Nota

a Ora Hesus a papia tokante e último dianan, el a konta su disipelnan vários ilustrashon. Ta interesante pa nota ku el a referí promé na “e esklabo fiel i prudente,” e grupo chikitu di ruman ungí ku lo dirigí e pueblo di Dios. (Mat. 24:45-47) Despues el a konta algun ilustrashon ku ta referí prinsipalmente na esnan ku tin e speransa pa bai shelu. (Mat. 25:1-30) Por último, el a papia di esnan ku tin e speransa di biba riba tera ku lo apoyá Kristu su rumannan. (Mat. 25:31-46) Di mes manera, den nos tempu e profesia di Ezekiel ta kumpli promé den esnan ku tin e speransa pa bai shelu. Aunke e reino di dies tribu por lo general no ta representá esnan ku tin e speransa di biba riba tera, e unimentu ku ta ser deskribí den e profesia akí ta pone nos kòrda riba e union ku ta eksistí entre esnan ku tin e speransa pa biba riba tera i esnan ku tin e speransa pa bai shelu.