E Recompensanan di Onra Mayornan di Edad Avansá

BERDADERO adoradónan di Dios ta respetá, ta onra i ta cuida nan mayornan di edad avansá pa motibu cu nan ta stima nan. Esei ta parti di nan adoracion. Bijbel ta declará: “Laga [yu i nietu] siña promé pa practicá debocion piadoso den nan mes famia di cas i sigui paga un debido compensacion na nan mayornan i welonan, pasobra esaki ta aceptabel den bista di Dios.” (1 Timoteo 5:4) Sea nos ta hóben of bieu, ta apropiado pa nos ofrecé “debido compensacion” na nos mayornan i welonan. Den e manera aki nos ta mustra aprecio pa nan amor, nan trabou duru i p’e echo cu nan a percurá pa nos pa asina tantu aña. Sí, nos debe nos bida mes na nos mayornan!

Ripará cu paga debido compensacion na mayornan i welonan ta “aceptabel den bista di Dios.” E ta conectá cu nos “debocion piadoso.” Pues, dor di cumpli cu e conseho aki, nos ta ser recompensá, sabiendo cu nos ta haci loke ta agradá Dios. Esei ta duna nos goso.

Tin goso den duna na otronan, specialmente ora nos ta duna na esnan cu a duna generosamente na nos. (Echonan 20:35) Ki un recompensa tin, anto, den actua na armonia cu e principio bíblico: “Hasi pa bo mama i bo tata ta kontentu; hasi pa esun ku a kargá bo den su seno sintié alegre”!—Proverbionan 23:25, Sosiedat Antiano di Beibel.

Con nos por duna nos mayornan i welonan debido compensacion? Den tres manera: den sentido material, emocional i spiritual. Cada un tin su recompensanan cuné.

Dunando den Sentido Material

Esnan cu ta sirbi Dios sa cu ta importante pa percurá den sentido material pa miembronan íntimo di famia. Apostel Pablo a spierta: “Si un hende no ta percurá pa esnan cu ta di dje mes, i specialmente pa esnan cu ta miembro di su famia di cas, el a nenga e fe i ta pió cu un persona sin fe.”—1 Timoteo 5:8.

Tunji i Joy ta biba na West Africa. Aunke nan ta pasa den pertá, nan a invitá Joy su mayornan di edad avansá pa bin biba cerca nan. E tata tabata malu i a bin muri despues. Tunji ta corda: “Ora Papa a muri, Mama a brasa mi esposa i a bis’é: ‘Bo a haci tur loke tabata humanamente posibel. Di ningun manera bo mester sintí bo culpabel p’e morto di Papa.’ Aunke Papa ta haci falta, nos sa cu nos a cumpra e mihó remedi p’e i semper a purba lagu’e sinti cu nos stim’é i tin mester di dje; nos a haci nos best pa cumpli cu e responsabilidad cu Dios a duna nos. Nos tin e satisfaccion ei.”

Naturalmente, no ta tur hende ta den un posicion pa yuda otronan den sentido material. Un homber cu ta biba na Nigeria a bisa: “Si un homber no por soru pa su mes, con e ta haci soru pa un otro hende?” Den hopi pais e situacion por asta empeorá den e añanan binidero. Segun un pronóstico di Nacionnan Uní, pronto mitar dje poblacion dje paisnan africano cu ta keda sur di Sahara lo ta bibando den pobresa absoluto.

Si bo ta den un circunstancia económico difícil, bo por haña consuelo for dje relato di bida real di un biuda pober. Tempu cu Jesus tabata riba tera, el a mira un biuda tira un donacion chikitu den e caha di placa dje tempel. El a duna solamente “dos moneda chikitu di masha poco balor.” Tog, conociendo su situacion, Jesus a bisa: “Di berdad mi ta bisa boso: E biuda aki, aunke pober, a tira mas cu nan tur. Pasobra tur esakinan a tira regalo for di loke nan tabatin di mas, pero e muher aki for di su necesidad a tira tur e medio di biba cu e tabatin.”—Lucas 21:1-4.

Di igual manera, si nos haci nos best pa percurá pa nos mayornan of welonan den sentido material, pa poco cu esei por ta, Jehova ta mira i ta apreciá esei. E no ta spera di nos mas di loke nos por haci. Probablemente nos mayornan of welonan ta pensa mescos.

Dunando den Sentido Emocional

Percurando pa nos mayornan i welonan ta encerá mas cu djis percurá pa nan necesidadnan material. Nos tur tin necesidadnan emocional. Tur hende, incluyendo esnan di mas edad, tin un deseo pa ser stimá, di sinti cu otronan tin mester di nan i kier nan, i di ser un miembro balioso dje famia.

Mary, kende ta biba na Kenya, a cuida su suegra di edad avansá pa tres aña. Mary ta bisa: “Ademas di percurá pa su necesidadnan material, semper nos ta papia cuné. Mama no por haci muchu trabou di cas, pero nos ta papia i a bira bon amiga. Tin biaha nos ta papia tocante Dios, tin biaha tocante hende caminda nos tabata biba. Aunke e tin mas cu 90 aña di edad, e tin un hopi bon memoria. E ta corda i ta papia tocante bida tempu e tabata un hobencita, den e dianan promé cu 1914.”

