Tene Cuidou cu “Epicureonan”

“E ta bon hende! E tin normanan moral haltu. E no ta huma, no ta usa droga ni papia palabra malu. De echo, e ta mas simpático cu algun cu ta pretendé di ta cristian!”

BO A yega di tende hende usa e razonamentu ei pa hustificá pakico nan a cera amistad inapropiado? Hende por sigui razoná asina despues di un examinacion bíblico? Un ehempel di un congregacion cristian di promé ta tira lus riba e asuntu aki.

Den e promé siglo, apostel Pablo a spierta e congregacion corintio: “No sea gañá. Mal asociacion ta daña custumbernan útil.” Tal bes, algun cristian tabata asociando estrechamente cu individuonan cu tabata bou di influencia di filosofia griego, incluyendo esun dje epicureonan. Ken e epicureonan tabata? Pakico nan a presentá un menasa spiritual p’e cristiannan na Corinto? Tin hende manera nan awe, contra ken nos tin cu vigilá?—1 Corintionan 15:33.

Ken e Epicureonan Tabata?

E epicureonan tabata siguidónan dje filósofo griego Epicuro, kende a biba entre 341 pa 270 P.E.C. El a siña cu placer tabata e único cos of e cos principal den bida. Esei ta nificá cu e epicureonan a biba di un manera escandaloso, sin principio, recuriendo na prácticanan degradá den un búskeda continuo pa pasa bon? Pa straño cu por parce, Epicuro no a siña su siguidónan biba asina! Mas bien, el a siña cu e mihó manera pa haña placer ta biba cu prudencia, curashi, dominio propio i husticia. El a boga pa busca, no placer inmediato i momentáneo, sino placer cu ta dura henter bida. Pues e epicureonan por a parce di ta practicá birtud ora compará nan cu esnan cu a practicá picá grosero.—Compará cu Tito 1:12.

Igual cu Cristianismo?

Si bo tabata miembro dje congregacion corintio di promé, lo bo a keda impresioná cu e epicureonan? Algun cristian por a razoná cu e aparente balornan moral haltu dje epicureonan a haci nan compañeronan cu no ta forma peliger pa cristiannan. Racionalisando mas aleu, e corintionan por a nota aparente paralelonan entre e normanan epicureo i esnan dje Palabra di Dios.

Por ehempel, e epicureonan a usa moderacion ora nan a busca diberticion. Nan a duna mas balor na placer mental cu na placer físico. Loke un persona a come no tabata mes importante cu su relacion cu e persona cu ken el a sinta come. E epicureonan asta a abstené nan di enbolbimentu den política i malecho den secreto. Ki fácil lo por tabata pa asumí: “Nan ta casi mescos cu nos!”

Sin embargo, di berdad e epicureonan tabata mescos cu e cristiannan di promé? Absolutamente cu no. Esnan cu tabatin nan facultad perceptivo bon entrená por a detectá diferencianan significativo. (Hebreonan 5:14) Abo lo por? Laga nos considerá e siñansanan dje epicureonan mas djacerca.

E Banda Negativo di Epicureismo

Pa yuda hende vence temor di deidadnan i di morto, Epicuro a siña cu e diosnan no tin interes den humanidad i no ta intervení den asuntunan humano. Segun Epicuro, e diosnan no a crea e universo, i bida a cuminsá existí pa casualidad. Esaki no tabata claramente na conflicto cu e siñansa di Bijbel di cu tin “un solo Dios,” e Creador, i cu e ta interesá den su criaturanan humano?—1 Corintionan 8:6; Efesionan 4:6; 1 Pedro 5:6, 7.

Tambe Epicuro a siña cu no por tin bida despues di morto. Esaki, naturalmente, tabata contrario cu e siñansa bíblico di resureccion. De facto, ora apostel Pablo a papia riba Areópago, probablemente e epicureonan tabata entre esnan cu no tabata di acuerdo cu Pablo riba e doctrina di resureccion.—Echonan 17:18, 31, 32; 1 Corintionan 15:12-14.

Kisas e elemento mas peligroso den e filosofia di Epicuro tabata a la bes esun mas sutil. E echo cu el a nenga cu tin un bida despues di morto a hib’é n’e conclusion cu hende mester biba mas felis posibel durante su tempu corticu riba tera. Manera nos a mira, su idea no tabata necesariamente pa hiba un bida pecaminoso, sino, mas bien, pa disfrutá di lo presente, ya cu esaki ta tur loke nos tin.

