LOKE HÓBEN SA PUNTRA
Kon Beibel Por Yuda Mi?—Parti 2: Kon Bo Por Disfrutá di Bo Lesamentu di Beibel?
Un hóben ku yama Will a bisa: “Ora bo no sa kon pa lesa Beibel, lesamentu di Beibel por parse laf.”
Bo ke haña sa kon bo por disfrutá di bo lesamentu di Beibel? E artíkulo akí lo yuda bo.
Kon pa laga e relatonan di Beibel haña bida
Hinka bo mes den e historia. Bo por sigui e siguiente sugerensianan:
Skohe e relato di Beibel ku bo ke studia. Bo por skohe un historia spesífiko òf parti di un di e evangelionan. Òf, bo por skohe un relato ku tin riba jw.org bou di e sekshon lesamentu bíbliko dramatisá.
Lesa e relato ku bo a skohe. Bo por les’é bo so òf huntu ku bo famia òf amigunan. Un persona ta hunga naradó i e otro hendenan ta hunga e personahenan.
Bo por usa un di e sugerensianan akí:
Pinta algun plachi ku ta konta e historia. Na kada plachi, skirbi loke a sosodé den e historia.
Traha un diagram. Por ehèmpel, ora bo lesa tokante un fiel sirbidó di Yehova, bo por skirbi e persona su kualidatnan, loke el a hasi i e bendishonnan ku el a risibí.
Hasi komo si fuera ta un notisia bo ta dunando. Bo ta entrevistá e personahe prinsipal i e personanan ku tabata presente.
Imaginá bo kiko lo a pasa si un personahe prinsipal a tuma un otro desishon. Tuma por ehèmpel Pedro. (Marko 14:66-72) Kiko Pedro por a hasi pa evitá di nenga Hesus?
Si bo ta un persona kreativo, traha bo propio historia basá riba e relato bíbliko. Inkluí e lèsnan ku bo a siña for di e relato.—Romanonan 15:4.
Bo por hinka bida den bo lesamentu di Beibel!
Buska informashon!
Ora bo studia un relato di Beibel, bo ta haña sa vários kos interesante. Tin biaha, un òf dos palabra ta kontené informashon importante.
Por ehèmpel kompará Mateo 28:7 ku Marko 16:7.
Dikon Marko a bisa ku Hesus lo aparesé na e disipelnan i “tambe Pedro”?
Tep: Marko no tabat’ei ora Hesus a aparesé na e disipelnan. Ta parse ku el a haña e informashon ei serka Pedro.
Algun punto interesante: Dikon Pedro lo a sintié bon ora el a tende ku Hesus kier a mir’é atrobe? (Marko 14:66-72) Kon Hesus a demostrá ku e tabata un berdadero amigu pa Pedro? Kon abo por imitá Hesus i ser un bon amigu?
Ora bo ta hinka bida den bo lesamentu di Beibel i ta buska informashon, bo ta disfrutá muchu mas di bo lesamentu di Beibel.