Mary ta sigui: “No ta fácil pa cuida un hende bieu, pero teniend’e huntu cu nos a duna nos recompensanan ricu. Nos tin pas i armonia den famia. E echo cu mi ta duna na dje a stimulá un spiritu di duna den otro miembronan di famia. Mi esposo tin mas respet pa mi. I si Mama tende cualkier hende papia duru cu mi, e ta cla pa defendé mi. Ningun hende por bisá mi un palabra skerpi ora e t’ei!”

Dunando den Sentido Spiritual

Mescos cu dunamentu den sentido material i emocional ta trece recompensa na esun cu ta duna, asina ta cu cosnan spiritual. Apostel Pablo a skirbi n’e congregacion cristian na Roma: “Mi ta anhelá di mira boso pa mi compartí cu boso algun don spiritual pa boso por ta hací firme; of, mas bien, pa por tin un intercambio di estímulo entre boso, pa cada un mediante e fe di e otro, tantu di boso como di mi.”—Romanonan 1:11, 12.

Den e mésun manera, ora ta trata di dunamentu den sentido spiritual na esnan di edad avansá cu ta sirbi Dios, hopi biaha e animacion ta mutuo. Osondu, kende ta biba na Nigeria, ta conta: “Loke ta interesá mi mas tocante mi welonan ta e oportunidad cu nan ta duná mi di haña un bista di ántes. Cu su wowonan cu ta briya di goso, mi tawela ta conta dje teritorio cu e tabata traha como minister di tempu completo den añanan ’50 i ’60. E ta compará e structura actual dje congregacion cu e tempu ora el a bira Testigo. E experencianan aki ta yudá mi den mi sirbishi como pionero.”

Otronan den e congregacion cristian tambe por yuda den duna na esnan di edad avansá. Tunji, mencioná anteriormente, a splica kico a sosodé den su congregacion: “Un pionero hóben cu a haña un asignacion pa duna un discurso público a bini cu e boskeho cerca Papa pa nan prepar’é huntu. E conductor dje Studio di Toren di Vigilancia tambe a bini i a bisa Papa: ‘Bo tin hopi experencia. Kico bo por bisá mi pa yudá mi mehorá?’ Asina Papa por a duna e anciano ei algun conseho práctico. Vários biaha e rumannan a mencioná Papa su nomber den oracionnan di congregacion. Tur esaki a lagu’e sinti su mes kerí.”

Conducta Excelente Ta Atraé Hende na Dios

Tin biaha, dor cu nos ta mustra onor i amor na nos mayornan i welonan, nos ta atraé hende na Dios. Apostel Pedro a skirbi: “Mantené boso conducta excelente entre e nacionnan, pa cu den loke nan ta papia contra boso como malechor, nan, como testigo ocular di boso obranan excelente, por glorificá Dios.”—1 Pedro 2:12.

Andrew, un anciano cristian na West Africa, tabata biaha 95 kilometer dos biaha pa siman pa cuida su tata enfermo, cu no tabata un creyente. E ta conta: “Ora mi a bira Testigo di Jehova, mi tata a oponé fuertemente. Pero mirando con mi tabata cuid’é ora e tabata enfermo, e tabata urgi mi ruman hombernan i muhernan mas chikitu tur biaha: ‘Boso tin cu djoin e religion di boso ruman!’ Esei a motivá nan, i awor tur mi tata su nuebe yunan ta Testigo di Jehova.”

Kisas ta duru pa onra i cuida nos mayornan di edad avansá, foral ora tempu ta malu. Pero si cristiannan haci esfuerso pa cumpli cu esaki, nan ta cosechá hopi recompensa. Riba tur cos, nan ta experenciá e goso di duna, huntu cu e satisfaccion di sa cu nan ta agradá Jehova Dios, siendo e mes e “Tata di tur persona.”—Efesionan 4:6.

[Kuadro na página 6]

Conseho Piadoso pa Esnan Cu Ta Ricibí Cuido i pa Esnan Cu Ta Dun’é

Sea Animante: “Laga cada un di nos agradá su próhimo den loke ta bon pa su edificacion.”—Romanonan 15:2.

Sea Constante: “Pues, laga nos no entregá den hacimentu di loke ta excelente, pasobra n’e debido tempu nos lo cosechá si nos no cansa.”—Galationan 6:9.

Sea Humilde: ‘No haci nada pa motibu di pleitamentu of pa motibu di egoismo, sino considerá cu humildad di mente cu e otronan ta superior cu bo.’—Filipensenan 2:3.

Sea un Hacidó di Loke Ta Bon: “Laga cada un sigui busca, no su mes bentaha, sino esun dje otro persona.” —1 Corintionan 10:24.

Sea Razonabel: “Laga tur hende sa cu boso ta razonabel.”—Filipensenan 4:5.

Sea Compasivo: “Bira bondadoso un cu otro, tiernamente compasivo, pordonando otro libremente.”—Efesionan 4:32.

[Plachi na página 7]

Ancianonan mas yong por beneficiá dje experencia di esnan mas grandi