Kiko Por Yuda Mi Evitá Pensamentu Negativo?

• Ki tipo di persona bo ta?

• Dikon ta importante pa evitá pensamentu negativo?

• Loke bo por hasi

• Lesa e artíkulo tokante kon pa keda positivo

• Loke otro hóben ta bisa

Ki tipo di persona bo ta?

• Optimista

  “Mi ta purba di ta mas kontentu i trankil posibel. Mi ta purba di hari tur dia.”—Valerie.

• Pesimista

  “Mi promé reakshon riba algu positivo ta di pensa ku tin algu robes na dje—e ta zona muchu bon pa ta bèrdat òf ta un fout nan a hasi.”—Rebecca.

• Realista

  “Si bo ta optimista, ta fásil pa bo ser desapuntá i si bo ta pesimista, esei lo amargá bo bida. Si bo ta realista, esei lo yuda bo mira tur asuntu manera nan ta di bèrdat.”—Anna.

Dikon ta importante pa evitá pensamentu negativo?

Beibel ta bisa: “Esun di kurason kontentu semper tin fiesta.” (Proverbionan 15:15) Ta klaru ku hende ku ta evitá pensamentu negativo i ku tin un aktitut positivo den bida, hopi bes ta mas kontentu. Probablemente, nan lo tin hopi amigu tambe. Pasobra, ken ke anda ku hende ku ta tristu tur ora?

Sinembargo, tin realidat di bida ku asta hende di mas optimista tin ku enfrentá. Por ehèmpel:

• Den notisia tin hopi informe tokante guera, terorismo i krímen.

• Tur famia tin problema.

• Nos tur tin ku lucha ku nos imperfekshonnan.

• Nos amigunan tin biaha ta bisa òf hasi kos ku ta laga nos sinti nos malu.

En bes di sera bo wowo pa e realidatnan ei—òf enfoká riba nan di tal manera ku bo ta sinti bo mas tristu—purba di haña un balansa. Si bo ta realístiko, lo bo por evitá pensamentu negativo i aseptá e realidatnan di bida sin laga eseinan desanimá bo.

Loke bo por hasi

• Kòrda ku bo ta imperfekto.

  Beibel ta bisa: “No tin hende hustu riba tera ku kontinuamente ta hasi bon i nunka ta peka.” (Eklesiástes 7:20) E echo ku bo ta imperfekto i ta faya ta mustra ku bo ta un ser humano, i no un frakaso.

  Kiko por yuda bo ta realístiko: Traha riba bo foutnan, pero no eksigí perfekshon di bo mes. Un hóben ku yama Caleb a bisa: “Mi ta purba di no keda pensa riba mi fayonan. En bes di esei, mi ta purba di siña for di nan i wak kon pa mehorá.”

• No kompará bo mes ku otro hende.

  Beibel ta bisa: “Laga nos no konsiderá nos mes demasiado importante, ni instigá kompetensia ku otro ni envidiá otro.” (Galationan 5:26) Si bo keda wak potrèt riba ret sosial di tur e fiestanan ku bo no a ser invitá na dje, lo bo sinti bo malu. Kisas asta bo mihó amigunan por parse di ta bo pió enemigunan.

  Kiko por yuda bo ta realístiko: Aseptá e echo ku lo bo no ser invitá na tur evento sosial. Ademas, ret sosial no ta konta e historia kompleto. Un tiner ku yama Alexi a bisa: “Riba ret sosial bo ta mira solamente e kosnan interesante den bida di un persona. Hende no sa pone e kosnan ménos interesante riba ret sosial.”

• Promové pas—spesialmente den bo famia.

  Beibel ta bisa: “Si ta posibel, te asina leu ku ta dependé di boso, keda na pas ku tur hende.” (Romanonan 12:18) Bo no tin kontrol riba loke un otro hende ta hasi, pero loke sí bo por kontrolá ta bo manera di reakshoná. Bo por skohe pa ta un hasidó di pas.

  Kiko por yuda bo ta realístiko: Hasi esfuerso pa no pone mas strès den bo famia. Purba di ta un hasidó di pas, manera lo bo ke ta den kualke relashon. Melinda a bisa: “Niun hende no ta perfekto i nos tur lo trapa riba otro su tenchi pia de bes en kuando. Ta nos tin ku skohe kon pa reakshoná—pa mantené pas òf nò.”

• Mustra ku bo ta gradisidu.

  Beibel ta bisa: “Mustra ku boso ta gradisidu.” (Kolosensenan 3:15) Un persona gradisidu lo enfoká riba e kosnan ku ta bai bon i no riba e kosnan ku ta parse di bai malu.

  Kiko por yuda bo ta realístiko: Ta bèrdat ku bo tin problema, pero no sera wowo pa e kosnan bon den bo bida. Un hóben ku yama Rebecca a bisa: “Tur dia mi tabata skirbi un kos positivo ku a tuma lugá den mi bida den mi dagboek. Mi a hasié pa mi kòrda mi mes ku mi tin hopi kos positivo pa pensa riba dje.”

• Skohe bon amigu.

  Beibel ta bisa: “Mal kompania ta daña bon kustumber.” (1 Korintionan 15:33) Si e personanan ku bo ta anda kuné ta krítiko, sarkástiko òf amargá, nan karakter negativo lo tin influensia riba bo.

  Kiko por yuda bo ta realístiko: Bo amigunan lo tin nan momentonan difísil i nan por kuminsá keha i bira negativo. Hasi loke bo por pa animá nan, pero no laga nan problemanan afektá bo demasiado. Un hóben ku yama Michelle a bisa: “Nos no mester anda solamente ku hende negativo. Por ehèmpel, den matemátika, si bo suma dos sifra negativo ku otro, e resultado ta bira un sifra negativo mas grandi.”

Lesa artíkulo tokante kon pa ta positivo

Beibel ta bisa ku nos ta biba den tempu krítiko i difísil pa trata kuné. (2 Timoteo 3:1) Bo ta haña ku ta difísil pa ta positivo den un mundu ku tin asina tantu kos negativo? Lesa e artíkulo: “Sufrimentu Lo Kaba un Dia?”