PREGUNTA DI LEKTOR

Hesus a bisa e saduseonan ku hende ku resusitá “no ta kasa.” (Luk. 20:34-36) Na ken e tabata referí? Na hende ku lo resusitá pa biba riba tera?

Esakinan ta preguntanan importante, spesialmente pa esnan ku a pèrdè nan kasá stimá den morto i ku ta anhelá di kasa kuné atrobe ora e resusitá den e mundu nobo. Un ruman hòmber ku a pèrdè su kasá a bisa: “No ta ami ku mi esposa a disidí di terminá nos matrimonio. Nos tabata deseá di henter nos kurason pa sigui sirbi Yehova huntu pa semper. I ainda mi ta sinti asina.” Awor, personanan ku resusitá por kasa? Nos no sa.

Pa hopi aña, nos publikashonnan tabata duna di komprondé ku (1) loke Hesus a bisa enkuanto resurekshon i kasamentu probablemente tabata referí na e resurekshon terenal i (2) ku esnan ku resusitá pa biba riba tera lo no kasa.a (Mat. 22:29, 30; Mar. 12:24, 25; Luk. 20:34-36) Nos no ke ta dògmátiko, pero por ta posibel ku Hesus tabata referí na e resurekshon selestial? Laga nos analisá loke Hesus a bisa.

Promé ku tur kos, laga nos wak bou di ki sirkunstansia Hesus a hasi e deklarashon akí tokante resurekshon. (Lesa Lukas 20:27-33.) Hesus tabata papia ku e saduseonan, un grupo religioso ku no tabata kere den resurekshon. Pa kue Hesus den trampa, nan a hasié un pregunta tokante resurekshon i kasamentu di sua.b Hesus a kontestá nan: “Hende di e mundu akí ta kasa, ma esnan ku ta digno di gana bida den e mundu ku ta bini i den e resurekshon for di morto no ta kasa. De echo, nan no por muri mas tampoko, pasobra nan lo ta manera e angelnan, i nan lo ta yu di Dios pasobra Dios lo resusitá nan.”—Luk. 20:34-36.

Pero, dikon nos publikashonnan tabata bisa ku probablemente Hesus tabata papia di e resurekshon terenal? E konklushon ei tabata basá prinsipalmente riba dos argumento. Promé, komo ku Hesus tabata papia ku e saduseonan, kendenan probablemente tabatin e resurekshon terenal na mente, a parse lógiko ku Hesus su kontesta tabatin di haber ku esei. Di dos, Hesus a terminá su kontesta refiriendo na Abraham, Isak i Yakòb—patriarkanan fiel ku lo resusitá pa biba aki riba tera.—Luk. 20:37, 38.

No opstante, por ta posibel ku Hesus tabata papia di e resurekshon selestial. Dikon nos ta bisa asina? Laga nos analisá dos deklarashon klave.

“Esnan ku ta digno di gana . . . e resurekshon for di morto.” E rumannan ungí ku keda fiel ta ser konsiderá “digno di risibí e Reino di Dios.” (2 Tes. 1:5, 11) A base di e reskate, nan ta ser deklará hustu, esta, digno pa biba pa semper. Pues, nan ta muri komo personanan hustu, liber di piká, den bista di Yehova. (Rom. 5:1, 18; 8:1) Beibel ta yama e rumannan ungí “felis i santu” i nan ta ser konsiderá digno di risibí un resurekshon pa biba den shelu. (Rev. 20:5, 6) En kambio, entre e personanan ku resusitá pa biba riba tera tin hende “inhustu” tambe. (Echo. 24:15) Awor, nos por bisa ku e personanan ei ta “digno” di haña resurekshon?

