Hobennan Sa Puntra . . .

Con Mi Por Vence Mi Obsesion cu Peso?

“E preocupacion mas grandi den mi bida ta si mi mester hunta mayonès den mi pan of no. Ta con mi por concentrá riba otro cos si mi ta obsesioná cu mayonès? E decision final? Mayonès, no. E tin muchu caloria. Anorexia ta gana atrobe. Ami ta perde.”—Jaimee.

MIYONES di hóben ta sufri di trastorno alimentario.a Mayoria di nan no a cuminsá cu e intencion di laga nan mes muri di hamber (anorexia) of di desaroyá un patronchi di manda hopi cuminda abou i despues sak’é (bulimia). Al contrario, hopi a cuminsá cu e simpel meta di perde un par di kilo. Pero promé cu nan realisá, nan tabata atrapá den un ciclo abnormal di laga nan mes muri di hamber of manda hopi cuminda abou. Jaimee ta bisa: “Henter e dieta aki a cuminsá dor cu mi kier a controlá mi peso, pero awor ta e ta controlá mi.”

Si bo ta haña cu bo ta obsesioná cu cuminda i su efecto riba bo peso, kico bo por haci? Promé, realisá cu hopi otro hóben a lucha contra trastorno alimentario i a gana! Pero con?

Wak Bo Mes den Spiel

Un paso masha importante den direccion di gana e bataya contra un trastorno alimentario ta pa aceptá bo aparencia. “Mayoria hende cu trastorno alimentario tin un imágen trocí di nan mes,” segun e buki Changing Bodies, Changing Lives (Curpa Ta Desaroyá, Bida Ta Cambia). “Nan no ta mira nan curpa realísticamente i ta masha crítico tocante nan mes, foral tocante nan aparencia.”

Sí, algun tiener ta basa henter e imágen cu nan tin di nan mes riba nan figura; nan ta mira cualkier defecto como un catástrofe. “Mi ta asina gordo cu mi no por soport’é,” Vicki di 17 aña ta bisa. “Mi cintura ta asina hanchu cu mi no por bisti niun blusa hincá paden.” Asta despues di a perde 10 kilo, Vicki no tabata satisfecho. E tabata sea nenga di come, of tabata hinca dede den su garganta pa saca loke el a caba di come.

Claro cu no ta malu pa bo ta preocupá te na cierto grado cu bo aparencia. Relacioná cu esaki, ta interesante pa nota cu di vários muher i homber, Bijbel ta bisa cu nan tabatin bunita figura i aparencia físico, manera Sara, Raquel, Josef, David i Abigail.b Bijbel ta asta bisa cu Abisag, e enfermera di David, tabata “bunita te na extremo.”—1 Reynan 1:4.

Loke Berdadero Bunitesa Ta

No obstante, Bijbel no ta pone e énfasis principal riba un hende su aparencia físico of figura. Mas bien, e ta elogiá “e persona secreto di curason.” (1 Pedro 3:4) Ta e persona interno ta haci un hende sea atractivo of detestabel den bista di Dios i di hende.—Proverbionan 11:20, 22.

Tuma por ehempel, Absalom, yu di rey David. Bijbel ta bisa: “No tabatin ningun homber asina bunita den henter Israel pa elogiá asina tantu. For di su plant’i pia te na su corona di cabes no tabatin ningun defecto den dje.” (2 Samuel 14:25) Sin embargo, e yoncuman aki tabata un traidor. Orguyo i ambicion a pone cu el a purba kita puesto dje rey cu Jehova a nombra. P’esei Bijbel no ta duna niun relato bunita di Absalom. Mas bien e ta describié como un homber sin bergwensa i desleal, cu un odio asesino.

No ta un hende su figura ta determiná si e ta berdaderamente bunita of nèchi. Cu bon motibu, Bijbel ta declará: “Adkerí sabiduria; i huntu cu tur loke bo ta adkerí, adkerí comprendimentu. Lo e duna bo cabes un krans di encanto; lo e otorgá bo un corona di bunitesa.”—Proverbionan 4:7, 9.

Ta berdad cu hopi bes tin mas cos ta causa trastornonan alimentario cu solamente ser malcontentu cu bo aparencia. Un obra di referencia ta bisa: “Por lo general, hende cu ta bira obsesioná cu cuminda i cu ta bira víctima di trastorno alimentario manera anorexia nervosa, bulimia i comementu di mas, tin masha poco balor propio. Nan no ta haña cu nan ta bal mashá i ta sinti cu otronan no ta duna nan balor tampoco.”

Tin vários factor cu por contribuí na sintimentunan di cu bo no tin balor. Por ehempel, na comienso di bo añanan como tiener, sintimentunan di insiguridad por tormentá bo, foral si bo a desaroyá mas lihé cu bo pareunan. Tambe tin hóbennan cu ta lanta den casnan caminda tin problema constantemente, kisas asta abusu físico of sexual. Sea cual sea e causa, generalmente recuperacion ta rekerí pa bo reconocé loke ta lanta e sintimentunan di no tin balor. Esaki ta nificá cu bo mester cuminsá mira bo berdadero balor como persona. Un cos ta sigur: tur hende tin por lo ménos algun cualidad encomendabel. (Compará cu 1 Corintionan 12:14-18.) Sí, kisas abo no ta wak esakinan den bo mes, pero un amiga maduro lo por yuda bo mira nan.