P’esei, Epicuro a desanimá pa haci malu den secreto pa no tin nodi pasa dor di e ansiedad di ser descubrí, un menasa sigur pa felicidad actual. El a animá moderacion pa evitá e consecuencianan di exceso, un otro obstáculo pa felicidad actual. Tambe el a animá bon relacionnan cu otro hende pasobra ora otronan haci bon bek, esei lo ta beneficioso. Naturalmente, no haci malecho den secreto, practicá moderacion i cultivá amistad riba nan mes ta excelente. Pues pakico e filosofia di Epicuro tabata peligroso pa un cristian? Pa motibu cu su conseho tabata basá riba su punto di bista sin fe: “Ban come i bebe, pasobra mañan nos tin cu muri.”—1 Corintionan 15:32.

Ta cierto cu Bijbel ta mustra hende con pa biba felis awor. Sin embargo, e ta consehá: “Manten’é boso den e amor di Dios, miéntras cu boso ta spera e misericordia di nos Señor Jesucristo cu bida eterno na bista.” (Hudas 21) Sí, Bijbel ta pone mayor énfasis riba e futuro eterno, no e presente pasahero. Pa un cristian, su interes principal ta pa sirbi Dios, i e ta haña cu ora e pone Dios na promé lugá, e ta felis i satisfecho. Den un manera similar, en bes di bira preocupá cu su mes interesnan personal, Jesus a dedicá su energia inegoistamente pa sirbi Jehova i yuda hende. El a siña su disipelnan haci bon na otronan, no cu e speransa di haña bon bek, sino motivá pa amor genuino pa nan. Claramente, e motivacionnan básico di epicureismo i cristianismo ta totalmente diferente for di otro.—Marco 12:28-31; Lucas 6:32-36; Galationan 5:14; Filipensenan 2:2-4.

Un Peliger Sutil

E ironia ta cu aunke e epicureonan a pone asina un énfasis riba ser felis, mas cu nan por a logra ta un felicidad limitá. Ya cu e no tabatin “e goso di Jehova,” Epicuro a yama bida un “regalo amargo.” (Nehemías 8:10) Ki felis e cristiannan di promé tabata na comparacion! Jesus no tabata recomendando un bida infelis di priva bo mes di loke ta necesario. De facto, sigui su curso ta e caminda pa e mayor felicidad.—Mateo 5:3-12.

Si algun miembro dje congregacion na Corinto a pensa cu nan por a asociá cu esnan cu tabata bou di influencia di pensamentu epicureo sin pone nan fe na peliger, nan tabata ekibocá. N’e tempu cu Pablo a skirbi su promé carta n’e corintionan, algun di nan ya caba a perde fe den e resureccion.—1 Corintionan 15:12-19.

Epicureismo Awe?

Aunke epicureismo a disparcé den siglo cuater E.C., awe tin hende cu ta adoptá un punto di bista similar di biba-pa-awe. E hendenan aki tin masha poco of ningun fe den e promesa di Dios di bida eterno. Tog, algun di nan tin normanan di conducta relativamente haltu.

Un cristian lo por ser tentá pa forma un relacion íntimo cu hende asina, tal bes razonando cu nan cualidadnan decente ta hustificá e amistad. Sin embargo, aunke nos no ta considerá nos mes superior, nos mester tene na mente cu tur “mal asociacion”—incluyendo esnan kende nan influencia ta mas sutil—“ta daña custumbernan útil.”

E filosofia di ‘awe ta tur loke nos tin’ tambe ta presentá sutilmente den algun seminario di negoshi, buki pa yuda bo mes, novela, película, programa di television i música. Aunke e punto di bista sin fe aki no ta promové conducta pecaminoso directamente, lo e por influenciá nos den maneranan sutil? Por ehempel, nos por bira asina preocupá cu satisfaccion personal cu nos ta perde bista dje cuestion di Jehova su soberania? Nos por ser desviá pa ‘bai trankil,’ en bes di tin “hopi di haci den e trabou di Señor”? Of nos lo por ser engañá pa duda cu e normanan di Jehova ta bon i beneficioso? Nos tin cu vigilá tantu contra exponé nos mes abiertamente na inmoralidad, violencia i spiritismo como contra e personanan cu ta bou di influencia di puntonan di bista mundano!—1 Corintionan 15:58; Colosensenan 2:8.

P’esei, laga nos cultivá asociacion, principalmente cu esnan cu di henter curason ta sigui e guia di Jehova. (Isaías 48:17) Como resultado, nos custumbernan útil lo ser fortalecé. Nos fe lo bira mas fuerte. Nos lo biba felis no solamente awor, sino den futuro, cu bida eterno na bista.—Salmo 26:4, 5; Proverbionan 13:20.

[Plachi na página 24]

Courtesy of The British Museum

[Rekonosementu]

Epicuro a siña cu e diosnan no tin interes den humanidad