1-3. (a) Dikon Hosue ta un bon ehèmpel pa nos? (b) Kiko nos mester keda kòrda ora nos tin ku tuma desishon?

“SKOHE” ta un palabra hopi importante. Ora un persona por skohe, esei ta indiká ku e tin vários opshon i ku, te na sierto grado, e por kontrolá e rumbo ku su bida lo sigui. Por ehèmpel, pensa riba un hòmber ku ta kana i diripiente e ta ripará ku e kaminda ta splet bai den dos direkshon diferente. Kua direkshon lo e skohe? Si e hòmber tin un destinashon na mente, lo e skohe probablemente esun ku ta hib’é mas serka di e kaminda ku e ke bai, en bes di e otro ku lo hib’é mas leu for di einan.

² Den Beibel tin hopi ehèmpel di hende ku a haña nan den un situashon similar. Por ehèmpel, Kain tabatin ku disidí si lo el a kontrolá su rabia òf nò. (Gén. 4:6, 7) Hosue mester a skohe si lo el a sigui sirbi e Dios berdadero òf bai adorá dios falsu. (Hos. 24:15) Hosue su meta tabata pa keda serka di Yehova. Pues, el a skohe e kaminda ku lo a hib’é den e direkshon ei. Kain no tabatin e meta ei, pues el a skohe e kaminda ku a aleh’é for di Yehova.

³ Tin biaha nos tambe tin ku skohe entre dos opshon. Den tal kaso, kòrda kiko ta bo destinashon òf meta: laga tur loke bo ta hasi trese gloria pa Yehova i evitá kualke kos ku lo alehá bo for di dje. (Lesa Hebreonan 3:12.) Den e artíkulo akí i esun siguiente, nos lo analisá shete área di bida den kua nos no mester laga nada alehá nos for di Yehova.

TRABOU I KARERA

4. Dikon ta importante pa nos traha pa nos pan di kada dia?

⁴ Kristiannan tin e obligashon di traha pa mantené nan mes i nan famia. Beibel ta mustra ku si un hende no ke perkurá pa su hendenan di kas, e ta pió ku un persona sin fe. (2 Tes. 3:10; 1 Tim. 5:8) Pues, ta bisto ku trabou ta un parti importante di bida, pero si bo no tene kuidou, bo trabou i karera lo por alehá bo for di Yehova. Kon asina?

5. Kua ta algun faktor importante ku bo mester tuma na kuenta promé ku bo aseptá un trabou?

⁵ Suponé ku bo ta buska trabou. Si bo ta biba den un pais kaminda trabou ta skars, lo bo por sinti e tentashon pa aseptá kualke trabou ku nan ofresé bo. Pero kiko si e tipo di trabou ei no ta kuadra ku prinsipionan di Beibel? Kiko si e orario di trabou, e kareda ku bo tin ku kore pa yega trabou òf e biahamentu pa trabou lo stroba bo di partisipá den aktividatnan kristian òf di pasa tempu ku bo famia? Lo bo mester tuma e trabou numa, pensando ku maske e no ta kumbiní bo, e ta mihó ku nada? No lubidá ku si bo skohe e kaminda robes, esei por alehá bo for di Yehova. (Heb. 2:1) Sea ku bo ta buskando trabou òf bo tin pensá di kambia di trabou, kon bo por tuma un desishon sabí?

6, 7. (a) Ku ki meta un persona lo por aseptá un trabou? (b) Ki meta lo hiba bo mas serka di Yehova, i dikon?

⁶ Manera nos a menshoná anteriormente, semper kòrda kiko ta bo destinashon òf meta. Puntra bo mes: ‘Kiko mi ke logra ku mi trabou òf karera?’ Si bo ta konsiderá bo trabou simplemente komo un medio pa logra un meta, esta, pa mantené abo ku bo famia den Yehova su sirbishi, Yehova lo bendishoná bo esfuerso. (Mat. 6:33) Yehova lo no keda tur tolondrá, sin sa kiko pa hasi, si bo mester pèrdè trabou òf si diripiente e situashon ekonómiko bira malu. (Isa. 59:1) Beibel ta bisa ku e “sa kon pa libra hende deboto na dje for di prueba.”—2 Ped. 2:9.

⁷ Di otro banda, kiko si bo ta traha ku e meta pa bira riku? Kisas lo bo logra esei. Pero asta si bo logra, no lubidá ku lo bo tin ku paga karu pa e “éksito” ei; e tin un preis ku bo no por afòrt. (Lesa 1 Timoteo 6:9, 10.) Si rikesa i trabou ta e kos di mas importante den bo bida, lo bo logra un kos so: alehá bo mes for di Yehova.

