Kiko Testigunan di Yehova Ta Pensa di Divorsio?
Nos ta pega na loke Beibel ta bisa tokante matrimonio i divorsio. Dios a krea matrimonio pa e ser un union permanente entre un hòmber i un muhé. E úniko base bíbliko pa divorsio ta fornikashon.—Mateo 19:5, 6, 9.
Testigunan di Yehova ta yuda parehanan ku tin problema den matrimonio?
Sí. Den vários manera:
Publikashonnan. Esakinan ta ofresé informashon regular pa yuda matrimonionan bira fuerte, asta matrimonionan ku ta parse sin speransa. Por ehèmpel, wak e artíkulonan na spañó “Cómo fortalecer el sentido del compromiso en el matrimonio,” “Cómo perdonar,” i “Cómo recuperar la confianza perdida.”
Reunionnan. Na nos reunionnan di kongregashon, asamblea- i kongresonan, nos ta trata konsehonan bíbliko ku ta práktiko pa matrimonio.
Ansianonan. Ansianonan di kongregashon ta yuda parehanan kasá ku tekstonan manera Efesionan 5:22-25.
Ansianonan di kongregashon mester duna nan aprobashon ora un pareha Testigu divorsiá?
Nò. Asta ora un pareha pidi e ansianonan yudansa matrimonial, nan no tin outoridat pa bisa e pareha kiko pa hasi. (Galationan 6:5) Sin embargo, un hende ku skohe pa divorsiá sin base bíbliko no por gosa di privilegionan spesial den kongregashon, i bíblikamente e no ta liber pa kasa atrobe.—1 Timoteo 3:1, 5, 12.
Kiko Testigunan di Yehova ta pensa di separashon?
Beibel ta animá parehanan kasá pa keda ku otro asta ora tin problema. (1 Korintionan 7:10-16) Parehanan kasá por resolvé hopi di nan problemanan mediante orashon di kurason, aplikashon di prinsipio bíbliko i amor.—1 Korintionan 13:4-8; Galationan 5:22.
Sinembargo, den situashonnan ekstremo, algun kristian a disidí di separá di nan kasá pa e siguiente motibunan:
E esposo ta nenga di perkurá materialmente pa e famia.—1 Timoteo 5:8.
Maltrato físiko severo.—Salmo 11:5.
E bienestar spiritual di un kasá ta den peliger grave. Por ehèmpel, un kasá por purba fòrsa su kasá Testigu di Yehova pa kibra mandamentunan di Dios, i e Testigu por disidí ku un separashon ta e úniko manera pa “obedesé Dios na promé lugá, i no hende.”—Echonan 5:29.