Bo Ta Gradisidu Ku e Wowonan di Yehova Ta Riba Bo?

1, 2. Ki diferensia tin entre kámara di siguridat i e wowonan di Yehova?

DEN hopi pais, outoridatnan a instalá kámara pa kontrolá fluho di tráfiko i graba aksidente. Si un kámara kapta un outo ku a dal un hende kantu di kaminda i kore bai, e imágennan grabá por yuda outoridatnan haña e shofùr i arest’é. Ku e ‘wowonan’ elektróniko akí tur kaminda, ta bira mas i mas difísil pa hende skapa di e konsekuensianan di nan akshonnan.

² Awor, nos por kompará e kámaranan di vigilansia akí ku e wowonan di Yehova, nos Tata amoroso? Beibel ta bisa ku su wowonan “ta tur kaminda.” (Pro. 15:3) Pero esei ta nifiká ku e ta vigilá konstantemente tur loke nos ta hasi? E ta opservá nos djis pa wak unda nos ta faya ku su leinan pa e kastigá nos? (Yer. 16:17; Heb. 4:13) Klaru ku nò! Yehova ta wak nos na promé lugá pasobra e ta stima nos i e ta interesá den nos bienestar.—1 Ped. 3:12.

3. Menshoná sinku manera den kua Yehova ta demostrá ku e ta stima nos.

³ Kon nos por sa ku Dios ta wak nos pa motibu ku e ta stima nos? Wèl, e ta demostrá esei den sinku manera ku nos lo bai analisá: (1) e ta spièrta nos promé ku nos hasi algu malu, (2) e ta korigí nos ora nos faya, (3) e ta guia nos pa medio di prinsipionan bíbliko, (4) e ta yuda nos ora nos ta enfrentá prueba, i (5) e ta rekompensá nos ora nos hasi loke ta korekto.

YEHOVA TA SPIÈRTA NOS

4. Ku ki intenshon Yehova a spièrta Kain promé ku Kain a kometé un piká?

⁴ Laga nos mira kon Dios ta spièrta nos promé ku nos hasi algu malu. (1 Kró. 28:9) Pa nos por komprondé e aspekto akí di e manera ku Dios ta wak nos, pensa riba kiko el a bisa Kain, kende a “rabia masha pisá” ora Dios no a aprobá su komportashon. (Lesa Génesis 4:3-7.) Yehova a spièrta Kain pa e ‘hasi loke ta bon,’ sino, lo el a kometé un piká. Ta komo si fuera ‘piká tabata lur na porta.’ Dios a bis’é: “Abo mester domin’é.” E tabata ke pa Kain hasi kaso di e spièrtamentu i risibí su aprobashon. Esei lo a yuda Kain mantené un bon relashon ku Dios.

5. Den ki maneranan Yehova ta spièrta nos tokante un mal tendensia ku nos por tin?

⁵ Kiko di nos awe? E wowonan di Yehova ta mira tur loke ta den nos kurason; nos no por skonde nada for di dje. E sa kiko ta nos tendensianan i motivashonnan. E stima nos i e ke pa nos hasi loke ta korekto, pero e no ta obligá nos kambia di ­rumbo. P’esei, si e mira ku nos ta bayendo den un mal direkshon, e ta spièrta nos pa medio di su Palabra. Kon asina? Wèl, ora nos ta lesa Beibel tur dia, hopi biaha nos ta topa un pasashi ku ta yuda nos vense un mal tendensia. Ademas, kisas un di nos publikashonnan kristian ta hala nos atenshon nèt riba un problema ku nos ta luchando kuné i ta mustra nos kon nos por vens’é. I den nos reunionnan di kongregashon, nos tur ta risibí konseho ku ta bini nèt na ora!

6, 7. (a) Aunke e spièrtamentunan di Dios ta dirigí na miónes di hende, ki prueba nos tin ku e ta interesá den kada un di nos? (b) Kon bo por benefisiá di e interes personal ku Yehova tin den bo?

⁶ Tur e spièrtamentunan ei ta un prueba innegabel di e atenshon ku Yehova tin pa nos i di e manera amoroso ku e ta wak kada un di nos. Ta bèrdat ku Beibel ta eksistí pa sientos di aña kaba, ku e publikashonnan ku nos organisashon ta produsí ta pa miónes di hende i ku e konseho ku nos ta risibí na nos reunionnan ta pa henter e kongregashon. Tòg, den kada kaso, Yehova a dirigí bo atenshon na su Palabra pa bo por korigí kualke mal tendensia ku abo por tin. P’esei nos por bisa ku esaki ta un prueba di e amor ku Yehova tin pa bo i di e manera ku e ta mustra interes personal den bo.

