BESTIA no tin e kapasidat pa hasi loke abo ta hasiendo aworakí: lesa. Un di kada 6 hende no a siña lesa—hopi bes dor ku nan no a haña chèns di bai skol—i di esnan ku sí a siña lesa, hopi no tin kustumber di lesa. Sin embargo, dor di lesa buki bo por biaha bai otro pais, topa hende ku por duna bo hopi eksperensia di bida, i gana konosementu práktiko ku lo yuda bo trata ku e preokupashonnan di bida.

Si un hóben sa lesa bon lo e por siña hopi kos na skol. Esei mes tambe lo yuda determiná e tipo di trabou ku e por haña i e kantidat di ora ku e tin ku traha pa gana su pan. Amanan di kas ku ta lesa bon ta mihó prepará pa kuida nan famia pa loke ta trata nutrishon, higiena i prevenshon di malesa. Asina tambe, mamanan ku ta bon lesadó por tin un influensia hopi positivo riba e desaroyo intelektual di nan yunan.

Klaru ku e benefisio di mas grandi ku ta bini di lesamentu ta ku e por yuda bo “deskubrí e konosementu di Dios.” (Pro. 2:5) E abilidat di lesa ta hunga un ròl den hopi faseta di nos sirbishi na Dios. Na reunionnan di kongregashon e rumannan ta lesa Beibel i publikashonnan basá riba Beibel. Ta prinsipalmente bo manera di lesa ta determiná kon efikas lo bo ta den sirbishi di vèlt. I pa prepará p’e aktividatnan aki bo mester lesa. P’e motibu ei bo kresementu spiritual ta dependé pa un gran parti di bo kustumbernan relashoná ku lesamentu.

Hasi Bon Uso di e Oportunidat

Algun hende ku ta siñando tokante e kamindanan di Dios tin un edukashon limitá, i kisas mester siña nan lesa pa nan por progresá mas lihé den sentido spiritual. Òf talbes nan mester di yudansa personal pa mehorá nan abilidat di lesa. Kaminda e sirkunstansianan ta rekerí esei, kongregashonnan ta purba organisá kursonan di alfabetisashon kaminda hende ta siña lesa i skirbi. Míles di hende a benefisiá mashá di e areglo aki. En bista di e importansia di por lesa bon, tin kongregashon ta hasi areglo pa tene e kursonan pa mehorá lesamentu pareu ku e Skol di Ministerio Teokrátiko. Asta kaminda e kursonan ei no ta disponibel, un persona por hasi bon progreso dor di apartá tempu tur dia pa lesa na bos haltu i dor di asistí i partisipá ku regularidat den e skol.

Lamentablemente, kosnan manera buki di comics i televishon a pone ku hopi hende no tin tempu ni interes pa lesa. Wakmentu di televishon i tiki lesamentu por stroba un persona di desaroyá su abilidat di lesa, di pensa, di rasoná klaramente i di ekspresá su mes bon.

“E esklabo fiel i prudente” ta perkurá publikashonnan ku ta yuda nos komprondé Beibel i ku ta kontené un abundansia di informashon relashoná ku asuntunan spiritual sumamente importante. (Mat. 24:45; 1 Kor. 2:12, 13) Tambe nan ta mantené nos na haltura di desaroyonan mundial importante i nan nifikashon, nan ta yuda nos konosé naturalesa mas mihó i ta siña nos maneranan pa trata ku asuntunan ku ta preokupá nos. Riba tur kos, nan ta konsentrá riba kon pa sirbi Dios i haña su aprobashon. Lesamentu di kosnan saludabel asina lo yuda bo krese komo un persona spiritual.

Klaru ku e echo ku bo por lesa bon, riba su mes no ta un birtut. Mester usa e abilidat ei den e manera korekto. Meskos ku bo mester skohe ku kuidou kiko bo ta kome, asina bo tin ku skohe ku kuidou kiko bo ta lesa. Pakiko lo bo kome kuminda ku no ta nutritivo òf ku ta asta venenoso? Meskos tambe, pakiko lesa informashon, maske ta kos di un ratu, ku por daña bo mente i kurason? Loke bo ta skohe pa lesa mester ta kuadra ku prinsipionan bíbliko. Promé ku bo disidí kiko lo bo lesa, kòrda riba tekstonan bíbliko manera Eklesiástes 12:12, 13; Efesionan 4:22-24; 5:3, 4; Filipensenan 4:8; Kolosensenan 2:8; 1 Huan 2:15-17 i 2 Huan 10.