8, 9. Kiko mayornan mester puntra nan mes relashoná ku nan trabou òf karera? Splika dikon.

⁸ Si bo ta un mayor, pensa riba ki efekto bo ehèmpel lo tin riba bo yunan. Kiko nan ta mira ku ta e kos di mas importante pa bo? Bo karera òf bo amistat ku Yehova? Si nan ta mira ku loke ta bini na promé lugá den bo bida ta posishon, prestigio i rikesa, bo no ta kere ku nan lo imitá bo i sigui e kaminda desastroso ei? Òf ku nan lo por pèrdè rèspèt pa bo komo mayor? Un mucha muhé kristian a bisa: “Te asina leu ku mi ta kòrda, semper mi tata tabata masha okupá ku su trabou. Na prinsipio, tabata parse ku el a traha asina duru pasobra e tabata ke pa nos famia tin lo mihó. E tabata ke pa nos ta bon kuidá. Pero den e último añanan algu a kambia. E ta blo traha i traha, anto ta kumpra kos di luho en bes di kos ku ta nesesario. Komo resultado, nos ta konosí komo e famia ku tin hopi plaka i no komo e famia ku ta animá otronan pa alkansá metanan spiritual. Lo mi a preferá mil biaha ku mi tata tabata duna mi apoyo spiritual en bes di plaka.”

⁹ Mayornan, no pone demasiado énfasis riba boso karera i asina alehá boso mes for di Yehova. Sea un ehèmpel pa boso yunan. Mustra nan ku boso di bèrdat ta kere ku e rikesa di mas grandi ku nos por tin ta rikesa spiritual, esta, un bon relashon ku Yehova, i no plaka òf kos material.—Mat. 5:3.

10. Kiko un hóben mester pensa ariba promé ku e skohe un karera òf e tipo di trabou ku lo e bai hasi?

¹⁰ Si bo ta un hóben ku ta pensando riba un karera òf e tipo di trabou ku lo bo ke hasi ora bo bira grandi, kon bo por skohe e kaminda korekto? Manera nos a konsiderá kaba, bo tin ku sa promé kiko bo ke hasi ku bo bida, kua rumbo bo ke bai. E estudio i trabou ku bo ke skohe lo duna bo oportunidat pa partisipá mas plenamente den aktividatnan di Reino, òf lo e alehá bo for di Yehova? (2 Tim. 4:10) Bo meta ta pa imitá e estilo di bida di e hendenan di mundu kende nan felisidat ta dependé di e kantidat di sèn ku nan tin na banko òf di e situashon di e merkado finansiero? Òf lo bo skohe pa imitá e konfiansa ku David tabatin den Yehova? David a skirbi: “Mi tabata yòn, i awor mi ta bieu; ma nunka mi no a mira e hustu desampará, ni su desendientenan ta pidi pan.” (Sal. 37:25) Kòrda: Un kaminda lo alehá bo for di Yehova, miéntras ku e otro lo hiba bo na e mihó bida ku lo bo por tin. (Lesa Proverbionan 10:22; Malakías 3:10.) Kua lo bo skohe?a

REKREO I DIBERTISHON

11. Kiko Beibel ta rekonosé tokante rekreo i dibertishon, pero kiko nos mester keda kòrda?

¹¹ Beibel no ta kontra pa hende dibertí, ni e no ta pinta rekreo i dibertishon komo pèrdèmentu di tempu. Pablo a bisa Timoteo: “Entrenamentu físiko ta yuda ku algu.” (1 Tim. 4:8) Beibel ta asta bisa ku tin “un tempu pa hari” i “un tempu pa baila,” i e ta stimulá hende pa reservá un tempu rasonabel pa sosegá. (Ekl. 3:4; 4:6) Pero si bo no tene kuidou, rekreo i dibertishon por alehá bo for di Yehova. Kon asina? E peliger ta dependé prinsipalmente di dos aspekto: Ki tipo di rekreo i dibertishon bo ta skohe i kuantu tempu bo ta dediká na nan.