⁷ Pa nos por benefisiá di e spièrtamentunan di Dios, nos tin ku realisá na promé lugá ku di bèrdat e ta interesá den nos. Despues, nos mester apliká e konseho di su Palabra i hasi esfuerso pa eliminá kualke pensamentu ku ta desagrad’é. (Lesa Isaías 55:​6, 7.) Si nos hasi kaso di e spièrtamentunan ku nos ta haña, nos lo spar nos mes di hopi doló di kabes. Pero, suponé awor ku nos a hasi algu malu kaba. Ki yudansa nos Tata amoroso ta duna nos e ora ei?

YEHOVA TA KORIGÍ NOS

8, 9. Ora un ruman duna nos konseho basá riba Beibel, kon esei ta demostrá e interes profundo ku Yehova tin den nos? Duna un ehèmpel.

⁸ Kisas nos ta bira mas konsiente ainda di Yehova su interes den nos ora e korigí nos. (Lesa Hebreonan 12:5, 6.) Ta bèrdat ku ningun di nos no ta gusta risibí konseho òf disiplina. (Heb. 12:11) Pero, pensa riba kiko un ruman ku ta duna nos un konseho mester tene kuenta kuné. E mester ta na haltura ku loke nos ta hasiendo por daña nos relashon ku Yehova, e mester tin interes den nos sintimentunan i e mester ta dispuesto pa dediká e tempu i esfuerso nesesario pa mustra nos for di Beibel kon nos por hasi kambio pa agradá Dios. Nos ta respetá e konseho akí pasobra e ta un refleho di e interes ku Yehova tin den nos.

⁹ Laga nos wak un ehèmpel di esaki. Un ruman, promé ku el a bini den e bèrdat, tabata wak pornografia regularmente. Aunke el a vense e kustumber ei, ainda e tabatin e tendensia di wak loke ta inkorekto, manera karbon ku ainda tabata sendé den su kurason. Dia el a haña un telefòn selular nobo, e ‘vlamnan’ a bolbe lanta i el a kai bèk den e kustumber bieu di wak pornografia riba Internet. (Sant. 1:14, 15) Na un okashon, miéntras e ku algun ruman tabata duna testimonio via ­telefòn, el a fia un ansiano su telefòn pa lag’é buska algun adrès. Ora e ansiano a kuminsá usa e ­telefòn, algun website pornográfiko a aparesé riba e pantaya. Ta bon ku esei a pasa ya ku esaki a duna e ansiano chèns pa konsehá e ruman, kende a aseptá e korekshon oportuno, a benefisiá di dje i ku tempu a vense su mal tendensia. Nos por ta hopi gradisidu na nos Tata selestial, kende ta mira asta nos pikánan skondí i ta korigí nos promé ku ta lat!

YEHOVA TA GUIA NOS PA MEDIO DI PRINSIPIONAN DI BEIBEL

10, 11. (a) Den ki manera bo por buska e guia di Dios? (b) Kon un famia a komprobá ku ta sabí pa sigui e guia di Yehova?

¹⁰ Un salmista a kanta na Yehova: “Ku bo konseho lo bo guia mi.” (Sal. 73:24) Ki ora ku nos tin mester di guia, nos por konsultá ku Yehova su Palabra pa haña sa kiko ta su punto di bista. Ora nos apliká prinsipionan di Beibel, nos ta haña un bon relashon kuné, i tin biaha esei ta yuda nos tambe pa perkurá pa nos nesesidatnan material.—Pro. 3:6.