Lesa ku e Motibu Korekto

Ora nos eksaminá e relatonan di Evangelio nos ta mira bon kla e importansia di lesa ku e motibu korekto. Por ehèmpel, den e Evangelio di Mateo nos ta haña ku Hesus a hasi lidernan religioso bon versá den e Skritura preguntanan manera: “Boso no a lesa?” i “Boso no a lesa nunka?,” promé ku el a duna nan e kontesta bíbliko riba nan preguntanan tramposo. (Mat. 12:3, 5; 19:4; 21:16, 42; 22:31) Un lès ku nos ta siña for di esaki ta ku si e motibu pakiko nos ta lesa no ta bon, nos por saka konklushonnan robes òf keda sin kapta e punto mes. E fariseonan tabata lesa e Skritura pasobra nan a pensa ku mediante dje nan lo a gana bida eterno. Pero manera Hesus a indiká, hende ku no stima Dios i ku no ta aseptá Su medio di salbashon no ta haña e rekompensa ei. (Huan 5:39-43) E intenshon dje fariseonan tabata egoista; p’esei hopi di nan konklushonnan tabata robes.

E motibu mas puru pa lesa Beibel ta amor pa Yehova. E amor ei ta stimulá nos pa siña e boluntat di Dios, pasobra amor ta alegrá “den e bèrdat.” (1 Kor. 13:6) Asta si ántes nos no tabata gusta lesa, stimando Yehova ku ‘henter nos mente’ lo motivá nos pa probechá tur ku tin di nos kapasidat mental pa atkerí e konosementu di Dios. (Mat. 22:37) Amor ta lanta interes, i interes ta stimulá nos pa siña.

Wak Bo Ritmo di Lesa

Lesamentu ta kana samsam ku loke bo ta rekonosé. Aworakí mes ku bo ta lesando, bo ta rekonosé palabra i ta kòrda nan nifikashon. Mas palabra bo por rekonosé ku un solo mirada, mas lihé lo bo por lesa. En bes di para i wak palabra pa palabra, purba wak grupo di palabra. Segun bo ta desaroyá e abilidat aki, lo bo ripará ku bo ta komprondé mas kla loke bo ta lesa.

Sin embargo, ora bo ta lesa informashon mas profundo, bo por saka mas benefisio di bo esfuerso dor di usa un otro método. Ora Yehova a konsehá Hosué relashoná ku lesamentu di e Skritura, el a bis’é: “E buki di lei aki lo no apartá for di bo boka, ma bo mester meditá den dje.” (Hos. 1:8) Ora un persona ta meditá, e ta pensa profundamente; e no tin purá. Si un persona reflekshoná riba loke e ta lesa e ta permití e Palabra di Dios ehersé un mayor influensia riba su mente i kurason. Beibel ta kontené informashon balioso pa esnan ku kier kana den e kamindanan di Yehova. Nos ta haña profesia, konseho, proverbio, poesia, deklarashon di huisio divino, detaye relashoná ku Yehova su propósito i masha hopi ehèmpel di bida real. P’esei ta masha probechoso pa nos lesa Beibel di tal manera ku e ta keda profundamente grabá den nos mente i kurason.

Siña Konsentrá

Segun bo ta lesa, pone bo mes den kada esena ku ta ser deskribí. Purba imaginá kon e personahenan ta, i kiko ta e sintimentunan enbolbí den e eksperensianan ku ta tuma lugá den nan bida. Ta relativamente fásil pa hasi esaki ora nos ta lesa un relato manera esun tokante David i Góliat, ku ta pará skirbí na 1 Samuel kapítulo 17. Pero asta detayenan di Éksodo i Levítiko tokante e konstrukshon di e tabernakel òf kon a establesé e saserdosio lo haña bida si bo visualisá e midínan i e materialnan òf imaginá e holó di e sensia, e grano di roster i e animalnan presentá komo ofrenda kimá. Pensa kon impreshoná esnan ku mester a hasi e trabounan di saserdote lo a keda! (Luk. 1:8-10) Dor di enbolbé bo sentido- i emoshonnan den e manera aki, bo ta kapta e nifikashon di loke bo ta lesando i lo bo kòrd’é mihó.

