Lesnan Práctico for dje Tera Primintí

E TERA Primintí manera e ta ser presentá den Bijbel siguramente tabata único. Den e área relativamente chikitu aki, nos ta haña un gran variedad di rasgonan geográfico. Den nort, tin cerunan cubrí cu sneu; den zuid, regionnan cayente. Tin terenonan plat cu ta productivo, áreanan di desierto desolá, i region di ceritunan pa plantacionnan di fruta i tounan di bestia cu ta come yerba.

E variacion den altura, clima i tera ta permití pa un variedad amplio di palu i mata crece—incluyendo algun cu ta bona den e regionnan alpino friu, otronan cu ta crece den e desierto masha calor i otronan cu ta florecé den e sabananan cu rastro di rooi of e ‘plateau’ yen di baranca. Un botánico ta calculá cu bo por haña rond di 2.600 variedad di mata den e área! E promé israelitanan cu a explorá e tera a mira mesora e evidencia di su potencial. Nan a trece bek for di un dje vayenan di coriente di awa un troshi di druif asina grandi cu dos homber mester a cargu’é riba un bara! E vaye apropiadamente a ser yamá Escol, nificando “Troshi [di Druif].”a—Númeronan 13:21-24.

Pero awor laga nos tira un bista mas djacerca na algun dje rasgonan geográfico dje pida tera único aki, particularmente dje seccion sur.

E Region di Sefela

E frontera west dje Tera Primintí ta su costa cu Laman Mediteráneo. Rond di 40 kilometer den interior dje pais tin e region di Sefela. E palabra “Sefela” ta nificá “Tera Plat,” pero esaki en realidad ta un área yen di ceritu i por ser yamá plat solamente ora compar’é cu e cerunan di Huda n’e parti oost.

Mira e mapa acompañante i ripará e relacion di Sefela cu e teritorionan cu ta rondon’é. N’e parti oost tin e cerunan di Huda; n’e parti west, e yanura cant’i costa di Filistea. Pues, Sefela a sirbi como un zona intermedio, un barera cu den tempu bíblico a separá e pueblo di Dios for di nan enemigunan antiguo. Cualkier ehército invasor for di west lo mester a pasa dor di Sefela promé cu e por a move contra Jerusalem, stad capital di Israel.

Un incidente asina a tuma lugá durante siglo nuebe P.E.C. Bijbel ta informá cu Rey Hazael di Siria “a procedé di subi i bringa contra Gat [probablemente n’e frontera di Sefela] i captur’é, despues di cua Hazael a fiha su cara pa subi contra Jerusalem.” Rey Jehoas a logra para Hazael dor di dun’é un surtido di cosnan di balor for dje tempel i palacio como soborno. No obstante, e relato aki ta ilustrá cu Sefela tabata di importancia crucial p’e siguridad di Jerusalem.—2 Reynan 12:17, 18.

Nos por siña un les práctico for di esaki. Hazael kier a conkistá Jerusalem, pero promé e tabatin cu pasa dor di Sefela. Di igual manera, Satanas e Diabel ta ‘buscando pa devorá’ e sirbidornan di Dios, pero hopi biaha e mester penetrá promé dor di un zona intermedio fuerte—nan pegamentu na principionan bíblico, manera esnan relacioná cu mal asociacion i materialismo. (1 Pedro 5:8; 1 Corintionan 15:33; 1 Timoteo 6:10) Comprometé cu principionan bíblico hopi biaha ta e promé stap den direccion di cometé picánan serio. Pues protehá e zona intermedio ei. Sigui principionan bíblico awe, i lo bo no kibra e leynan di Dios mañan.

E Region di Ceru di Huda

Mas den interior for di Sefela tin e region di ceru di Huda. Esaki ta un área di montaña cu tabata producí bon grano, zeta di olijfi i biña. Debí na su elevacion haltu, Huda tabata tambe un excelente refugio. Pues, Rey Jotam a construí “lugánan i torennan fortificá” ei. Den tempu di dificultad, hende por a hui bai na esakinan pa siguridad.—2 Crónicanan 27:4.