12. Ki faktornan bo mester tuma na kuenta relashoná ku e tipo di rekreo i dibertishon ku bo ta skohe?

¹² Promé, laga nos analisá e tipo di rekreo i dibertishon ku nos mester skohe. Un kos ta sigur, bo por haña formanan sano di rekreo i dibertishon. Pero ta bèrdat tambe ku gran parti di loke ta disponibel den mundu ta glorifiká kosnan ku Dios ta odia, entre otro, violensia, spiritismo i relashon seksual inmoral. Pues, bo tin ku tene kuidou ki tipo di rekreo i dibertishon bo ta skohe. Pensa riba e preguntanan akí: Ki efekto e tin riba mi? E ta stimulá un spiritu violento, kompetitivo òf nashonalista? (Pro. 3:31) E ta kosta mi muchu plaka? E por pone hende trompeká? (Rom. 14:21) Ku ki tipo di hende e ta pone mi asosiá? (Pro. 13:20) E ta duna mi gana di hasi malu?—Sant. 1:14, 15.

13, 14. Kiko bo mester tuma na kuenta relashoná ku e kantidat di tempu ku bo ta dediká na aktividatnan di rekreo?

¹³ Pensa tambe riba e kantidat di tempu ku bo ta dediká na rekreo i dibertishon. Puntra bo mes: ‘Mi ta dediká asina tantu tempu na aktividatnan di rekreo ku kasi mi no ta sobra tempu pa aktividatnan spiritual?’ Si bo ta dediká muchu tempu na rekreo i dibertishon, lo bo ripará ku tòg bo no ta disfrutá dje tantu ei di nan manera mester ta. De echo, hende ku ta tene dibertishon na su debido lugá ta disfrutá mas di dje. Dikon? Pasobra nan sa ku nan a atendé “e kosnan mas importante” promé, pues nan no tin nodi di sinti nan kulpabel ora nan ta dibertí.—Lesa Filipensenan 1:10, 11.

¹⁴ Aunke ta parse dushi si bo por dediká hopi tempu na aktividatnan di rekreo, e kaminda ei lo por alehá bo for di Yehova. Kim, un ruman muhé di 20 aña, a siña esei di eksperensia. El a konta kon e tabata bai tur fiesta ku tin. Tur wikènt tabatin un kos spesial: djabièrnè, djasabra i djadumingu. Pero awor e ta mira ku tin asina tantu kos di hasi ku ta muchu mas importante. E di: “Por ehèmpel, komo pionero, mi ta lanta 6 or di mainta pa bai sirbishi di vèlt, pues mi no por keda serka mi amigunan te 1 or òf 2 or di mardugá. Mi sa ku no ta tur aktividat sosial ta malu, pero nan por kita tur bo atenshon for di loke ta mas importante. Meskos ku tur otro kos, mester tene nan na nan debido lugá.”

15. Kon mayornan por yuda nan yunan disfrutá di rekreo refreskante?

¹⁵ Mayornan tin e responsabilidat di perkurá pa nan mes i pa nan yunan den sentido material, spiritual i emoshonal. Esei ta enserá perkurá pa nan por distraí nan mente. Si bo ta un mayor, no sea un ‘aguafiestas’ ku ta konsiderá tur rekreo komo algu malu. Pero na mesun tempu, bo tin ku keda alerta pa influensianan perhudisial. (1 Kor. 5:6) Ku bon planiamentu, bo por haña rekreo i dibertishon ku di bèrdat ta refreská bo famia.b Di e manera ei, abo ku bo yunan lo skohe e kaminda ku lo hiba boso mas serka di Yehova.

RELASHON DI FAMIA

16, 17. Ki situashon doloroso hopi mayor ta enfrentá, i kon bini nos sa ku Yehova ta komprondé nan doló?

¹⁶ E laso entre mayor i yu ta asina fuerte ku Yehova ta usa e relashon ei pa ilustrá e amor ku e tin pa su pueblo. (Isa. 49:15) Pues, ta normal pa sinti un tristesa profundo ora un miembro di famia bandoná Yehova. Un ruman muhé, kende su yu muhé a ser ekspulsá, a konta: “Mi a keda hopi kibrá. Mi tabata blo puntra mi mes, ‘Dikon el a bandoná Yehova?’ Mi tabata sinti ku ta mi falta.”

