Esakinan Ta Realmente e Último Dianan?

BO TA sintá dilanti den un canoa segun cu e ta drenta un parti brutu di un riu. Barancanan inmenso ta aparecé atrabes dje cascadanan di scuma i awa cu ta spat. Bo ta purba pusha for dje barancanan cu bo rema. E persona sintá bo tras supuestamente mester yuda stuur e canoa cu su rema, pero e tin poco experencia. Pió ainda, bo no tin mapa, pues bo no tin ningun idea si e parti brutu aki dje riu lo caba den un pisina calmu of den un waterval.

Esei no ta un senario agradabel, no ta berdad? Pues laga nos cambié. Imaginá cu bo tin un guia experenciá huntu cu bo, un cu conocé delaster un baranca i bogt dje riu aki. E tabata sa di antemano cu e parti brutu aki dje riu tabata acercando, e sa na kico lo e hiba, i e sa con pa stuur su caminda atrabes di dje. Lo bo no sintí bo hopi mas sigur?

Realmente, nos tur ta den un posicion difícil asina. Nos ta haña nos mes, sin cu ta nos falta, den un periodo brutu di historia di humanidad. Mayoria hende no tin idea con largu e situacion lo sigui asina aki, si condicionnan lo mehorá, of con ta mihó pa sobrebibí miéntras tantu. Pero nos no tin cu sinti nos perdí of desampará. Nos Creador a percurá un guia pa nos—un guia cu a profetisá dje periodo scur di historia aki, cu ta predicí con lo e terminá, i ta ofrecé nos e guia cu nos mester afin di sobrebibí. E guia ei ta un buki, e Bijbel. Su Autor, Jehova Dios, ta yama su mes e Magnífico Instructor, i mediante Isaías e ta duna e siguransa trankilisante aki: “Bo propio oreanan lo tende un palabra bo tras bisando: ‘Esaki ta e caminda. Boso cana den dje,’ den caso cu boso mester bai na banda drechi of den caso cu boso mester bai na banda robes.” (Isaías 30:20, 21) Lo bo aceptá tal guia cu gustu? Awel laga nos considerá si Bijbel realmente a profetisá con nos tempu lo ta.

Jesus Su Siguidornan Ta Haci un Pregunta Significativo

Jesus su siguidornan lo mester tabata sorprendí. Jesus a caba di bisa nan, cu palabranan masha cla i enfático, cu e edificionan impresionante dje tempel di Jerusalem lo ser destruí completamente! Un pronóstico asina tabata asombroso. Poco despues, segun cu nan tabata sintá riba e Ceru di Olijfi, cuater dje disipelnan a puntra Jesus: “Bisa nos, Na ki tempu e cosnan aki lo ta, i kico lo ta e señal di bo presencia i dje conclusion dje sistema di cosnan?” (Mateo 24:3; Marco 13:1-4) Sea cu nan a realisá esei of no, Jesus su contesta lo tabatin un aplicacion múltiple.

E destruccion dje tempel di Jerusalem i e fin dje sistema di cosnan hudiu no tabata na mésun tempu cu e presencia di Cristo i e conclusion di henter e sistema mundial di cosnan. No obstante, den su contesta largu, ábilmente Jesus a trata cu tur e aspectonan aki dje pregunta. El e bisa nan con e situacion lo ta promé cu e destruccion di Jerusalem; tambe el a bisa nan kico pa spera dje situacion dje mundu durante su presencia, ora lo e ta gobernando como Rey den shelu i lo ta na punto di trece un fin na henter e sistema mundial di cosnan.