¹¹ Nos por haña un ehèmpel di e manera ku Yehova ta guia nos den e eksperensia di un ruman hòmber kunukero ku tabata biba huntu ku su famia grandi riba un tereno di hür den un region di seru riba e isla di Masbate, Filipinas. Tantu e komo su kasá tabata pionero regular. Riba un dia doño di e kunuku a notifiká nan ku nan tabatin ku bandoná e kunuku. Nan a keda di shòk i a haña sa despues ku un hende a akusá nan falsamente di ladronisia. Aunke e ruman a keda preokupá tokante unda lo e haña un lugá di biba p’e ku su famia, el a bisa: “Yehova lo sòru pa nos. Maske kiko ku pasa, semper e ta duna nos loke nos tin mester.” Dicho echo. Algun dia despues, e famia a haña un gran alivio ora doño di e tereno a notifiká nan ku nan no tabatin nodi di bandoná e lugá. Kiko a pon’é kambia di idea? Wèl, el a ripará ku apesar di e akusashon, e famia, guiá pa prinsipionan di Beibel, a keda ku un aktitut respetuoso i pasífiko. Esei a impreshon’é asina tantu ku no solamente el a permití nan keda, sino tambe el a duna nan mas tereno pa kultivá. (Lesa 1 Pedro 2:12.) Sí, Yehova ta guia nos pa medio di su Palabra pa yuda nos enfrentá e difikultatnan di bida.

YEHOVA TA YUDA NOS WANTA PRUEBA

12, 13. Den ki situashonnan un ruman por puntra su mes si Dios ta tuma nota di su sufrimentu?

¹² Tin biaha, un prueba por dura largu. Kisas nos tin hopi tempu ta lucha ku un enfermedat, òf podisé nos ta wanta oposishon, inkluso persekushon konstante, di parti di famianan yegá. Tambe nos por haña nos ku un desakuerdo serio ku un persona den kongregashon.

¹³ Suponé ku un ruman ta bisa algu ku ta hùrt bo. Bo ta pensa tal bes: ‘Kon un kos asina por pasa den e organisashon di Dios?’ Pa kolmo, e ruman ta risibí privilegio den kongregashon i otro rumannan ta papia bon di dje. Bo ta puntra bo mes: ‘Kon ta posibel? Akaso Yehova no ta mira kiko ta pasando? E no ta hasi nada?’—Sal. 13:1, 2; Hab. 1:2, 3.

14. Kiko por ta un motibu pakiko Dios no ta intervení den un sierto situashon?

¹⁴ Yehova ta mira mas aleu i por tin bon motibu pa no intervení den un situashon. Por ehèmpel, aunke bo por haña ku e fout ta sinta prinsipalmente serka e otro persona, kisas Dios ta mira e asuntu un poko diferente. For di su punto di bista, podisé e fout ta sinta mas bien serka bo, kisas mas di loke bo ta kere. Tal bes e komentario ku a hùrt bo asina tantu tabata nèt e konseho ku bo tabatin mester i ku bo tin ku pensa seriamente riba dje. Ruman Karl Klein, kende a sirbi den e Kuerpo Gobernante, a konta di un okashon ku Ruman J. F. Rutherford tabatin ku reprend’é. Mas despues, Ruman Rutherford a kumind’é den un forma amabel: “Kon a bai, Karl!” pero apénas Ruman Klein a kumind’é bèk. Mirando ku Ruman Klein a keda karga un poko renkor pa motibu di e reprendementu ku el a risibí, Rutherford a spièrt’é pa e tene kuidou pa e no bira víktima di Diabel. Ruman Klein a skirbi despues: “Ora nos karga renkor kontra un ruman, foral ora el a bisa nos algu ku e tin derecho di bisa komo parti di su deber, nos ta eksponé nos mes na e trampanan di Diabel.”a

15. Dikon bo no tin ku pèrdè pasenshi ora bo ta pasa den un situashon difísil?

¹⁵ Tòg, ora ta parse ku nos no por sali for di un situashon difísil, nos por pèrdè pasenshi. Kiko por yuda nos wanta? Wèl, suponé ku bo ta koriendo un outo riba kaminda grandi i na un dado momento bo ta keda pegá den un fila. Bo no sa kuantu tempu lo bo tin ku warda pa e tráfiko kuminsá move atrobe. Si bo kunsumí i purba di pasa via un otro ruta, bo tin asta chèns di pèrdè kaminda. Bo por haña bo ta tarda mas pa yega bo destino ku si bo warda ku pasenshi. Meskos tambe, si bo keda riba e kaminda ku e Palabra di Dios ta indiká, ku tempu lo bo yega bo destino.

