Un Saserdote Ta Haña Kontesta

Un dia Eliso, un ruman muhé Testigu di Yehova, tabata kondusí un estudio di Beibel na kas di un señora. Diripiente nan a haña un bishita inesperá di un saserdote i su esposa. Eliso a tende ku e pareha ei a pèrdè nan úniko yu hòmber den morto.

Ora Eliso a duna nan kondolensia, e hòmber i su esposa a kuminsá yora masha pisá. Despues, rabiá e hòmber a bisa: “Mi no ta komprondé kon Dios a permití nos pasa den un prueba asina! Dikon el a kita mi úniko yu fo’i mi? M’a sirbi Dios pa 28 aña i m’a hasi hopi kos bon, anto ta asin’akí e ta rekompensá mi? Dikon Dios a mata mi yu?”

Eliso a splika e hòmber ku no ta Dios a kita su yu. Anto e la splik’é tambe tokante reskate, resurekshon i e motibunan pakiko Dios ta permití kos malu sosodé. Tantu e hòmber komo su esposa a bisa Eliso ku el a kaba di duna nan kontesta pa loke nan a pidi den orashon.

E siguiente siman e hòmber i su esposa a bolbe bini pa djòin e estudio di Beibel. Eliso i su studiante tabata na e kapítulo di “Berdadero Speransa pa Bo Sernan Kerí Ku A Muri” den e buki Kiko Beibel ta Siña Realmente? E pareha a partisipá ku entusiasmo.

Mas despues nan dos a asistí na e kongreso spesial di Testigunan di Yehova na Tblisi, Georgia. Nan a keda mashá emoshoná ora nan a mira e amor i union ku a reina. Eseinan ta kualidatnan ku nan a purba di inkulká den nan miembronan di iglesia, pero nan no a logra.