E Fin di Jerusalem

Considerá promé loke Jesus a bisa tocante Jerusalem i su tempel. Mas cu tres década di antemano, el a profetisá un tempu di dificultadnan teribel pa un dje stadnan mas grandi na mundu. Nota particularmente su palabranan registrá na Lucas 21:20, 21: “Ora boso mira Jerusalem rondoná pa ehércitonan den campamentu, sabi e ora ei cu e desolacion di dje a yega cerca. E ora ei laga esnan den Hudea cuminsá hui p’e cerunan, i laga esnan cu ta meimei di dje retirá, i laga esnan den cunucu no drent’é.” Si Jerusalem lo mester a ser rondoná dor di ehércitonan den campamentu, con “esnan cu ta meimei di dje” lo por a djis “retirá,” manera Jesus a manda? Claramente, Jesus tabata implicando cu un porta di oportunidad lo a habri. Esei a sosodé?

Na 66 E.C., e ehército romano bou di mando di Cesto Gallo a pusha e forsanan rebelde hudiu bek pa Jerusalem i tabatin nan inmobilisá den e stad. E romanonan asta a pusha drenta e stad mes i a yega te na muraya dje tempel. Pero e ora ei Gallo a manda su ehército haci algu berdaderamente incomprendibel. El a manda nan retirá! Soldatnan hudiu loco di contentu a sali nan tras i a causa pérdida na nan enemigunan romano cu tabata huyendo. Asina, e porta di oportunidad cu Jesus a profetisá di dje a habri. Cristiannan berdadero a haci caso di su spiertamentu i a sali for di Jerusalem. Esaki tabata un decision sabí, pasobra solamente cuater aña despues, e ehército romano tabata bek, cu General Tito na mando. E biaha aki escape no tabata posibel.

E ehército romano a bolbe rondoná Jerusalem; nan a traha un fortificacion di stacanan puntá rond di dje. Jesus a profetisá relacioná cu Jerusalem: “Dianan lo yega riba bo ora bo enemigunan lo traha rond di bo un fortificacion cu stacanan puntá i lo rondoná bo i afligí bo di tur banda.”a (Lucas 19:43) No a dura mashá cu Jerusalem a cai; su tempel glorioso a ser reducí na ruinanan sacando huma. E palabranan di Jesus a cumpli den tur detaye!

Sin embargo, Jesus tabatin hopi mas na mente cu solamente e destruccion ei di Jerusalem. Su disipelnan a puntr’é tambe tocante e señal di su presencia. N’e tempu ei nan no tabata sa e alcanse di nan pregunta, pero esaki a referí na un tempu ora cu Jesus lo ta instalá pa reina como Rey den shelu. Kico el a profetisá?

Guera den e Ultimo Dianan

Si bo lesa Mateo capítulo 24 i 25, Marco capítulo 13, i Lucas capítulo 21, lo bo mira evidencia inekibocabel cu Jesus tabata papiando di nos mes era. El a profetisá un tempu di guera—no simplemente e “gueranan i informenan di guera” cu semper a mancha historia humano sino gueranan enbolbiendo ‘nacion contra nacion i reino contra reino’—sí, gueranan internacional grandi.—Mateo 24:6-8.

Pensa un ratu riba e manera cu técnica di haci guera a cambia den nos siglo. Antes, ora cu guera a nificá simplemente e choke di ehércitonan representando dos nacion den oposicion, hincando otro cu spada of asta tirando otro cu scopet riba un campo di bataya, esei tabata suficiente teribel caba. Pero na 1914 e Guera Grandi a estayá. Un nacion tras di otro a drenta den e bringamentu—e promé guera mundial. Armanan automático a ser diseñá pa mata mas i mas hende i for di distancianan mas leu. Mitrayeurnan a spat bala cu un eficiencia mortal; gas di mosterd, un gas kímico di guera, a kima, tormentá, manca i mata soldatnan na granèl; tankinan a pasa sin misericordia dor di liñanan enemigu, cu nan cañonnan grandi scupiendo candela. Tambe a cuminsá usa avion i submarino—solamente un sombra di loke nan lo a bira mas despues.

Guera Mundial II a haci lo inimaginabel—en realidad el a laga Guera Mundial I parce chikitu na comparacion, matando miyones di hende. Portavionnan inmenso, prácticamente stadnan flotante, tabata nabegá lamannan i tabata manda avionnan di guera pa basha bom for di shelu riba blanconan enemigu. Submarinonan a torpediá i hundi barcunan enemigu. I a tira bomnan atómico, cobrando miles di bida cu cada golpi aplastante! Net manera Jesus a profetisá, en berdad tabatin “esenanan spantoso” pa marca e era aki di guera.—Lucas 21:11.