16. Pa ki otro motibu Yehova por keda sin intervení mesora den nos pruebanan?

¹⁶ Kisas Yehova no ta intervení mesora pasobra e ke pa nos saka un lès for di nos pruebanan. (Lesa 1 Pedro 5:6-10.) Klaru ku no ta Dios ta kousa prueba. (Sant. 1:13) Ta ‘nos atversario, Diabel,’ ta esun ku ta kousa mayoria di nos problemanan. Sinembargo, Dios por usa un situashon difísil pa yuda nos krese spiritualmente. E ta mira nos sufrimentu i pa motibu ku “e ta interesá” den nos, lo e no permití nos pruebanan dura demasiado tempu. Bo no ta gradisidu ku e wowonan di Yehova ta riba bo ora bo ta pasa den prueba, i ku lo e perkurá un salida na su debido tempu?—2 Kor. 4:7-9.

YEHOVA TA REKOMPENSÁ NOS

17. Dikon Yehova ta listra kurason di hende?

¹⁷ Finalmente, Yehova ta listra nos pa un motibu hopi alentador: e ke rekompensá hende ku ta stim’é di kurason. Pa medio di profeta Hananí, el a bisa Rei Asa: “Wowo di SEÑOR ta move bai bini dor di henter tera, pa e por sostené ­fuertemente esnan ku nan kurason ta kompletamente di dje.” (2 Kró. 16:9) E kurason di Asa mes no a resultá di ta kompleto pa Yehova. Pero si abo sigui hasi loke ta korekto, lo e ‘sostené bo fuertemente.’

18. Ora bo tin e sintimentu ku hende no ta apresiá e bon ku bo ta hasi, kiko ta bon pa bo kòrda? (Wak e promé plachi.)

¹⁸ Dios ke pa nos ‘buska loke ta bon,’ ‘stima loke ta bon’ i “hasi loke ta bon” pa e duna nos su aprobashon. (Ámos 5:14, 15; 1 Ped. 3:11, 12) E tin atenshon pa hende hustu i ta bendishoná nan. (Sal. 34:15) Pensa por ehèmpel riba kon el a trata e parteranan Sifra i Púa. Tempu ku e israelitanan tabata esklabo na Egipto, e Fárao a manda nan mata tur mucha hòmber hebreo ku nase. Pero e dos muhénan akí a teme Dios mas ku nan a teme e Fárao, i motivá pa nan konsenshi entrená pa Dios, nan a salba bida di e bebinan. Yehova no a keda sin tuma nota di e bon ku Sifra i Púa a hasi i a rekompensá nan despues ku yu ku nan mes a bin haña. (Éks. 1:15-17, 20, 21). De bes en kuando, nos por sinti ku niun hende no ta ripará e bon kosnan ku nos ta hasi. Pero Yehova sí ta tuma nota di tur loke nos ta hasi i lo e rekompensá nos debidamente pa nos bon obranan.—Mat. 6:4, 6; 1 Tim. 5:25; Heb. 6:10.

19. Kon un ruman muhé a haña sa ku Yehova ta mira nos bon obranan?

¹⁹ Un ruman muhé di Austria a komprobá ku Yehova ta mira nos bon obranan. Komo ku e ta originalmente di Hungria, el a risibí adrès di un persona ku ta papia húngaro pa e bai prediká na dje. Mesora el a bai busk’é, pero e no a haña niun hende na kas. El a bai busk’é vários biaha mas. Tin biaha, e tabata sinti ku tin hende na kas, pero niun hende no tabata sali. E tabata laga literatura, karta, su mes datonan personal pa e persona por a tuma kontakto kuné, pero nada. Despues di a bai buska e persona pa un aña i mei largu, por fin e porta di kas a habri! Un señora masha amabel a invitá e ruman muhé pa drenta, anto a bis’é: “Mi a lesa tur loke bo a trese pa mi i mi tabata warda riba bo.” E señora tabata haña kimoterapia i p’esei e no por a atendé bishita. Pero awor el a aseptá un estudio di Beibel. Sí, Yehova a rekompensá nos ruman muhé pa su esfuersonan diligente!

20. Kon bo ta sinti bo awor ku bo sa ku Yehova ta wak bo pa motibu di su interes den bo?

²⁰ Manera nos a siña den e artíkulo akí, Yehova ta wak tur loke nos ta hasi. Pero hamas nos mester sinti manera kos ku e ta vigilá nos pa buska i graba tur e fayonan ku nos ta kometé. Al kontrario, su wowonan ta riba nos pasobra e ta interesá den nos i ke rekompensá nos pa e bon kosnan ku nos ta hasi. No ta bèrdat ku esei ta hala nos mas serka di nos Tata amoroso?