Kiko Ta un Profesia?

E kontesta ku Beibel ta duna

Un profesia ta un mensahe ku Dios a inspirá, un revelashon divino. Beibel ta bisa ku profetanan “a papia di parti di Dios segun ku spiritu santu tabata guia nan.” (2 Pedro 1:20, 21) Pues, un profeta ta un persona ku a haña e mensahe di Dios i ta pasa esaki pa otronan.​—Echonan 3:18.

Kon Dios tabata papia ku e profetanan?

Dios a usa diferente manera pa pasa su ideanan over na su profetanan:

• Den forma skirbí. Dios a usa e método akí por lo ménos na ún okashon, ora el a duna Moises e Dies Mandamentunan den forma skirbí.​—Éksodo 31:18.

• Mensahe pa medio di angel. Por ehèmpel, Dios a usa un angel pa instruí Moises kiko e mester a bisa Fárao di Egipto. (Éksodo 3:2-4, 10) Ora tabata importante pa usa palabra spesífiko, Dios tabata manda e angelnan dikta su mensahe palabra pa palabra manera el a hasi ora el a bisa Moises: “Skirbi e palabranan akí, pasobra konforme e palabranan akí mi a sera un aliansa ku bo i ku Israel.”—Éksodo 34:27, Beibel Santu.a

• Pa medio di vishon. Na algun okashon un profeta tabata haña vishon ora e tabata lantá i na tinu. (Isaías 1:1; Habakuk 1:1) Algun vishon tabata asina real ku e profeta ku a haña esaki a partisipá den nan. (Lukas 9:28-36; Revelashon 1:10-17) Na otro okashon, e profeta a haña sierto vishonnan ora e tabata den un trans. (Echonan 10:10, 11; 22:17-21) Tambe Dios a usa soñonan pa transmití su mensahe.​—Daniel 7:1; Echonan 16:9, 10.

• Guia mental. Pa transmití Su mensahe Dios a guia pensamentu di su profetanan. Esaki ta e nifikashon di loke Beibel ta bisa: “Henter e Skritura ta inspirá di Dios.” E ekspreshon “inspirá di Dios” ta nifiká literalmente “pa medio di e rosea di Dios.” (2 Timoteo 3:16) Pues, Dios a usa su spiritu santu òf forsa aktivo pa transmití su ideanan den e mente di su sirbidónan. E mensahe tabata di Dios pero e profetanan a skirbié den nan mes palabra.​—2 Samuel 23:1, 2.

Profesianan semper ta pronostiká futuro?

Nò, no ta tur profesia di Beibel tin e propósito di pronostiká futuro. Sin embargo, mayoria mensahe ta relashoná ku futuro aunke ta indirekto. Por ehèmpel, e profetanan di Dios a atvertí e israelitanan di antigwedat bes tras bes tokante nan mal kondukta. E atvertensianan ei a laga e pueblo komprondé kiko tabata e bendishonnan si nan a obedesé pero tambe e konsekuensianan si nan no a hasi kaso. (Yeremías 25:4-6) E resultado lo a dependé di loke e israelitanan a skohe pa hasi.​—Deuteronomio 30:19, 20.

Ehèmpel di algun profesia di Beibel ku no ta pronostiká futuro

• Na un okashon ora e israelitanan a pidi Dios yudansa, el a manda un profeta pa splika nan ku pasobra nan a nenga di obedesé e mandamentunan di Dios e no a yuda nan.​—Huesnan 6:6-10.

• Ora Hesus a papia ku un muhé Samaritano, el bisa kosnan di su pasado ku e lo por a sa solamente pa medio di revelashon divino. E muhé a rekonosé ku Hesus tabata un profeta aunke Hesus no a pronostiká nada tokante futuro.​—Huan 4:17-19.

• Durante Hesus su kaso hudisial, su enemigunan a tapa su kara, dal e i bis’é: “Profetisá no? Bisa nos ta ken a dal bo!” Nan no tabata pidi pa Hesus pronostiká e futuro pero pa e bisa pa medio di poder di Dios ken ta esun ku a dal e.—Lukas 22:63, 64.