¹⁷ Si bo ta pasando den un situashon asina, Yehova ta komprondé bo doló. E mes tambe “tabata tristu den su kurason” ora ku e promé miembro di su famia humano, i despues mayoria di hende ku a biba promé ku Diluvio, a rebeldiá kontra dje. (Gén. 6:5, 6) Kisas ta difísil pa un hende ku nunka a pasa den e situashon ei komprondé ki teribel esei por ta. Sinembargo, lo no ta sabí pa laga e mal kondukta di un miembro di famia ekspulsá pone abo alehá for di Yehova. Pues, kon bo por perseverá apesar di e tristesa profundo ku bo ta sinti ora un miembro di famia bandoná Yehova?

18. Dikon mayornan no mester kulpa nan mes ora un yu bandoná Yehova?

¹⁸ No kulpa bo mes pa loke a pasa. Yehova a pone dilanti di kada persona e opshon di skohe, di tuma nan propio desishon, i kada miembro di famia dediká i batisá tin ku “karga su propio karga di responsabilidat.” (Gal. 6:5) Na final di kuenta, Yehova ta tene e pekadó—no abo—responsabel pa loke el a skohe. (Eze. 18:20) No kulpa otro hende tampoko. Respetá e manera ku Yehova ta disipliná su pueblo. Tuma bo posishon kontra Diabel, no kontra e wardadónan ku ta tuma medida pa protehá e kongregashon.—1 Ped. 5:8, 9.

19, 20. (a) Kon mayornan di yunan ekspulsá por trata ku nan tristesa? (b) Ki speransa e mayornan ei por karga?

¹⁹ Di otro banda, kiko lo pasa si bo rabia ku Yehova pa loke a pasa ku bo yu? Esei lo alehá bo for di Yehova. Pero loke en realidat bo ser kerí mester mira ta bo determinashon firme di pone Yehova promé ku tur kos, inkluso promé ku laso di famia. Pues pa trata ku e situashon, sòru di konserbá bo spiritualidat. No isolá bo mes for di bo fiel rumannan kristian. (Pro. 18:1) Deshogá bo serka Yehova den orashon. (Sal. 62:7, 8) No buska èksküs pa asosiá ku un miembro di famia ekspulsá, por ehèmpel, via sms, telefòn òf e-mail. (1 Kor. 5:11) Keda okupá den aktividatnan spiritual. (1 Kor. 15:58) E ruman muhé sitá anteriormente a bisa: “Mi sa ku mi mester keda okupá den e sirbishi di Yehova i mantené mi mes spiritualmente fuerte ya ora mi yu muhé bini bèk serka Yehova lo mi ta den e posishon pa yud’é.”

²⁰ Beibel ta bisa ku amor ta “spera tur kos.” (1 Kor. 13:4, 7) Pues, no tin nada malu den karga e speransa ku bo ser kerí lo bini bèk serka Yehova. Tur aña, hopi persona ekspulsá ta arepentí i bini bèk na Yehova su organisashon. Yehova no ta keda rabiá ku nan despues ku nan arepentí. Al kontrario, e ta “kla pa pordoná.”—Sal. 86:5.

SKOHE SABÍ

21, 22. Den ki manera bo ta determiná pa usa bo libertat di skohe?

²¹ Yehova a krea hende ku libertat di skohe, esta, boluntat liber. (Lesa Deuteronomio 30:19, 20.) Pero e libertat ei ta nifiká ku nos tin un responsabilidat serio. Kada kristian mester puntra su mes: ‘Riba kua kaminda mi ta? Mi a laga trabou i karera, rekreo i dibertishon òf laso di famia alehá mi for di Yehova?’

²² Yehova nunka ta stòp di stima su pueblo. E úniko kos ku lo por alehá nos for di Yehova ta si nos skohe pa sigui un mal kaminda. (Rom. 8:38, 39) Pero esei no tin nodi di sosodé! Sea determiná pa no laga nada alehá bo for di Yehova. E siguiente artíkulo lo trata kuater área di bida mas den kua bo por demostrá e determinashon ei.

1, 2. (a) Ki ‘triki’ Satanas ta usa? (b) Kiko lo yuda nos hala serka Dios?

YEHOVA DIOS a krea hende ku e nesesidat di tin un amistat íntimo kuné. Pero Satanas ke pa nos pensa meskos ku e ta pensa, esta, ku nos no tin mester di Yehova. Esei ta un mentira ku Satanas a usa pa gaña Eva den hòfi di Edén i ku te awe e ta fomentá. (Gén. 3:4-6) Atraves di historia, gran parti di humanidat a kometé e mesun fayo ku Eva i pensa ku nan no tin mester di Dios.

