tin hende ta pensa ku nos ta mas inteligente pasobra nos mente ta mas grandi ku esun di makaku. Wak e foyeto El origen de la vida. Cinco cuestiones dignas de análisis, página 28 pa konfirmá ku esaki no ta bèrdat.