Dikon Testigunan di Yehova A Kambia Algun di Nan Kreensianan?

Beibel ta e úniko base pa loke nos ta kere aden. Pues, segun ku nos ta haña un mihó komprondementu di Beibel, nos ta adaptá nos kreensianan.a

E kambionan akí ta di akuerdo ku e prinsipio di Beibel na Proverbionan 4:18, ku ta bisa: “E kaminda di e hustu ta meskos ku e lus briante di dia ku ta bira mas i mas kla te ora bira di dia kla.” Ku otro palabra, meskos ku ora solo ta sali gradualmente nos por mira sierto detayenan di un paisahe mihó, asina Dios ta laga nos komprondé e bèrdat divino progresivamente, na su debido tempu. (1 Pedro 1:10-12) Beibel a bisa adelantá ku Dios lo aselerá e proseso akí durante “e tempu di fin.”—Daniel 12:4.

E ahustenan akí di nos komprondementu no mester straña nos ni preokupá nos. Sirbidónan di Dios di pasado tambe tabatin idea- i ekspektativanan robes i nan mester a kambia nan manera di pensa.

• Moises a ofresé su mes pa libra e nashon di Israel 40 aña promé ku e tempu stipulá di Dios.​—Echonan 7:23-25, 30, 35.

• E apòstelnan no a komprondé e profesia ku a papia tokante e morto i resurekshon di e Mesías.​—Isaías 53:8-12; Mateo 16:21-23.

• Algun kristian di promé siglo tabatin ideanan robes di e momento ku “e dia di Yehova” lo yega.—2 Tesalonisensenan 2:1, 2.

Ku tempu Dios a korigí nan komprondementu robes i nos ta pidi pa e sigui hasi meskos ku nos tambe.​—Santiago 1:5.