Gueranan a mengua desde Guera Mundial II? Apénas. Tin biaha literalmente decenas di guera ta ser bringá den un solo aña—asta den e década aki di añanan ’90—cobrando un cantidad di miyones di morto. I tambe tin un cambio den ken ta esnan cu principalmente ta muri den guera. Mayoria morto no ta soldatnan mas. Awendia, mayoria morto di guera—de echo, mas cu 90 porciento—ta civilnan.

Otro Rasgonan dje Señal

Guera ta solamente un aspecto dje señal cu Jesus a mencioná. Tambe el a spierta cu lo tin “scarcedad di cuminda.” (Mateo 24:7) I asina ta, maske ta contradictorio cu e tera ta produciendo mas cuminda cu ta necesario pa alimentá henter humanidad, maske ciencia agrícola ta mas avansá cu nunca den historia humano, maske transportacion rápido i eficiente ta disponibel pa transportá cuminda na cualkier parti di mundu. Apesar di tur esei, rond di un kinta parti di poblacion dje mundu aki ta pasa hamber tur dia.

Jesus a profetisá tambe cu “den un lugá tras di otro” lo tin “pestilencia.” (Lucas 21:11) Atrobe, nos era a mira un paradox straño—mas mihó cuido médico cu nunca promé, avansenan tecnológico, vacunanan pa prevení hopi malesa comun; tog malesanan pestilente a aumentá sin precedente. E griep spañó (malu di kabouter) a sigui djis despues di Guera Mundial I i a cobra mas bida cu e guera mes. E malesa aki tabata asina contagioso cu den stadnan manera New York, hende por a haña boet of bai cerá djis pasobra nan a nister! Awe, cancer i malesa di curason ta cobra miyones di bida tur aña—pestilencia en berdad. I AIDS ta sigui causa morto, básicamente un malesa cu ciencia médico no tin curacion p’e.

Miéntras cu Jesus a papia dje último dianan den término di condicionnan político i histórico extenso, apostel Pablo a enfocá mas riba e problemanan social i actitudnan cu lo prevalecé. El a skirbi en parte: “Sabi esaki, cu den e último dianan lo presentá tempu crítico, duru pa trata cuné. Pasobra hende lo ta stimador di nan mes, . . . desleal, sin cariño natural, no dispuesto na ningun acuerdo, . . . sin dominio propio, feros, sin amor pa bondad, traicionero, cabesura, hinchá cu orguyo, stimador di placer mas bien cu stimador di Dios.”—2 Timoteo 3:1-5.

E palabranan aki ta zoná bo conocí? Tuma djis un aspecto di decadencia social den e mundu djawe—e desintegracion di famia. E diluvio di famianan kibrá, casánan batí, yunan abusá i mayornan di edad avansá maltratá—en berdad e condicionnan aki ta mustra cu hende ta “sin cariño natural,” “feros,” i asta “traicionero,” “sin amor pa bondad”! Sí, nos ta mira e rasgonan aki na un nivel epidémico awe.

Nos Generacion Ta Esun Profetisá?

Sin embargo, kisas bo ta puntra bo mes, ‘No ta semper e condicionnan aki a plaga humanidad? Con nos sa cu nos generacion moderno ta esun di cua e profecianan antiguo aki a papia di dje?’ Laga nos considerá tres liña di evidencia cu ta proba cu Jesus tabata papiando di nos tempu.