² Felismente, nos no tin nodi di kai den e trampa ei di Satanas, ya ku “su trikinan no ta deskonosí pa nos.” (2 Kor. 2:11) Satanas ta purba di pone nos tuma mal desishon ku lo alehá nos for di Yehova. Pero manera e artíkulo anterior a mustra, nos por hasi e eskoho korekto pa loke ta trata trabou, rekreo i asuntunan di famia. Den e artíkulo akí nos lo bai mira ku si nos tene teknologia, salú, plaka i orguyo na nan debido lugá, nos lo “hala serka Dios.”—Sant. 4:8.

TEKNOLOGIA

3. Duna algun ehèmpel ku ta mustra kon hende por usa teknologia pa hasi loke ta bon òf loke ta malu.

³ Rònt mundu, kòmpiuter i otro aparatonan elektróniko sofistiká a bira parti di bida diario. Si nos usa nan na e manera korekto, nan por ta hèrmèntnan útil. Si nos hasi mal uso di nan, nan por stroba nos relashon ku nos Tata selestial. Laga nos tuma por ehèmpel kòmpiuter. Ta ku yudansa di kòmpiuter a skirbi i publiká e revista ku bo ta lesando akí. Un kòmpiuter por ta un hèrmènt útil pa hasi investigashon i pa komunikashon, i tin biaha, asta pa dibertishon refreskante. Pero nos por bira opseshoná tambe ku teknologia di kòmpiuter. Propagandanan ingenioso ta konvensé hende ku nan mester tin e modèl di mas nobo. Un mucha hòmber tabatin asina tantu gana di haña un sierto marka di kòmpiuter tablet ku sin bisa ningun hende nada el a bai bende un di su nirnan pa e por a kumpr’é! Bo no ta haña ta tristu?

4. Kiko un ruman a hasi pa e por a stòp di dediká demasiado tempu na kòmpiuter?

⁴ Ta mas tristu ainda si nos sakrifiká nos amistat íntimo ku Yehova pa motibu di teknologia, sea pasobra nos ta dediká demasiado tempu na dje òf ta hasi mal uso di dje. Jon,a un ruman hòmber di kasi 30 aña di edat, a bisa: “Mi sa ku Beibel ta bisa ku nos mester ‘kumpra e tempu stipulá’ pa asuntunan spiritual. Pero ora ta trata di kòmpiuter, ta mi mes ta mi pió enemigu.” Hopi biaha Jon tabata keda te anochi lat riba Internet. El a sigui konta: “Mas kansá mi tabata, mas duru tabata pa mi stòp di chat òf di wak vidionan kòrtiku, tin biaha vidio ku no tabata ni sano.” Pa Jon por a kibra ku e mal kustumber akí, el a programá su kòmpiuter pa paga di su mes na momento ku tabata ora pa e bai drumi.—Lesa Efesionan 5:15, 16.

5, 6. (a) Ki responsabilidat mayornan tin pa ku nan yunan? (b) Kon mayornan por hasi sigur ku nan yunan tin bon asosiashon?

⁵ Mayornan, boso no tin nodi di kontrolá delaster un kos ku boso yunan ta hasi, pero boso tin ku supervisá sí nan uso di kòmpiuter. No laga nan pa nan kuenta te ku nan por subi websitenan kaminda tin inmoralidat, weganan di vidio violento, spiritismo i mal asosiashon, djis pa tene nan okupá, ya nan no ta molestiá boso. Si boso hasi esei, boso yunan lo por pensa: ‘Ata Papi ku Mami no ta wòri, ke men no tin nada malu den esaki.’ Komo mayor, boso tin e responsabilidat di protehá boso yunan—inkluso esnan tiner—kontra kualke kos ku lo por alehá nan for di Yehova. Asta bestia ta protehá nan yunan kontra peliger. Djis imaginá kiko un mama ber lo hasi si un hende ta forma un menasa pa su yunan!—Kompará ku Oséas 13:8.

⁶ Yuda boso yunan buska asosiashon ku otro rumannan kristian ehemplar di tur edat. I no lubidá ku e kos ku mas boso yunan tin mester di dje ta di pasa tempu ku boso! Pues, traha tempu pa hari, hunga, traha i “hala serka Dios” huntu ku boso yunan.b

SALÚ

7. Dikon nos tur ke keda salú?

⁷ “Kon ta ku bo kurpa?” E pregunta komun ei ta reflehá un realidat tristu: Nos tur ta bira malu, ya ku nos promé mayornan a permití Satanas alehá nan for di Yehova. Malesa ta kumbiní e propósito di Satanas, pasobra ora nos ta malu, ta mas difísil pa nos sirbi Yehova. Anto si nos muri, nos no por sirbié mes. (Sal. 115:17) Ta natural anto ku nos ke hasi loke nos por pa keda salú.c Ademas, nos mester ta interesá den e salú i bienestar di nos rumannan.