Pero, tene kuidou ora bo ta lesa pa bo mente no dual. Kisas bo wowonan ta wak e página, pero bo pensamentunan por ta otro kaminda. Bo ta tende muzik ta toka? Televishon ta sendé? Bo famia ta papiando? Si ta posibel, ta mihó bo lesa den un lugá ketu. Pero por sosodé ku e distraishon por bini for di bo mes. Kisas bo tabatin un dia drùk. Ta masha fásil pa keda repasá e aktividatnan di dia den bo mente. Klaru ku ta bon pa kòrda bèk riba e susesonan di dia, pero no ora bo ta lesando. Podisé bo ta kuminsá konsentrá, i asta bo ta hasi un orashon promé ku bo kuminsá lesa. Pero segun bo ta lesa, bo mente ta kuminsá dual. Ora esaki sosodé, obligá bo mes pa konsentrá atrobe riba e informashon ku bo ta lesando. Pokopoko lo bo mira un mehoransa.

Kiko bo ta hasi ora bo topa un palabra ku bo no ta komprondé? Tin biaha e paragraf mes ta definí òf splika palabranan deskonosí. Òf podisé bo por dedusí e nifikashon for di e konteksto. Si no ta asina, tuma tempu pa buska e palabra den un dikshonario, òf marka e palabra pa despues bo puntra un hende e nifikashon. Esaki lo amplia bo vokabulario i yuda bo siña komprondé loke bo ta lesa.

Lesamentu Públiko

Ora apòstel Pablo a bisa Timoteo pa sigui okupá su mes ku lesamentu, Pablo tabata referí spesífikamente na lesamentu p’e benefisio di otro hende. (1 Tim. 4:13; BPK) Lesamentu públiko efikas ta mas ku djis pronunsiá palabra na bos haltu. E lesadó tin ku komprondé e nifikashon di e palabranan i kapta nan sentido, ya ku ta asina so e por transmití e ideanan i e emoshonnan korektamente. Klaru ku esaki ta rekerí bon preparashon i práktika. P’esei Pablo a konsehá: “Okupá bo mes ku lesamentu.” E Skol di Ministerio Teokrátiko lo duna bo entrenamentu balioso relashoná ku e abilidat aki.

Traha Tempu pa Lesa

“E plannan di esun diligente ta resultá sigur den bentaha, pero ken ku ta purá, sigur ta riba kaminda pa haña su mes den nesesidat.” (Pro. 21:5, NW) E palabranan aki ta masha sierto relashoná ku nos deseo pa lesa. Nos lo risibí benefisio òf “bentaha” si nos planea nos kosnan bon pa asina otro aktividatnan no stroba nos di lesa.

Ki ora bo ta lesa? Bo ta preferá lesa mainta trempan? Òf bo mente ta mas kla na otro ora? Si bo por reservá sikiera 15 pa 20 minüt tur dia pa dediká na lesamentu, lo bo keda sorprendí kuantu bo por logra. E klave ta regularidat.

Dikon Yehova a skohe pa laga su propósitonan magnífiko ser skirbí den un buki? Pa hende por konsultá su Palabra skirbí, konsiderá su obranan maravioso, konta esaki na nan yunan i no lubidá loke Dios a hasi. (Sal. 78:5-7) E mihó manera pa demostrá nos apresio pa Yehova su generosidat den e asuntu aki ta dor di okupá nos mes ku lesamentu di su Palabra ku ta duna bida.

BO A yega di opservá hende ora nan ta skohe fruta? Mayoria di nan ta wak su koló i tamaño pa determiná si e ta hechu. Tin hende ta hole e fruta. Otronan ta ful’é òf asta primié. Tambe tin ta pis’é, poniendo un fruta den kada man pa wak kua tin mas djus. Kiko e hendenan aki ta pensa? Nan ta analisá e detayenan, evaluá e diferensianan, kòrda riba otro biahanan ku nan a skohe fruta i kompará loke nan ta mira awor ku loke nan sa kaba. Un rekompensa sukulento ta spera nan si nan skohe bon.

Hende ku ta studia e Palabra di Dios ta haña un rekompensa hopi mas grandi. Ora nos laga tal studio okupá un lugá importante den nos bida, nos fe ta bira mas fuerte, nos amor ta bira mas grandi, nos sirbishi di vèlt ta bira mas produktivo i desishonnan ku nos ta tuma ta duna mayor evidensia di perspikasia i sabiduria divino. Proverbionan 3:15 ta bisa: “Tur loke bo por deseá no ta di kompará ku [e rekompensanan ei].” Abo ta disfrutando di tal rekompensa? Esei ta dependé di e manera ku bo ta studia.—Kol. 1:9, 10.