Promé, aunke tabatin un promé cumplimentu parcial den e destruccion di Jerusalem i su tempel, e palabranan di Jesus definitivamente a señalá n’e futuro mas ayá dje tempu ei. Rond di 30 aña despues dje cataclismo cu a destruí Jerusalem, Jesus a duna apostel Juan, ya di edad avansá, un vision mustrando cu e condicionnan profetisá—guera, hamber, pestilencia i morto a consecuencia di nan—lo a tuma lugá mundialmente den futuro. Sí, e calamidadnan aki lo a abarcá, no djis un solo localidad, sino “e tera” completo.—Revelacion 6:2-8.

Na di dos lugá, den e siglo aki algun rasgo dje señal di Jesus ta cumpli den loke nos lo por yama n’e grado máximo. Por ehempel, tin posibilidad pa gueranan bira muchu mas pió di loke nan ta desde 1914? Si tabatin un Guera Mundial III, i tur e paisnan cu tin armanan nuclear awe usa nan, como resultado e tera aki probablemente lo keda carbonisá—i humanidad completamente fuera di existencia. Di igual manera, Revelacion 11:18 a profetisá cu den e dianan aki ora e nacionnan ta ‘rabiá,’ humanidad lo ta ‘ruinando e tera.’ Pa promé biaha den historia, contaminacion i degradacion dje medio ambiente awor ta menasá e planeta aki su capacidad di ta habitabel mes! Pues e rasgo aki tambe ta hañando su cumplimentu den of casi na su grado máximo. Guera i contaminacion realmente lo por sigui empeorá te ora cu hende destruí su mes i e planeta aki? No; pasobra Bijbel mes ta decretá cu e tera lo dura pa semper, cu hende di curason recto bibando riba dje.—Salmo 37:29; Mateo 5:5.

Na di tres lugá, e señal dje último dianan ta specialmente convincente ora tum’é den su totalidad. Na tur, ora nos tuma na cuenta e rasgonan cu Jesus a mencioná den e tres Evangelionan, esnan den Pablo su cartanan, i esnan den Revelacion, e señal aki tin decenas di rasgo. Un persona por argumentá tocante cada rasgo individual, bisando cu otro eranan tabatin problemanan similar, pero ora nos considerá nan tur huntu, nan ta señalá inekibocablemente na un solo era—esun di nos.

Sin embargo, kico tur esaki ta nificá? Cu Bijbel simplemente ta describí nos era como un tempu desesperante, sin speransa? Sigur cu no!

Bon Noticia

Un dje rasgonan mas notabel dje señal di último dianan ta registrá na Mateo 24:14: “E bon nobo aki dje reino lo ser predicá den tur e tera habitá como testimonio pa tur nacion; i e ora ei e fin lo yega.” Den e siglo aki, Testigonan di Jehova a efectuá un trabou único den historia humano. Nan a aceptá e Bijbel su mensahe tocante e Reino di Jehova Dios—loke e ta, con e ta goberná, i loke lo e logra—i a plama e mensahe ei na tur parti dje tera. Nan a publicá literatura riba e tópico aki den mas cu 300 idioma i a trec’é n’e hendenan den nan cas of riba caya of na nan lugá di negoshi den prácticamente tur pais riba tera.

Haciendo esei, nan a bin ta cumpli cu e profecia aki. Pero tambe nan a bin ta plama speransa. Ripará cu Jesus a yama esaki “bon nobo,” no mal noticia. Con esei lo por ta den e tempu malu aki? Pasobra Bijbel su mensahe principal no ta tocante con malu cos lo ta na fin dje mundu bieu aki. Su mensahe principal ta enbolbé e Reino di Dios, i e Reino ei ta primintí algu precioso, pegá n’e curason di tur hende cu ta stima pas, esta, liberacion.

Kico precis e liberacion ei ta, i con e por ta pa bo? Por fabor, considerá e siguiente artículonan riba e tópico aki.

[Nota]

[Komentario na página 5]

Hende ta buscando contesta pa preguntanan perturbador manera, Pakico cos ta asina malu? Unda humanidad ta bayendo?

[Komentario na página 6]

Awe, mas cu 90 porciento di mortonan den guera ta civilnan

[Plachi na página 7]

Jesus su profecia tocante e destruccion di Jerusalem a cumpli den tur detaye