8, 9. (a) Kon nos por evitá di bai den ekstremo ku asuntunan di salú? (b) Kiko ta e benefisionan di kultivá goso?

⁸ Pero ta importante pa nos evitá di bai den ekstremo. Tin ruman ta promové sierto dieta, tratamentu pa salú òf produkto di beyesa ku masha entusiasmo mes, asta ku mas entusiasmo ku nan ta prediká e bon notisia di e Reino di Dios. Podisé nan ta kere sinseramente ku nan ta yudando otro hende. Asta si ta asina, no ta apropiá pa nos promové produkto- òf tratamentunan pa salú òf di beyesa promé òf despues di reunion na Salòn di Reino, asamblea òf kongreso. Dikon nò?

⁹ Pasobra nos ta reuní huntu pa konsiderá asuntunan spiritual i pa oumentá nos goso, ku ta fruta di Dios su spiritu santu. (Gal. 5:22) Si nos ta usa okashonnan asina pa ofresé konseho i produkto pa salú—sea ku hende a pidi nos òf nò—esei por rebahá e propósito spiritual di e reunion i pone otro ruman pèrdè nan goso. (Rom. 14:17) Ta keda na kada ken pa disidí kon e ta atendé su asuntunan di salú. Ademas, ningun hende no tin un kura pa tur malesa. Asta e mihó dòkternan ta bira bieu, bira malu i ku tempu ta muri. I demasiado preokupashon ku salú no ta hiba na un bida mas largu. (Luk. 12:25) Di otro banda, Beibel ta bisa ku “un kurason kontentu ta un bon remedi.”—Pro. 17:22.

10. (a) Kiko ta hasi un hende bunita den bista di Yehova? (b) Kon nos por tin e mihó salú posibel?

¹⁰ Asina tambe ta na su lugá pa ta interesá den nos aparensia. Pero nos no tin nodi di hasi kosnan ekstremo pa eliminá tur señal di behes. E señalnan ei por ta prueba di madures, dignidat i beyesa interno. Por ehèmpel, Beibel ta bisa ku “kabei blanku ta un korona di gloria; den e kaminda di hustisia e ta wòrdu hañá.” (Pro. 16:31) Asina Yehova ta mira nos, i nos mester purba di mira nos mes manera e ta mira nos. (Lesa 1 Pedro 3:3, 4.) En bista di esei, lo ta sabí pa nos riska hasi un operashon òf tratamentu médiko innesesario i kisas peligroso djis pa hasi nos mes físikamente mas atraktivo? No ta importá kuantu aña nos tin òf kon salú nos ta; ta ‘e goso di Yehova’ ta e fuente di berdadero beyesa ku ta bria sali for di e persona ku nos ta di paden. (Neh. 8:10) Ta te den e mundu nobo numa nos lo ta kompletamente salú i nos lo rekobrá nos beyesa di hubentut. (Yòb 33:25; Isa. 33:24) Mientrastantu, nos tin ku tuma desishon sabí i demostrá fe den e promesanan di Yehova. Esaki lo yuda nos keda serka di Yehova i disfrutá di nos bida aktual te kaminda nos sirkunstansianan ta permití.—1 Tim. 4:8.

PLAKA

11. Kon plaka por bira un trampa?

¹¹ Plaka no ta malu riba su mes, i no tin nada malu den hasi negoshi onesto. (Ekl. 7:12; Luk. 19:12, 13) Ma si nos kultivá un “amor pa plaka,” tardi òf trempan esei lo alehá nos for di Yehova. (1 Tim. 6:9, 10) “E inkietut di e era akí,” esta, demasiado preokupashon pa kubri e nesesidatnan di bida, por stek nos spiritualmente. Meskos ta e kaso ku “e poder engañoso di rikesa,” esta, e idea inkorekto ku rikesa ta trese felisidat i siguridat duradero. (Mat. 13:22) Hesus a splika bon kla ku “ningun hende” no por tin éksito si e ke sirbi Dios i rikesa pareu.—Mat. 6:24.

