Kon pa Mantené Teknologia na Su Lugá

Teknologia por benefisiá bo matrimonio òf e por perhudik’é. Kon e ta afektá bo matrimonio?

• Loke bo mester sa

• Loke bo por hasi

• Loke otro pareha ta bisa

• Guia pa kòmbersashon

Loke bo mester sa

• Ora nos ta usa aparatonan teknológiko na e manera korekto, nan por benefisiá nos matrimonio. Por ehèmpel, algun pareha ta usa nan telefòn durante dia pa keda den kontakto ku otro ora nan no ta huntu.

  

  “Un simpel mensahe ku ta bisa ‘mi stima bo’ òf ‘mi ta pensando riba bo’ por nifiká hopi.”—Jonathan.

• Mal uso di aparatonan teknológiko por debilitá un matrimonio. Por ehèmpel, algun persona ta konstantemente okupá ku nan telefòn òf tablet. Esei ta kita tur e tempu ku nan por dediká na nan kasá.

  “Mi ta sigur ku lo tabatin biaha ku mi esposo lo kier a kòmbersá mas tantu ku mi si mi no tabata konstantemente okupá ku mi telefòn.”—Julissa.

• Tin hende ta bisa ku nan por kòmbersá ku nan kasá pareu ku nan ta usa nan telefòn. Pero, segun e sosiólogo Sherry Turkle, esei ta un pensamentu robes tokante multitasking. Bo ta kere ku bo por hasi yen kos pareu, pero esei no ta bèrdat. El a bisa ku en realidat, “mas kos bo purba hasi pareu, mas malu bo ta hasi kada kos.”a

  “Ta dushi pa kòmbersá ku mi kasá, pero no ora ku e ke hasi yen kos pareu. Ora e ke kòmbersá ku mi pareu ku e ta usa su telefòn, e ta laga mi pensa ku si e tin su telefòn so tambe e ta kontentu.” —Sarah

Konklushon: E manera ku bo ta usa aparatonan teknológiko por sea yuda bo matrimonio òf dañ’é.

Loke bo por hasi

Pone prioridat. Beibel ta bisa: “Hasi sigur di e kosnan mas importante”. (Filipensenan 1:10) Puntra bo mes: ‘E tempu i atenshon ku ami i mi kasá ta dediká na nos telefòn òf nos tablet hòrta for di e tempu ku nos mester dediká na otro?’

“Ta tristu pa mira un pareha ta kome huntu na un restorant, pero kada un ta pegá na nan telefòn. Nos no ke bira katibu di teknologia i lubidá ku e kos di mas importante ta nos relashon ku otro.”—Matthew.

Pone límite. Beibel ta bisa: “Pues, paga bon tinu pa e manera ku boso ta kana no ta manera hende imprudente sino manera hende sabí, usando boso tempu di e mihó manera.” (Efesionan 5:15, 16) Puntra bo mes: ‘Mi por pone un momento spesífiko pa lesa i kontestá mensahe ku no ta urgente en bes di bula kontestá nan asina nan drenta?’

“Mi ta haña ku ta sabí pa kita e zonido di mi telefòn i lesa e mensahenan te ora mi tin tempu. Den masha poko kaso un yamada, un mensahe òf un mail ta asina urgente ku mi mester kontestá mesora.”—Jonathan

Si ta posibel, laga asuntu di trabou keda na trabou. Beibel ta bisa: “Tin un tempu stipulá pa tur kos.” (Eklesiástes 3:1) Puntra bo mes: ‘Mi ta permití yamada di mi trabou invadí mi privasidat? Si ta asina, ki efekto esei tin riba mi matrimonio? Kiko mi kasá ta pensa di esei?’

“Ku yudansa di teknologia nos por traha tur ora i tur kaminda. P’esei mi mester hasi esfuerso pa no wak mi telefòn tur ora pa atendé kos di trabou ora ami ku mi kasá ta huntu.” —Matthew.

Palabrá ku bo kasá kon boso ta bai usa teknologia. Beibel ta bisa: “Laga kada hende sigui buska, no su mes benefisio, sino esun di e otro persona.“ (1 Korintionan 10:24) Palabrá ku bo kasá kon kada un di boso lo usa boso aparatonan i hasi kambio si ta nesesario. Pa kuminsá, bo por usa e guia pa kòmbersashon den e artíkulo akí.

“Ami i mi esposo ta bisa otro frankamente ki ora nos ta haña ku un di nos ta usando su telefòn òf tablèt muchu. Nos ta konsiente ku esei por bira un problema, p’esei nos ta tene kuenta ku e punto di bista di otro.”—Danielle

Konklushon: Hasi sigur ku teknologia ta yuda bo i no bira bo doño.