Abo Lo A Reconocé e Mesias?
JESUCRISTO a dedicá tres aña i mei predicando e Palabra di Dios entre e israelitanan. Pero ora cu su ministerio terenal a yega na su fin, e mayoria di su contemporáneonan a rechas’é como e Mesías, of “Esun Ungí” cu Dios a primintí. Pakico?
Bijbel ta yuda nos identificá vários motibu pakico e hudiunan di promé siglo no a reconocé Jesus como e Mesías. Tres dje motibunan aki ta stroba hopi hende di reconocé Jesus su posicion actual como e Rey Mesiánico cu ta gobernando.
“Nos Kier Mira un Señal”
Un motibu pakico e hudiunan dje promé siglo no a reconocé e Mesías tabata pasobra nan a nenga di aceptá e señalnan cu Bijbel a duna pa mustra cu t’e tabata e Mesías. De bes en cuando, e hendenan cu tabata scucha Jesus tabata exigí p’e efectuá un señal pa proba cu el a bini di Dios. Por ehempel, Mateo 12:38 ta informá cu algun dje escriba i fariseonan a bisa: “Maestro, nos kier mira un señal for di bo.” Jesus no a mustra nan señal caba? Claro cu sí.
Pa e tempu ei Jesus a efectuá caba un cantidad di milager. El a combertí awa den biña, a cura un mucha homber cu tabata muriendo, a cura e suegra enfermo di Pedro, a haci un homber leproso limpi, a permití un paralítico cana, a restorá e salú di un homber cu tabata enfermo pa 38 aña, a sana un homber cu tabatin un man secu, a aliviá hopi hende di nan malesanan penoso, a cura e esclabo di un oficial di ehército, a trece yu homber di un biuda bek for di morto i a cura un homber ciegu i muda. E milagernan aki a tuma lugá na Cana, Capernaum, Jerusalem i Nain. Ademas, noticia tocante e milagernan ei a plama rond Hudea i áreanan alrededor.—Juan 2:1-12; 4:46-54; Mateo 8:14-17; 8:1-4; 9:1-8; Juan 5:1-9; Mateo 12:9-14; Marco 3:7-12; Lucas 7:1-10; 7:11-17; Mateo 12:22.
Claramente, no tabatin scarcedad di señal pa proba cu Jesus tabata e Mesías. Aunke el a efectuá asina tantu señal dilanti e hendenan, nan no a pone fe den dje. Esnan cu a mira e prueba cu Jesus a ser mandá dor di Dios pero cu no a duna boca cu e tabata e Mesías tabata spiritualmente ciegu. Nan curason tabata duru i impenetrabel p’e berdad.—Juan 12:37-41.
Kico di nos tempu? Algun hende ta declará, “Ami ta kere solamente loke mi mira cu mi mes wowo.” Pero esei realmente ta un curso sabí pa sigui? Profecia di Bijbel ta indicá cu Jesus a ser entronisá caba como Rey celestial den e Reino Mesiánico. Siendo cu e ta invisibel, nos mester di un señal pa yuda nos dicerní su gobernacion, cua a marca e cuminsamentu dje último dianan dje mal sistema di cosnan aki. Abo ta reconocé e señal?—Mateo 24:3.
Segun Bijbel, e cuminsamentu di Cristo su gobernacion como Rey Mesiánico lo ta marcá pa guera, temblor, scarcedad di cuminda i pest riba un escala sin precedente. Den “e último dianan,” relacionnan humano lo ta caracterisá pa egoismo, golosidad i falta di dominio propio. (2 Timoteo 3:1-5; Mateo 24:6, 7; Lucas 21:10, 11) Los for di prueba cronológico, mas cu 20 diferente rasgo dje último dianan ta señalá e cuminsamentu dje reinado dje Mesías na 1914.—Mira La Atalaya di 1 di mart, 1993, página 5.