12. Kua ta algun trampa finansiero ku ta komun awe, i kon nos por evitá nan?

¹² Un punto di bista robes di plaka por pone nos hasi kos robes. (Pro. 28:20) E speransa di gana plaka lihé i fásil a pone algun ruman kai den e tentashon di kumpra number òf brièchi na skondí. Otronan ta partisipá den negoshinan estilo di piramit (yamá multilevel marketing) ku supuestamente ta laga nan gana hopi plaka den korto tempu, i asta nan ta primintí otro miembronan di kongregashon ku nan tambe por gana hopi plaka asina. Tin ruman a laga hende kue nan kabes abou ku ofertanan irealista ku a primintí ganashi eksorbitante riba nan invershon. No laga golosidat pone hende estafá bo. Usa sano huisio. Si un oferta ta parse muchu bon pa ta bèrdat, probablemente ta asina mes e ta.

13. Kon Yehova su punto di bista di plaka ta diferente for di mundu su punto di bista di plaka?

¹³ Ora nos ta pone “e Reino i e hustisia di Dios” promé, Yehova ta bendishoná nos esfuersonan balansá pa haña e nesesidatnan di bida. (Mat. 6:33; Efe. 4:28) E no ke pa nos pega soño durante reunion pasobra nos ta traha muchu duru ni sinta preokupá tokante plaka den Salòn di Reino. Sinembargo, hopi hende den mundu ta kere ku solamente si nan dediká nan mes na ‘traha plaka,’ nan lo por tin un futuro sigur i un bida mas trankil despues. Hopi biaha nan ta pone preshon riba nan yunan pa nan tin e mesun meta materialista ei. Hesus a mustra ku e manera di pensa ei no ta rasonabel. (Lesa Lukas 12:15-21.) Esaki kisas ta pone nos kòrda riba Gehazi, kende a pensa ku e por a sasia su ambishon pa kos material i na mes momento konserbá su amistat ku Yehova.—2 Rei. 5:20-27.

14, 15. Dikon nos no mester stèns riba e sistema finansiero di e mundu akí pa siguridat? Duna un ehèmpel.

¹⁴ Hende a yega di mira águila hoga pasobra nan a kohe piská muchu pisá pa nan bula bai kuné, pero tòg no kier a laga e piská lòs for di nan gara. Akaso algu similar lo por pasa ku un kristian? Un ansiano ku yama Alex a splika kiko a pasa kuné. El a konta ku normalmente e ta un persona masha zuinig i prudente ku su plaka. “Si mi basha muchu shampu den mi man, mi tabata pone un poko bèk den e bòter.” Sinembargo, Alex a pensa ku si e gana poko sèn riba e bolsa di balor, lo e por kita for di trabou i bai traha pionero. Pues, el a kuminsá studia e ofertanan i notisianan di e merkado di balor i a enbolbé su mes kompletamente den esei. El a usa tur sèn ku e tabatin di spar, i asta a fia sèn serka intermediarionan, pa kumpra akshonnan ku segun analistanan lo a subi rápidamente di balor. Pero kiko a sosodé? Tur e akshonnan ei a pèrdè nan balor drástikamente. Alex a sigui konta: “Mi tabata determiná pa haña mi plaka bèk. Mi a pensa ku si mi djis wanta un poko mas, e akshonnan lo a bolbe subi di balor.”

¹⁵ Pa lunanan largu, Alex no por a pensa riba nada otro. E tabatin problema pa konsentrá riba asuntunan spiritual, i e no por a drumi bon. Pero, balor di e akshonnan no a subi mas. Alex a pèrdè tur su plaka, i e mester a bende su kas. El a atmití: “Mi a kousa mi famia hopi doló.” Pero el a siña un lès importante: “Awor mi sa ku ken ku pone su konfiansa den e sistema di Satanas lo keda sumamente desepshoná.” (Pro. 11:28) Esaki ta bèrdat, pasobra si nos pone nos speransa den e plaka ku nos tin di spar, den nos invershonnan òf den nos abilidat di gana plaka den e sistema akí, esei ta meskos ku pone nos speransa den “e dios di e mundu akí,” Satanas. (2 Kor. 4:4; 1 Tim. 6:17) Entretantu, Alex a simplifiká su bida “pa motibu di e bon notisia.” E ta bisa ku esei a hasi é ku su famia mas felis i a hala nan mas serka di Yehova.—Lesa Marko 10:29, 30.

