Kiko Tabata e Promé Piká?

E kontesta ku Beibel ta duna

Adam ku Eva tabata e promé personanan ku a peka. Ora nan a desobedesé Dios i a kome for di e “palu di konosementu di bon i malu,” nan a kometé loke hopi hende ta yama e promé piká.a (Génesis 2:16, 17; 3:6; Romanonan 5:19) Adam i Eva a ser prohibí pa kome di e palu ei pasobra e palu a representá e outoridat, òf derecho, di Yehova di disidí loke ta bon i loke ta malu pa humanidat. Ora nan a kome for di e palu, nan a tuma asuntu den nan mes man i a disidí pa nan mes loke ta bon òf malu. Di e manera ei, nan a rechasá Dios su outoridat.

• Kon e “promé piká” a perhudiká Adam i Eva?

• Kon e “promé piká” ta perhudiká nos?

• Nos por ser librá di e konsekuensianan di e “promé piká”?

• Idea robes tokante e “promé piká”

Kon e “promé piká” a perhudiká Adam i Eva?

Adam i Eva a bira bieu i a muri pasobra nan a peka. Nan a daña nan amistat ku Yehova i a pèrdè e posibilidat di biba pa semper ku salú perfekto.—Génesis 3:19.

Kon e “promé piká” ta perhudiká nos?

Adam i Eva a pasa nan kondishon pekaminoso pa tur nan desendientenan. Ta meskos ku ora un mayor ta pasa un malesa genétiko pa su yunan. (Romanonan 5:12) Pues, tur hende ta nase “den piká,”b esta, nos tur ta nase imperfekto i ta inkliná na hasi loke ta malu.—Salmo 51:5; Efesionan 2:3.

Debí na piká heredá, òf imperfekshon, nos ta bira malu, bira bieu i muri. (Romanonan 6:23) Ademas, nos ta sufri e konsekuensianan di nos propio erornan i eror di otro hende.—Eklesiástes 8:9; Santiago 3:2.

Nos por ser librá di e konsekuensianan di e “promé piká”?

Sí. Beibel ta bisa ku Hesus a muri “komo sakrifisio di reskate pa nos pikánan.” (1 Huan 4:10) Hesus su sakrifisio ta libra nos for di e konsekuensianan di piká heredá i ta duna nos oportunidat pa haña loke Adam i Eva a pèrdè, esta, e posibilidat di biba pa semper ku salú perfekto.—Huan 3:16.c

Idea robes tokante e “promé piká”

Idea robes: E promé piká ta alehá nos definitivamente for di Dios.

Bèrdat: Dios no ta kulpa nos pa loke Adam i Eva a hasi. E ta komprondé ku nos ta imperfekto, i e no ta spera mas di loke ta rasonabel for di nos. (Salmo 103:14) Aunke nos ta sufri debí na piká heredá, nos tin e oportunidat i privilegio di tin un bon amistat ku Dios.—Proverbionan 3:32.

Idea robes: Boutismo ta libra hende for di e “promé piká,” p’esei hende mester batisá for di bebi.

Bèrdat: Aunke boutismo ta un paso importante pa salbashon, ta solamente fe den e sakrifisio di Hesus por libra un persona di piká. (1 Pedro 3:21; 1 Huan 1:7) Fe ta basá riba konosementu eksakto di Beibel. Pues, un bebi no por tin fe. P’esei, Beibel no ta animá nos pa batisá bebi. E kristiannan di promé siglo tabata sa esei bon kla. Nan no tabata batisá bebi, sino hende kreyente, esta, “hòmber i muhé” adulto ku tabatin fe den Dios su palabra.—Echonan 2:41; 8:12.

Idea robes: Dios a kondená hende muhé pasobra Eva tabata esun ku a kome di e fruta prohibí promé.

Bèrdat: Na lugá di kondená hende muhé, Dios a kondená “e kolebra original, esun ku ta ser yamá Diabel i Satanas,” kende a pone Eva peka. (Revelashon 12:9; Génesis 3:14) Ademas, Dios a pone e responsabilidat di e promé piká riba Adam, no riba Adam su esposa.—Romanonan 5:12.

Dikon Dios a bisa ku Adam lo dominá su esposa? (Génesis 3:16) Ora Dios a bisa esei, e no a aprobá komportashon asina. Simplemente e tabata indiká e konsekuensia tristu di piká. Dios ke pa un hòmber stima i onra su esposa i mustra rèspèt profundo na tur hende muhé.—Efesionan 5:25; 1 Pedro 3:7

Idea robes: E promé piká tabata relashon seksual.

Bèrdat: E promé piká no por tabata relashon seksual pa e siguiente motibunan:

• Dios a prohibí Adam di kome for di e palu di konosementu di bon i malu ora ku e tabata su so ainda, sin esposa.—Génesis 2:17, 18

• Dios a duna Adam e mandamentu pa “sea fruktífero i yena e tera,” esta, haña yu. (Génesis 1:28) Lo ta kruel di Dios su parti pa kondená e promé pareha pasobra nan a hasi loke el a manda nan hasi.

• Adam i Eva no a peka pareu—Eva a peka promé kaba su esposo.—Génesis 3:6.

• Beibel ta aprobá relashon seksual entre pareha kasá.—Proverbionan 5:18, 19; 1 Korintionan 7:3.