“Amante di Placa”
Materialismo tabata un otro motibu pakico e hudiunan a rechasá Jesus como e Mesías. Dunando demasiado importancia na rikesa a stroba hopi hende di sigui Jesus. Por ehempel, e fariseonan tabata conocí como “amante di placa.” (Lucas 16:14) Considerá e caso di un gobernante yong ricu cu a acercá Jesus i a puntr’é con pa gana bida eterno. “Warda e mandamentunan continuamente,” tabata Jesus su contesta. “Mi a warda tur esakinan; kico mi falta ainda?” e homber hóben a puntra, aparentemente sintiendo cu mas tabata necesario cu warda cierto leynan. “Bende bo pertenencianan i duna na hende pober i lo bo tin tesoro den shelu, i bini, sea mi siguidor,” Jesus a bis’é. Ki un oportunidad—ser un disipel dje Mesías! Sin embargo e gobernante a bira bai, tristu. Pakico? Pasobra tesoro riba tera tabata mas importante p’e cu tesoro den shelu.—Mateo 19:16-22.
E situacion no a cambia. Birando un berdadero siguidor dje Rey Mesiánico ta nificá pone interesnan spiritual promé cu tur otro cos, incluyendo pertenencianan terenal. Pa cualkier persona cu tin un punto di bista materialista, esaki ta un desafio. Por ehempel, un pareha misionero den un pais oriental a papia cu un muher tocante Bijbel. Keriendo cu lo e tabatin gana di siña mas tocante Jehova Dios i su Yu, Jesucristo, e pareha a ofrec’é E Toren di Vigilancia i Spierta! Con el a reaccioná? “E revistanan aki lo yudá mi gana mas placa?” el a puntra. E muher tabata mas interesá den cosnan material cu den asuntunan spiritual.
E mésun pareha a studia Bijbel cu un homber hóben cu a cuminsá asistí na reunion n’e Salon di Reino. “Bo ta perdiendo bo tempu,” su mayornan a bis’é. “Bo mester busca un di dos trabou parti anochi i gana mas placa.” Ta ki lamentabel ora mayornan ta animá nan yunan pa pone cosnan material promé cu siña tocante e Rey Mesiánico! “Pa tur su rikesa e gobernante no por cumpra dies mil aña di bida,” segun un proverbio chines.
Hopi hende ta realisá awor cu siña tocante i sigui e Rey Mesiánico no ta laga lugá pa amor pa placa. Un Testigo di Jehova cu tabatin su propio negoshi cu hopi entrada, a bisa: “Gana hopi placa ta masha agradabel pero no necesario. Placa no ta loke ta haci un persona felis.” Awor e ta un miembro dje famia di Betel na un sucursal europeo dje Sociedad Watch Tower.
“Miedu dje Hudiunan”
Temor di hende tabata un otro motibu mas pakico e hudiunan no a aceptá Jesus como e Mesías. Reconociendo públicamente su posicion como Mesías a nificá risca nan reputacion. Pa algun e prijs ei tabata muchu haltu. Considerá Nicodemo, un miembro dje corte superior hudiu yamá e Sanedrin. Impresioná cu Jesus su señalnan i siñansanan, el a admití: “Rabi, nos sa cu abo como maestro a bini di Dios; pasobra ningun hende por haci e señalnan aki cu bo ta haci aménos cu Dios ta cuné.” Sin embargo, Nicodemo a bishitá Jesus den scuridad di anochi, probablemente pa evitá cu otro hudiunan ta reconoc’é.—Juan 3:1, 2.
Pa hopi hende cu a tende Jesus papia, e aprobacion di hende tabata mas importante cu esun di Dios. (Juan 5:44) Ora Jesus tabata den Jerusalem p’e Festival di Cabaña na 32 E.C., “tabatin hopi papiamentu na bos abou tocante dje den e multitudnan.” Ningun hende tabata papia abiertamente tocante Jesus “pasobra nan tabatin miedu dje hudiunan.” (Juan 7:10-13) Asta e mayornan di un homber kende Jesus a cura di cieguedad no tabata dispuesto pa reconocé cu ta e representante di Dios a haci e milager. Nan tambe tabatin “miedu dje hudiunan.”—Juan 9:13-23.