ORGUYO

16. Kiko ta e diferensia entre orguyo ku ta bon i orguyo ku ta malu?

¹⁶ Tin kos ku ta bon pa nos ta orguyoso di dje. Por ehèmpel, semper nos mester ta orguyoso di ta un Testigu di Yehova. (Yer. 9:24) Un midí sano di outoestima, òf balor propio, ta yuda nos tuma bon desishon i ta evitá ku nos ta rebahá nos normanan moral. Pero si nos ta duna muchu balor na nos propio punto di bista òf na nos posishon, esei por alehá nos for di Yehova.—Sal. 138:6; Rom. 12:3.

17, 18. (a) Sita algun ehèmpel bíbliko di personanan humilde i di personanan orguyoso. (b) Kiko un ruman hòmber a hasi pa no laga orguyo aleh’é for di Yehova?

¹⁷ Beibel ta konta nos di personanan orguyoso i tambe di personanan humilde. Rei David a buska e guia di Yehova ku un aktitut humilde, i Yehova a bendishon’é. (Sal. 131:1-3) Pero Yehova a humiá Rei Nabukodonosor i Rei Belsasar pasobra nan tabata orguyoso. (Dan. 4:30-37; 5:22-30) Awe tambe por surgi situashonnan ku ta pone nos humildat na prueba. Por ehèmpel, Ryan, un sirbidó ministerial di 32 aña, a muda pa un kongregashon nobo. Ryan a konta: “Mi a ferwagt ku den poko tempu nan lo a rekomendá mi komo ansiano, pero un aña a pasa sin ku nada sosodé.” Kon Ryan a reakshoná? Akaso el a rabia, bira amargá, pensando ku e ansianonan no a mustr’é e debido rèspèt? El a stòp di bai reunion, i laga orguyo aleh’é for di Yehova i Su pueblo? Kiko abo lo a hasi?

¹⁸ Ryan a sigui konta: “Mi a lesa tur loke mi por a haña den nos publikashonnan tokante speransa ku no ser realisá.” (Pro. 13:12) “Mi a bin mira ku mi mester a siña kultivá pasenshi i humildat. Mi mester a laga Yehova entrená mi.” Ryan a stòp di pensa riba su mes i a kuminsá konsentrá riba sirbi otro hende, tantu den kongregashon komo den sirbishi di vèlt. Den poko tempu e tabata dirigí vários estudio di Beibel progresivo. El a bisa: “Ora m’a keda nombrá komo ansiano un aña i mei despues, esei a kue mi di sorpresa. Mi tabata disfrutá asina tantu di sirbishi ku mi a stòp di preokupá mes tokante e asuntu ei.”—Lesa Salmo 37:3, 4.

KEDA SERKA DI YEHOVA

19, 20. (a) Kon nos por hasi sigur ku ningun di nos aktividatnan di bida diario ta alehá nos for di Yehova? (b) Menshoná algun ehèmpel ku nos por imitá di personanan ku a keda serka di Yehova.

¹⁹ Tur e asuntunan ku nos a trata den e artíkulo akí i esun anterior tin nan debido lugá den nos bida. Nos ta orguyoso di por ta sirbidó di Yehova. Un famia felis i bon salú ta entre e regalonan di mas grandi ku nos a haña serka Yehova. Nos ta komprondé ku nos trabou i plaka ta yuda nos kubri nos nesesidatnan. Nos sa ku rekreo por refreská nos i ku teknologia por ta útil. Pero si nos ta okupá nos mes ku e kosnan akí na e momento robes, na un grado eksagerá òf ta laga nan stroba nos den nos adorashon, nos ta kore e peliger di alehá for di Yehova.

²⁰ Klaru ku ta esei ta loke Satanas lo ke pa pasa ku bo. Pero bo por evitá e kalamidat ei tantu pa bo mes komo pa bo famia! (Pro. 22:3) Hala serka Yehova, i keda serka di dje. Nos tin hopi ehèmpel den Beibel di personanan ku a hasi esei. Enok i Noe a “kana ku Dios.” (Gén. 5:22; 6:9) Moises “a sigui firme komo si fuera el a mira Esun ku ta invisibel.” (Heb. 11:27) Hesus tabatin e apoyo kontinuo di Dios, pasobra semper el a hasi loke tabata agradá su Tata selestial. (Huan 8:29) Imitá e ehèmpelnan ei. “Sea semper kontentu. Hasi orashon konstantemente. Gradisí Dios pa tur kos.” (1 Tes. 5:16-18) I no laga nada alehá bo for di Yehova!