Kiko Testigunan di Yehova Ta Kere Aden?

Komo Testigunan di Yehova, nos ta hasi nos esfuerso pa pega na e forma di kristianismo ku Hesus a siña i ku su apòstelnan tambe a sigui. E artíkulo akí ta splika brevemente nos kreensianan básiko.

1. Dios. Nos ta adorá e úniko Dios berdadero, e Haltísimo i Kreador di tur kos. Su nòmber ta Yehova. (Salmo 83:18; Revelashon 4:11) E ta e Dios di Abraham, Moises i Hesus.—Éksodo 3:6; 32:11; Huan 20:17.

2. Beibel. Pa nos, Beibel ta Dios su mensahe pa humanidat. (Huan 17:17; 2 Timoteo 3:16) Loke nos ta kere aden ta basá riba tur loke e 66 bukinan di Beibel ta kontené, ku ta inkluí tantu e “Tèstamènt Bieu” komo e “Tèstamènt Nobo.” Profesor Jason D. BeDuhn a skirbi tokante loke Testigunan di Yehova ta kere aden bisando ku “henter nan kreensia i akshonnan ta basá riba Beibel i nan no ta disidí adelantá kiko mester ta pará skirbí den dje.”a

   E echo ku nos ta aseptá henter e Beibel no kier men ku nos ta fundamentalista, esta, hende ku ta pega estriktamente na e interpretashon literal di e Skritura. Nos ta rekonosé ku algun parti di Beibel ta skirbí den forma simbóliko i ku no mester keda interpretá literalmente.​—Revelashon 1:1.

3. Hesus. Nos ta sigui e siñansanan i ehèmpel di Hesukristu i ta dun’é onor komo nos Salbador i Yu di Dios. (Mateo 20:28; Echonan 5:31) Pues, nos ta kristian. (Echonan 11:26) Sinembargo, pa medio di un estudio di Beibel nos a haña sa ku Hesus no ta e Dios Todopoderoso i ku Beibel no ta apoyá e doktrina di Trinidat.—Huan 14:28.

4. E Reino di Dios. Esaki ta un gobièrnu real ku ta den shelu i no algu den kurason di kristiannan. Lo e remplasá gobièrnunan humano i kumpli ku e propósito ku Dios tin pa tera. (Daniel 2:44; Mateo 6:9, 10) Esaki lo sosodé pronto pasobra segun Beibel nos ta biba den e “último dianan.”—2 Timoteo 3:1-5; Mateo 24:3-14.

   Hesus ta Rei di e Reino di Dios den shelu. El a kuminsá goberná na aña 1914.—Revelashon 11:15.

5. Salbashon. Pa medio di e sakrifisio di reskate di Hesus nos por ser librá di piká i morto. (Mateo 20:28; Echonan 4:12) Pa benefisiá di e sakrifisio akí, hende no solamente mester pone fe den Hesus, si no tambe nan mester kambia nan bida i batisá. (Mateo 28:19, 20; Huan 3:16; Echonan 3:19, 20) I e fe ei nan ta demostr’é ku nan akshonnan. (Santiago 2:24, 26) Sinembargo, salbashon no ta algu ku nos meresé; nos por hañ’é solamente pa medio di “e bondat inmeresí di Dios.”—Galationan 2:16, 21.

6. Shelu. Yehova Dios, Hesukristu i e angelnan fiel ta biba den e region spiritual.b (Salmo 103:19-21; Echonan 7:55) Un kantidat chikitu di hende, un total di 144.000, lo ser resusitá pa bai yuda den shelu i pa goberná ku Hesus den e Reino.—Daniel 7:27; 2 Timoteo 2:12; Revelashon 5:9, 10; 14:1, 3.

7. 

   Tera. Dios a krea tera pa hende por biba pa semper riba dje. (Salmo 104:5; 115:16; Eklesiástes 1:4) Lo e bendishoná hende obediente ku salú perfekto i bida eterno den un paradeis riba tera.—Salmo 37:11, 34.

8. Maldat i sufrimentu. Beibel ta splika ku un angel a rebeldiá kontra Dios. Asina maldat i sufrimentu a kuminsá eksistí. (Huan 8:44) E angel akí, ku despues di e rebeldia a ser yamá “Diabel” i “Satanas,” a konvensé e promé pareha humano pa djòin e. E konsekuensianan pa nan desendientenan tabata desastroso. (Génesis 3:1-6; Romanonan 5:12) Pa por resolvé e kuestionnan ku Satanas a lanta, Dios a permití maldat i sufrimentu, pero lo e no permití esaki pa semper.