Awe, algun hende ta realisá cu Jesus ta reinando awor como Rey Mesiánico den shelu, pero nan tin miedu di reconocé esaki abiertamente. Pa nan e prijs di perde cara den bista di otronan ta muchu haltu. Na Alemania, por ehempel, un Testigo di Jehova tabata papia tocante Bijbel cu un homber kende a admití: “Loke boso, Testigonan, ta predicá tocante Bijbel ta berdad. Pero si ami bira un Testigo awe, pa mañan tur hende lo haña sa di esei. Kico nan lo pensa di mi na trabou, den becindario i n’e club cu ami i mi famia ta pertenecé na dje? Ami lo no por soportá esei.”
Kico ta causa miedu di hende? Orguyo, amor pa popularidad entre famia i amigunan, miedu di bofon i humiyacion, ansiedad di ta diferente for dje mayoria. Sintimentunan asina ta resultá di ta un prueba particularmente pa esnan cu ta cuminsá studia Bijbel cu Testigonan di Jehova. Por ehempel, un muher hóben tabata emocioná pa siña tocante e Paradijs cu e Reino Mesiánico lo establecé riba tera bou dje gobernacion di Jesucristo. Pero e tabata un afisionado ferviente di discoteca, i miedu di hende a strob’é di papia cu otronan tocante e speransa aki. Finalmente, el a cobra ánimo pa papia libremente tocante Bijbel. Su amigunan di discoteca a rechas’é, pero su esposo i su mayornan sí a mustra interes. Cu tempu e muher i su mama a bautisá, i su esposo i su tata a cuminsá studia Bijbel. Ki un recompensa pa vence miedu di hende!
Abo Realmente Ta Reconocé e Mesías?
Ora Jesus tabata muriendo riba e staca di tormento, algun di su disipelnan tabata presente. Nan a reconoc’é como e Mesías cu a ser predicí. Tambe tabata presente gobernantenan hudiu, cu, na moda di papia, ainda tabata exigí un señal. “Lagu’e salba su mes, si esun aki ta e Cristo [of Mesías] di Dios, Esun Scogí.” (Lucas 23:35) Nan nunca lo a stop di pidi pa un señal? Jesus a efectuá decenas di milager. Ademas, su nacementu, ministerio, prueba, ehecucion i resureccion a cumpli cu hopi profecia dje Scritura Hebreo.—Mira “Toda Escritura es inspirada de Dios y provechosa,” publicá dor di Watchtower Bible and Tract Society of New York, Inc., página 343-4.
Hende cu tabata pasa ei banda tabata brongosá Jesus, despues di a rechasá evidencia di su posicion como Mesías. (Mateo 27:39, 40) Soldatnan di un manera materialista a parti Jesus su pañanan entre nan mes, tirando suerte pa su paña interior. (Juan 19:23, 24) Miedu di hende a hunga un rol den algun caso. Por ehempel, considerá Josef di Arimatea, un miembro dje Sanedrin. E “tabata un disipel di Jesus pero unu secreto debí na su miedu dje hudiunan.” Despues di morto dje Mesías, Josef i Nicodemo a percurá p’e curpa di Jesus. Asina Josef a vence su miedu di hende.—Juan 19:38-40.
Si bo tabata biba den e promé siglo, lo bo a reconocé Jesus como e Mesías? Haciendo esei lo a rekerí pa bo aceptá evidencia bíblico, rechasá pensamentu materialista i no sucumbí na miedu di hende. Den e último dianan aki, cada un di nos mester puntra su mes, ‘Mi ta reconocé Jesus awor como e Rey Mesiánico celestial?’ Pronto lo e tuma mando di asuntunan di mundu. Ora esei sosodé, lo bo ta entre esnan cu realmente ta reconocé Jesucristo como e Mesías primintí?
[Plachinan na página 28]
Nunca bira bo lomba p’e evidencia cu Jesus ta e Rey Mesiánico
[Plachi na página 31]
Siñando tocante e Mesías hopi biaha ta nificá vence miedu di loke otronan lo por bisa