Pero kico si di berdad bo tin cu perde peso pa motibunan legítimo di salú? Bijbel ta recomendá pa nos ta “moderá di custumber.” (1 Timoteo 3:11) P’esei, ta mihó pa evitá di bai te na extremo den tene dieta of bira víctima di programanan di perde peso lihé. Kisas e mihó manera pa baha e kilonan indeseá ta dor di tin un dieta saludabel i haci ehercicio den un manera moderá. E revista FDA Consumer ta bisa: “Mescos cu casi tur otro cos, tin un manera bon i un manera robes di perde peso. E manera robes ta di keda sin come, determiná pa come nada otro sino pan di dieta cu awa, bebe píldora di dieta, of haci bo mes saca loke bo ta come.”

Confia un Hende Ta Yudansa Poderoso

Nancy Kolodny, un trahadó social, ta compará un trastorno alimentario cu “drenta un laberinto bo so, sin mapa of compas, sin sa precis unda e salidanan ta, sin sa ki ora lo bo sali, ni si lo bo sali. . . . Mas tempu bo keda eiden, mas confundí i frustrá bo ta bira miéntras cu bo ta purba di sali for di dje.” P’esei, si bo tin e síntomanan di anorexia of bulimia, bo tin cu busca yudansa. Bo no por sali for dje “laberinto” ei bo so. Pues, papia cu un di bo mayornan of un otro adulto cu bo ta confia. Un proverbio bíblico ta declará: “Un berdadero compañero ta stima na tur tempu, i ta un ruman cu ta nací pa ora tin angustia.”—Proverbionan 17:17.

Hopi Testigo di Jehova a haña compañerismo digno di confiansa asina entre e ancianonan den e congregacion cristian. Naturalmente, ancianonan no ta dokter, i nan yudansa no ta tuma e lugá di yudansa médico. Sin embargo, superintendentenan cristian lo no bira lomba pa e “sclamacion kehoso di esun di condicion humilde,” i nan conseho i oracionnan por yuda “cura esun enfermo” den sentido spiritual.—Proverbionan 21:13; Santiago 5:13-15.

Si bo no ta sinti bo cómodo pa papia cu un hende cara-cara, skirbi loke bo kier bisa den un carta, i pidi un contesta skirbí. E cos importante ta pa laga e asuntu sali na cla. Nancy Kolodny ta skirbi: “Ora bo reconocé cu bo no por trata cu e asuntu bo so mas, bo ta haciendo un compromiso pa di awor padilanti laga un otro hende yuda bo.” E ta sigui bisa: “Kisas esakinan ta pasonan hopi difícil pa bo pensa ariba i dal nan, pero nan ta pasonan positivo, e tipo di paso cu lo pone bo den e bon direccion pa sali for dje laberinto.”

Hóbennan cristian tin un otro recurso poderoso: oracion. Haci oracion na Dios no ta djis un yudansa sicológico. E ta comunicacion berdadero i vital cu e Creador, cu ta comprendé bo mihó cu abo ta comprendé bo mes! (1 Juan 3:19, 20) P’esei, aunke esaki no ta e debido tempu pa Jehova kita tur malesa, nos Dios amoroso por guia bo pasonan pa asina bo no tambaleá. (Salmo 55:22) Di propio experencia e salmista David a skirbi: “Mi a puntra Jehova, i el a contestá mi, i for di tur mi sustunan el a libra mi. Esun afligí aki a yama, i Jehova mes a tende. I for di tur su angustianan El a salb’é.”—Salmo 34:4, 6.

P’esei, soru pa bo expresá bo sintimentunan di mas profundo na Jehova Dios. Apostel Pedro a skirbi: “Tira tur boso ansiedad riba dje, pasobra e ta interesá den boso.” (1 Pedro 5:7) Pakico no lesa Salmo 34, 77, 86, 103 i 139 cuidadosamente, i asina aumentá bo aprecio pa Jehova su bondad amoroso? Meditá riba e salmonan aki, i lo bo fortalecé bo conviccion cu Jehova ta leal i cu e kier pa bo logra. Dor di lesa su Palabra, lo bo yega na sinti mescos cu David, kende a skirbi: “Ora preokupashon a oumentá, bo konsuelo a duna mi alivio.”—Salmo 94:19, Beibel na papiamentu koriente.

Tene Pacenshi—Recuperacion Ta Lento

Mayoria hende cu ta haña yudansa pa un trastorno alimentario no ta recuperá di anochi pa mainta. Tuma por ehempel Jaimee, citá na cuminsamentu. Asta despues cu el a cuminsá haña yudansa, el a sinti cu tabata difícil p’e come un cos simpel manera un tayó di cornflakes. E ta bisa: “Mi tin cu sigui bisa mi mes cu esaki ta bon pa mi i cu mi tin mester di cuminda pa biba. Cada cuchara cu mi hinca den mi boca ta pisa mil kilo.”

Un tempu Jaimee tabata casi morto, pero awor e ta decididu di vence su obsesion cu cuminda. “Mi no ta bai muri,” el a bisa. “Mi ta bai bringa e cos aki i gana. Lo mi vence anorexia. Lo bai ta difícil, pero mi ta bai hacié.” Abo tambe por!

[Notas]

[Plachi na página 19]

Un dieta balansá i ehercicio moderá por yuda bo controlá bo peso