Kiko kier men studia? E ta mas ku lesa aribariba. E ta enserá usa bo kapasidat mental pa eksaminá un tema kuidadosamente òf pa basta ratu. E ta inkluí analisá loke bo ta lesa, kompar’é ku loke bo sa kaba i wak ta kiko ta e motibunan tras di sierto deklarashon. Ora bo ta studia, bo tin ku pensa profundamente riba ideanan ku bo topa ku kisas ta nobo pa bo. Konsiderá tambe kon lo bo por apliká konseho bíbliko mas plenamente. Komo Testigu di Yehova, lo bo kier pensa tambe riba oportunidatnan pa usa e informashon pa yuda otro hende. Ta bisto anto ku studia ta enserá meditashon.

E Aktitut Korekto

Ora bo ta prepará pa studia, bo ta pone bo Beibel bo dilanti huntu ku e publikashonnan ku bo tin pensá di usa, un pòtlot òf pèn, i kisas un blòknot òf skref. Pero bo ta prepará bo kurason? Beibel ta bisa nos ku Èsdras “a dediká su kurason [“a prepará su kurason,” segun un tradukshon hopi eksakto di e teksto na e idioma original] pa studia e lei di SEÑOR i pa pon’é na práktika, i pa siña e hendenan di Israel su statutonan i ordenansanan.” (Èsd. 7:10) Kiko prepará bo kurason ta enserá?

Orashon ta yuda nos mira studiamentu di e Palabra di Dios ku un aktitut korekto. Nos kier pa e instrukshon ku Yehova ta duna nos yega te na nos kurason, e loke nos ta di paden. Na prinsipio di kada seshon di studio, pidi Yehova p’e yudansa di su spiritu. (Luk. 11:13) Pidié yuda bo komprondé e nifikashon di loke bo ta bai studia, kiko e tin di haber ku su propósito, kon e por yuda bo distinguí entre bon i malu, kon bo mester apliká su prinsipionan den bo bida, i ki efekto e informashon tin riba bo relashon kuné. (Pro. 9:10) Segun bo ta studia, sigui “pidi Dios” sabiduria. (Sant. 1:5) Evaluá bo mes onestamente a base di loke bo ta siña, i pidi Yehova yuda bo deshasí di pensamentunan robes i di mal deseo. Semper gradisí Yehova pa e kosnan ku e ta revelá. (Sal. 147:7) E manera di studia aki huntu ku orashon ta hiba na un amistat mas será ku Yehova, ya ku nos lo sinti nos motivá pa obedesé loke e ta bisa nos via su Palabra.—Sal. 145:18.

E aktitut reseptivo ei ta distinguí e pueblo di Yehova for di hopi hende di e mundu aki. Hende ku no ta deboto na Dios tin e kustumber di kuestioná i duda di tur loke ta pará skirbí. Pero esei no ta nos aktitut. Nos ta konfia Yehova. (Pro. 3:5-7) Si nos no ta komprondé un kos, nos no ta asumí sin buska drechi ku e kos mester ta robes. Miéntras ku nos ta buska e kontesta, nos ta warda riba Yehova. (Mik. 7:7) Meskos ku Èsdras, nos tin e meta di práktika loke nos ta siña nos mes i loke nos ta instruí otro hende. Si nos tin e inklinashon di kurason ei, nos lo haña hopi rekompensa for di nos studio.

Kon pa Studia

En bes di djis kuminsá ku paragraf 1 i sigui te final, tuma tempu promé pa tira un bista riba henter e artíkulo òf kapítulo. Awor analisá e palabranan di e título. Esaki ta e tema di loke bo ta bai studia. Kaba tuma bon nota di e manera ku e suptemanan ta konektá ku e tema. Si tin plachi, i tambe tabèl òf kuadro di repaso ku ta kompañá e artíkulo, analisá nan. Puntra bo mes: ‘Basá riba e análisis preliminar aki, kiko mi ta spera di siña? Den ki manera lo e benefisiá mi?’ Asina bo ta haña un idea den ki direkshon bo studio ta bai.