“Nan no por muri mas tampoko.” Hesus no a bisa ku “nan lo no muri mas.” Mas bien, Hesus a bisa: “Nan no por muri mas.” Rumannan ungí ku keda fiel te na morto lo ser resusitá pa biba den shelu i risibí bida inmortal, bida ku lo no kaba nunka i ku lo no ser destruí. (1 Kor. 15:53, 54) Pues, morto no tin ningun poder mas riba e personanan ku risibí resurekshon selestial.c

Awor, mirando loke nos a kaba di analisá, na ki konklushon nos por yega? Wèl, ta posibel ku Hesus tabata referí na e resurekshon selestial ora el a papia di matrimonio i resurekshon. Si ta asina, nos ta komprondé tres kos tokante e personanan ku resusitá pa biba den shelu: (1) Nan lo no kasa, (2) nan no por muri i (3) den algun aspekto, nan ta manera e angelnan den shelu. Sinembargo, e konklushon akí ta lanta vários pregunta.

Promé, dikon Hesus a referí na e resurekshon selestial ora el a kontestá e saduseonan, kendenan probablemente tabatin e resurekshon terenal na mente? Tene kuenta ku no ta tur biaha Hesus a kontestá su enemigunan konforme loke nan tabatin na mente. Por ehèmpel, ora e hudiunan a pidi Hesus un señal, el a bisa nan: “Basha e tèmpel akí abou, i den tres dia lo mi lant’é bèk.” Probablemente, Hesus tabata sa ku nan tabata referí na e tèmpel literal, pero e tèmpel ku Hesus “tabata papia di dje tabata su kurpa.” (Huan 2:18-21) Kisas Hesus no a haña ku tabata nesesario pa kontestá e saduseonan hipókrita ei, kendenan no tabata kere den resurekshon ni den eksistensia di angel. (Pro. 23:9; Mat. 7:6; Echo. 23:8) Kisas Hesus tabata ke revelá algun detaye interesante tokante e resurekshon selestial ya ku esei lo a benefisiá su disipelnan fiel, kendenan despues lo a ser resusitá pa biba den shelu.

Di dos, dikon na final di Hesus su kòmbersashon, el a referí na Abraham, Isak i Yakòb, kendenan lo ser resusitá pa biba riba tera? (Lesa Mateo 22:31, 32.) Ripará ku promé ku Hesus a menshoná e patriarkanan fiel akí, el a usa e ekspreshon “pa loke ta.” Esaki kisas ta indiká ku Hesus tabata bai papia riba un otro tópiko, esta, di resurekshon terenal. Hesus tabata sa ku e saduseonan tabata aseptá loke Moises a skirbi, p’esei el a sita loke Dios a bisa Moises den un mata na kandela. Hesus tabata ke proba e saduseonan ku resurekshon terenal tabata parti di Yehova su propósito i ku esaki lo kumpli sigur.—Éks. 3:1-6.

Di tres, si Hesus tabata referí na e resurekshon selestial, esaki ta nifiká ku hende ku resusitá pa biba riba tera por kasa? E Palabra di Dios no ta duna un kontesta spesífiko riba e pregunta ei. Si Hesus tabata papia di e resurekshon selestial, nos no por konkluí for di su palabranan ku esnan ku resusitá pa biba riba tera por kasa òf nò.

Loke sí nos sa ta ku e Palabra di Dios ta bisa ku morto ta pone fin na matrimonio. Pues, si un biudo òf biuda disidí di kasa atrobe, e no mester sintié malu. Esei ta un desishon personal, i ningun hende no mag di kritiká esnan ku ta buska kompañerismo di un kasá.—Rom. 7:2, 3; 1 Kor. 7:39.

Ta di komprondé ku nos tin hopi pregunta tokante bida den e mundu nobo. Pero en bes di sinta spekulá tokante e posibel kontestanan, ta mihó nos warda i mira kiko lo pasa. Pero un kos sí nos por ta sigur di dje: Tur hende ku obedesé Yehova lo ta felis, pasobra Yehova lo satisfasé tur nan deseo- i nesesidatnan lo mihó posibel.—Sal. 145:16.