Ta Eksistí “Shete Piká Mortal”?
E kontesta ku Beibel ta duna
Beibel no ta deskribí spesífikamente un grupo di “shete piká mortal.” Sinembargo, Beibel ta siña ku hende ku praktiká piká serio lo no haña salbashon. Por ehèmpel, Beibel ta referí na pikánan serio manera fornikashon, idolatria, spiritismo, atake di rabia i buracheria komo “obranan di karni.” Beibel ta bisa: “Esnan ku ta praktiká e tipo di kosnan ei lo no risibí e Reino di Dios.”—Galationan 5:19-21.a
Pero Beibel no ta menshoná ‘shete kos ku ta un abominashon pa Señor’?
Sí, Beibel ta menshoná nan. Proverbionan 6:16, ta bisa: “Tin seis kos ku SEÑOR ta odia, sí, shete kos ku ta un abominashon p’e.” (Beibel Santu) Sinembargo, e lista ku ta sigui na Proverbionan 6:17-19 no ta inkluí tur tur kos. Mas bien, e ta deskribí kosnan básiko ku ta representá tur tipo di aktonan malu, inkluso kosnan ku nos ta pensa, papia i hasi.b
Kiko ke men “piká mortal”?
Algun tradukshon di Beibel ta usa e ekspreshon ei na 1 Huan 5:16. Por ehèmpel, E Testament Nobo ta bisa: “Tin picá mortal.” Por tradusí e ekspreshon ”piká mortal” komo “piká ku ta hiba na morto” tambe. Kiko ta e diferensia entre “piká ku ta hiba na morto“ i “piká ku no ta hiba na morto”?—1 Huan 5:16.
Beibel ta mustra kla ku tur piká ta hiba na morto. Sinembargo, nos por wòrdu salbá di piká i morto mediante e sakrifisio di reskate di Hesukristu. (Romanonan 5:12; 6:23) Pues anto, un “piká ku ta hiba na morto” ta un piká ku e reskate di Kristu no ta kubri. Un hende ku kometé e tipo di piká akí ta asina determiná pa sigui su rumbo di piká ku nunka lo e no kambia su aktitut òf kondukta. Tambe Beibel ta bisa ku esun ku praktiká e tipo di piká ei “lo no haña pordon.”—Mateo 12:31; Lukas 12:10.
a E lista na Galationan 5:19-21 ta menshoná 15 ehèmpel di pikánan serio. E no ta menshoná delaster un piká pasobra despues di a menshoná nan, Beibel ta sigui bisa “i kosnan asin’akí.” Asina Beibel ta animá e lektor pa usa disernimentu pa identifiká e kosnan ku no ta den e lista pero ku sí ta kai bou di “kosnan asin’akí.”
b Proverbionan 6:16 ta kontené un ehèmpel di un ekspreshon ku ta enfatisá e di dos number dor di hasi un kontraste entre e di dos number i e promé. E forma di ekspreshon akí ta aparesé hopi den Beibel.—Yòb 5:19; Proverbionan 30:15, 18, 21.