Awor bo ta bai determiná kua ta e datonan importante. Artíkulonan di studio di E Toren di Vigilansia, i tambe algun buki, tin pregunta na pia di e página. Segun ku bo ta lesa kada paragraf, ta bon pa marka e kontestanan. Asta ora no tin pregunta di studio, tòg bo por marka puntonan importante ku bo kier kòrda. Si bo topa un punto ku ta nobo pa bo, dediká mas tempu na dje pa hasi sigur ku bo ta komprond’é bon. Paga tinu riba e komparashonnan òf forma di rasoná ku lo bo por usa bon den sirbishi di vèlt òf den un diskurso òf parti ku bo ta bai tin. Pensa na ken spesífikamente lo bo por splika lokual bo ta studiando pa asina fortifiká su fe. Marka e puntonan ku bo kier usa, i repasá nan na final di bo studio.

Segun bo ta konsiderá e informashon, buska e tekstonan menshoná. Analisá kiko kada teksto tin di haber ku e punto prinsipal di e paragraf.

Kisas bo ta topa puntonan ku bo no ta komprondé mesora òf ku lo bo tin gana di analisá mas en detaye. En bes di laga nan desviá bo, hasi un anotashon pa bo studia nan despues. Hopi bes sierto puntonan ta ser klarifiká den e paragrafnan ku ta sigui. Si esei no ta e kaso, bo por investigá nan mas a fondo. Kua ta e kosnan ku bo por anotá pa investigá? Kisas tin un teksto sitá ku bo no ta komprondé bon kiko e ta nifiká òf kiko e tin di haber ku e tema. Òf podisé bo ta sinti ku bo ta komprondé sierto idea, pero no sufisiente bon pa splik’é na un otro hende. En bes di djis pasa riba esakinan, lo ta sabí si bo investigá nan despues ku bo kaba ku loke bo a kuminsá studia.

Ora apòstel Pablo a skirbi su karta detayá na e kristiannan hebreo, el a pousa na mitar di e karta pa bisa: “E punto prinsipal di loke a wòrdu bisá ta esaki.” (Heb. 8:1) Abo tambe sa reflekshoná asina de bes en kuando riba loke bo ta studiando? Wak dikon Pablo a hasi esei. Den e kapítulonan anterior di su karta inspirá, el a mustra kaba ku Kristu a drenta den shelu komo Dios su gran Sumo Saserdote. (Heb. 4:14–5:10; 6:20) Sin embargo, dor di resaltá i enfatisá e punto prinsipal ei na prinsipio di kapítulo 8, Pablo a prepará mente di su lektornan pa pensa profundamente riba kon esaki ta toka nan bida. El a señalá ku Kristu a presentá dilanti Dios na nan fabor i a habri e kaminda pa nan mes por drenta den e “lugá santu” ei. (Heb. 9:24; 10:19-22) E echo ku nan speransa ta garantisá lo yuda motivá nan pa pone na práktika e otro konsehonan ku e karta aki a kontené tokante fe, perseveransia i kondukta kristian. Di igual manera, si ora nos ta studia nos konsentrá riba e puntonan prinsipal, nos lo kapta kon e tema ta desaroyá i lo graba den nos mente e motibunan sólido pa aktua na armonia ku loke ta ser spliká.

Bo studio personal lo motivá bo pa aktua? Esaki ta un pregunta importante. Ora bo siña un kos, puntra bo mes: ‘Ki efekto e informashon aki mester tin riba mi aktitut i mi metanan den bida? Kon mi por pon’é na práktika ora di solushoná un problema, tuma un desishon òf alkansá un meta? Kon mi por us’é den mi bida di famia, den sirbishi di vèlt òf den kongregashon?’ Konsiderá e preguntanan aki huntu ku orashon, i pensa riba situashonnan real den kua bo por hasi uso di bo konosementu.

Na final di un kapítulo òf artíkulo, hasi un repaso kòrtiku. Wak si bo ta kòrda e puntonan prinsipal i e argumentunan ku ta apoyá esakinan. E paso aki lo yuda bo keda kòrda e informashon pa bo por us’é despues.

Kiko Bo Por Studia

Komo e pueblo di Yehova, nos tin hopi kos di studia. Pero unda nos mester kuminsá? Ta bon pa tur dia nos studia e teksto bíbliko i komentario for di Eksaminando e Skritura Diariamente. Si nos prepará pa nos reunionnan di kongregashon semanal, nos lo saka mayor benefisio di nan. Fuera di esaki, tin ruman ku a dediká nan tempu na un manera sabí pa studia algun di nos publikashonnan kristian ku a ser imprimí promé ku nan a siña e bèrdat. Otro rumannan ta skohe algun versíkulo di nan lesamentu semanal di Beibel i ta hasi un studio mas profundo di nan.

