Kon Mi Por Bira un Testigu di Yehova?

Na Mateo 28:19, 20, Hesus a deskribí e rekisitonan pa un persona por bira un Testigu di Yehova. E versíkulonan akí ta mustra kiko un persona mester hasi pa e por bira un disipel di Kristu, lokual ta inkluí papia òf duna testimonio di Yehova.

Stap 1: Haña sa kiko Beibel ta siña. Hesus a instruí su siguidónan pa ‘hasi hende disipel . . . , i siña nan.’ (Mateo 28:19, 20) E palabra “disipel” literalmente ta nifiká “un persona ku ta den proseso di siña.” Spesialmente e siñansanan di Hesukristu ku tin den Beibel ta duna bo e informashon ku bo tin mester pa bo por tin un bida felis i ku propósito. (2 Timoteo 3:16, 17) Nos lo tin gana di yuda bo haña sa kiko Beibel ta siña mediante un kurso di Beibel grátis.—Mateo 10:7, 8; 1 Tesalonisensenan 2:13.

Stap 2: Apliká loke bo ta siña. Hesus a bisa ku su disipelnan no mester siña so, sino tambe “kumpli ku tur loke [el] a manda.” (Mateo 28:20) Esaki ta nifiká ku bo estudio di Beibel mester ta mas ku djis esfuerso pa siña algu nobo. Podisé bo tin ku hasi kambionan importante den bo manera di pensa i komportá bo mes. (Echonan 10:42; Efesionan 4:22-29; Hebreonan 10:24, 25) Esnan ku ta obedesé e mandamentunan di Hesus ta sinti nan mes motivá e ora ei pa siguié i dediká nan bida na Yehova Dios.—Mateo 16:24.

Stap 3: Boutismo. (Mateo 28:19) Beibel ta kompará boutismo u un entiero figurativo. (Kompará ku Romanonan 6:2-4.) Ora un persona batisá, ta komo si fuera el a muri pa ku su manera di biba anterior i ta kuminsá un bida nobo. Pues, ku bo boutismo bo ta rekonosé públikamente ku ya bo a kumpli ku e promé dos rekisitonan ku Hesus a menshoná i bo ta pidi Dios p’e duna bo un konsenshi limpi.—Hebreonan 9:14; 1 Pedro 3:21.

Kon mi por sa si mi ta kla pa batisá?

Bisa e ansianonan di bo kongregashon. Nan lo papia ku bo pa hasi sigur ku bo ta komprondé loke Beibel ta siña, ku bo ta aplikando loke bo a siña i ku bo a dediká bo mes na Dios di bo mes boluntat.—Echonan 20:28; 1 Pedro 5:1-3.

E rekisitonan akí ta konta tambe pa yu di Testigu di Yehova?

Sí. Nos ta lanta nos yunan “den e disiplina di Yehova i inkulká su manera di pensa den nan,” manera Beibel ta bisa. (Efesionan 6:4) Pero ora nan krese, nan mes mester tuma e desishon pa siña, aseptá i apliká loke Beibel ta siña promé ku nan por kualifiká pa boutismo. (Romanonan 12:2) Al fin i al kabo, kada ken mester disidí pa nan mes si nan ke adorá Yehova òf nò.—Romanonan 14:12; Galationan 6:5.