9. Morto. Ora un persona muri, e ta stòp di eksistí. (Salmo 146:4; Eklesiástes 9:5, 10) E mortonan no ta sufri den un fièrnu di kandela.

   Míles di miónes di hende lo bolbe biba ora Dios resusitá nan. (Echonan 24:15) Sinembargo, esnan ku lo haña resurekshon i ku no kier aseptá e normanan di Dios lo ser destruí pa semper i lo no por biba nunka mas.—Revelashon 20:14, 15.

10. 

    Famia. Manera Dios a establesé for di prinsipio, pa nos, matrimonio ta e union entre un hòmber i un muhé. I e úniko motibu bálido pa divorsio ta inmoralidat seksual. (Mateo 19:4-9) Nos ta konvensí ku e konsehonan ku Beibel ta duna ta yuda hasi famianan felis.—Efesionan 5:22–6:1.

11. Nos adorashon. Nos no ta adorá krus ni niun otro imágen. (Deuteronomio 4:15-19; 1 Huan 5:21) Nos adorashon ta inkluí e siguiente kosnan importante:

    • Orashon na Dios.—Filipensenan 4:6.

    • Lesa i studia Beibel.—Salmo 1:1-3.

    • Meditá riba loke nos ta siña for di Beibel.—Salmo 77:12.

    • Reuní huntu pa hasi orashon, studia Beibel, kanta huntu, ekspresá nos fe i animá otro.—Kolosensenan 3:16; Hebreonan 10:23-25.

    • Prediká e ‘bon notisia di e Reino.’—Mateo 24:14.

    • Yuda esnan ku ta den nesesidat.—Santiago 2:14-17.

    • Konstruí i mantené Salònnan di Reino i otro edifisionan ku ta promové nos obra mundial di edukashon bíbliko.—Salmo 127:1.

    • Partisipá den trabou di duna ousilio na esnan ku ta víktima di desaster natural.—Echonan 11:27-30.

    

12. Nos organisashon. Nos organisashon ta konsistí di kongregashonnan. Kada kongregashon ta ser supervisá pa un grupo di ansiano. Sinembargo, e ansianonan no ta forma parti di un klase di klero ni nan no ta risibí niun tipo di salario. (Mateo 10:8; 23:8) Nos no ta kobra diesmo ni no ta pasa kolèkt na niun di nos reunionnan. (2 Korintionan 9:7) Tur nos aktividatnan ta ser finansiá pa donashon boluntario i anónimo.

    Un grupo chikitu di kristian madurá, konosí komo Kuerpo Gobernante, ta dirigí e aktividatnan di Testigunan di Yehova rònt mundu for di nos sede mundial.—Mateo 24:45.

13. Nos union. Rònt mundu nos tur tin e mesun kreensianan. (1 Korintionan 1:10) Tambe nos ta hasi esfuerso pa evitá tur tipo di divishon sosial, étniko òf rasial. (Echonan 10:34, 35; Santiago 2:4) Aunke nos ta uní, kada un di nos ta liber pa tuma nos mes desishon. Kada Testigu ta usa su konsenshi bíblikamente entrená pa tuma desishon.—Romanonan 14:1-4; Hebreonan 5:14.

14. Nos kondukta. Nos ta purba pa no ta egoista, ma pa semper demostrá berdadero amor den tur loke nos ta hasi. (Huan 13:34, 35) Nos ta evitá kosnan ku Dios no ta aprobá manera mal uso di sanger ku ta inkluí transfushon di sanger. (Echonan 15:28, 29; Galationan 5:19-21) Nos ta pasífiko i no ta partisipá den guera. (Mateo 5:9; Isaías 2:4) Nos ta respetá gobièrnu di e pais kaminda nos ta biba i ta obedesé su leinan basta nan no ta bai kontra lei di Dios.—Mateo 22:21; Echonan 5:29.

15. Nos relashon ku otro hende. Hesus a duna e siguiente mandamentu: “Stima bo próhimo meskos ku bo mes.” Tambe el a bisa ku kristiannan “no ta parti di mundu.” (Mateo 22:39; Huan 17:16) Pues nos ta purba di “hasi loke ta bon pa ku tur hende,” ma nos ta keda neutral den asuntunan polítiko i ta evitá tur laso ku otro religion. (Galationan 6:10; 2 Korintionan 6:14) Nos ta respetá sí e desishonnan ku otronan ta tuma den e asuntunan akí.—Romanonan 14:12.

Si bo tin mas pregunta tokante Testigunan di Yehova, bo por haña mas informashon riba nos website, i tambe bo por tuma kontakto ku un di nos ofisinanan, bishitá reunion na un Salòn di Reino òf papia ku un Testigu den bo bisindario.