Pero kiko si bo sirkunstansia no ta permití bo studia a fondo tur e informashon ku lo ser konsiderá na reunionnan semanal di kongregashon? No kai den e trampa di pasa purá dor di e informashon djis pa bisa ku bo a hasié òf, pió ainda, keda sin studia mes pasobra tòg lo bo no por studia tur kos. En bes di esei, determiná kuantu bo por studia, i hasié bon. Hasié tur siman. Ku tempu, purba amplia bo studio pa inkluí e otro reunionnan.

“Traha Bo Kas”

Yehova sa ku kabesnan di famia tin ku traha duru pa mantené nan sernan kerí. Proverbionan 24:27 ta bisa: “Prepará bo trabou pafó, pone tur kos kla pa bo mes den kunuku.” Sin embargo, bo no por pasa por haltu di e nesesidatnan spiritual di bo famia. P’esei e versíkulo ta sigui bisa: “Despues traha bo kas,” es desir, bo famia di kas. Kon kabesnan di famia por hasi esaki? Proverbionan 24:3 ta bisa: ‘Ku komprondementu e kas [òf famia] ta wòrdu establesí.’

Kon komprondementu por benefisiá bo hendenan di kas? komprondementu ta ora bo por wak mas ayá di loke ta bisto. P’esei nos por bisa ku pa bo kuminsá un bon studio di famia, bo tin ku studia (òf analisá) bo famia promé. Kon bo miembronan di famia ta progresá den sentido spiritual? Skucha ku atenshon ora bo ta kòmbersá ku nan. Nan sa keha hopi òf karga renkor? Ta metanan materialista ta e kos mas importante? Ora bo sali den sirbishi di vèlt ku bo yunan, nan ta sinti nan kómodo ora di identifiká nan mes komo Testigu di Yehova dilanti mucha di nan mes edat? Nan ta gusta boso programa di lesa i studia Beibel huntu komo famia? Realmente nan ta hasiendo e kaminda di Yehova nan estilo di bida? Opservashon kuidadoso lo revelá kiko abo, komo kabes di famia, tin ku hasi pa por inkulká i edifiká kualidatnan spiritual den kada miembro di famia.

Buska artíkulonan den E Toren di Vigilansia i Spièrta! ku ta trata ku nesesidatnan spesífiko. Anto laga bo famia sa di antemano kiko boso lo bai studia di manera ku nan por pensa riba e informashon. Mantené un ambiente di amor durante e studio. Enfatisá e balor di loke ta ser konsiderá i hasi aplikashon spesífiko na e nesesidatnan di bo famia sin skual òf brongosá niun miembro. Sòru pa nan tur partisipá i yuda nan mira ku e Palabra di Yehova ta “perfekto,” pasobra e ta perkurá presis loke nos mester den bida.—Sal. 19:7.

Kosechando e Rekompensanan

Hende opservadó ku no tin komprondementu spiritual por studia universo, susesonan mundial i asta nan mes, i tòg keda sin kapta e berdadero nifikashon di loke nan ta mira. Di otro banda, ku yudansa di Dios su spiritu, hende ku ta studia e Palabra di Dios regularmente por ripará den e kosnan aki obranan ku Dios a krea, kumplimentu di profesia bíbliko i e desaroyo di Dios su propósito pa bendishoná hende obediente.—Mar. 13:4-29; Rom. 1:20; Rev. 12:12.

Pa maravioso ku esei ta, nos no tin nodi bira orguyoso. Mas bien, un eksaminashon diario di e Palabra di Dios ta yuda nos keda humilde. (Deu. 17:18-20) Tambe esei ta protehá nos kontra “e engaño di piká” pasobra si nos stima e Palabra di Dios di kurason, nos lo tin ménos chèns di kai pa e atrakshon di piká. (Heb. 2:1; 3:13; Kol. 3:5-10) Pues, nos lo ‘kana na un manera digno di Yehova pa agrad’é den tur sentido, dunando fruta den tur bon obra.’ (Kol. 1:10) Ta ku e meta ei nos ta studia e Palabra di Dios, i nos mayor rekompensa ta di por logra den esei.