Jerusalem, yamá tambe Síon, tabata un parti prominente dje region di ceru di Huda. Jerusalem tabata parce un lugá sigur siendo cu e tabata rondoná na tres banda cu vayenan steil, i banda nort, segun historiador Josefo di promé siglo, tabata protehá cu tres muraya tras di otro. Pero un refugio tin mester di mas cu murayanan i armanan pa mantené su siguridad. Tambe e mester tin awa. Esaki ta esencial durante un sitiamentu, pasobra sin awa, ciudadanonan cerá den e stad lo a ser forsá lihé pa entregá.

Jerusalem tabata saca un suministro di awa for dje Tanki di Siloam. Sin embargo, durante siglo ocho P.E.C., anticipando un sitiamentu di parti dje asirionan, Rey Ezekías a construí un muraya parti pafó pa protehá e tanki di Siloam, cerand’e den e stad. Tambe el a stop e fonteinnan di pafó dje stad di manda awa, di manera cu e asirionan cu a sitia nan lo a pasa trabou pa haña awa pa nan mes. (2 Crónicanan 32:2-5; Isaías 22:11) Esei no ta tur. Ezekías a haña un manera pa desviá un suministro adicional di awa p’e pasa derechitu den Jerusalem!

Den loke a ser yamá un dje hazañanan di ingenieria di mas grandi di antigwedad, Ezekías a coba un tunel for dje fontein di Gihon te n’e Tanki di Siloam.b Cu un altura promedio di 1,80 meter, e tunel aki tabata 533 meter largu. Djis imaginá esei—un tunel casi mei kilometer largu, cobá dor di baranca! Awe, mas o ménos 2.700 aña despues, bishitantenan na Jerusalem por cana pasa dor dje obra maestral aki di ingenieria, generalmente conocí como e tunel di Ezekías.—2 Reynan 20:20; 2 Crónicanan 32:30.

E esfuersonan di Ezekías pa protehá i aumentá Jerusalem su suministro di awa por siña nos un les práctico. Jehova ta “e fuente di awa bibiente.” (Jeremías 2:13) Su pensamentunan, cu ta ser describí den Bijbel, ta sostenedor di bida. P’e motibu ei studio personal di Bijbel ta esencial. Pero oportunidad pa studio, i e conocimentu cu ta resultá for di esei, lo no simplemente core bini cerca bo. Kisas lo bo tin cu ‘coba tunelnan,’ manera dor di bo rutina diario ocupá, pa traha lugá p’e. (Proverbionan 2:1-5; Efesionan 5:15, 16) Una bes bo a cuminsá, pega na bo programa, dunando prioridad haltu na bo studio personal. Tene cuidou pa no laga ningun hende ni nada hortá bo for dje precioso suministro di awa aki.—Filipensenan 1:9, 10.

E Areanan di Desierto

N’e banda oost dje cerunan di Huda tin e Desierto di Huda, yamá tambe Jesimon, cu ta nificá “Desierto.” (1 Samuel 23:19, nota) Na Laman Salu, e característicanan dje region secu aki ta ‘ravijn’ di baranca i klipnan skerpi. Bahando rond di 1.200 meter den apénas 24 kilometer, e Desierto di Huda ta ser tapá for dje bientunan cu ta carga awaceru for di west, i asina ta ricibí solamente un cantidad limitá di yobida. Esaki sin duda ta e desierto den cua e cabritu pa Azazel a ser mandá riba e Dia di Expiacion anual. E ta e mésun lugá tambe unda David a hui for di Saul. Aki Jesus a yuna pa 40 dia i a ser tentá despues dor dje Diabel.—Levítico 16:21, 22; Salmo 63, introduccion; Mateo 4:1-11.

Aproximadamente 160 kilometer zuidwest dje Desierto di Huda tin e Desierto di Paran. Hopi dje sitionan di campamentu di Israel durante nan biahe trabahoso di 40 aña for di Egipto p’e Tera Primintí tabata situá aki. (Númeronan 33:1-49) Moises a skirbi di “e desierto grandi i inspirador di temor, cu colebranan venenoso i scorpionnan i cu un suela sediente cu no tin awa.” (Deuteronomio 8:15) Ta increibel con miyones di israelita por a sobrebibí! Sin embargo, Jehova a sostené nan.

Laga esaki sirbi como un recordatorio cu Jehova por sostené nos tambe, asta den e mundu spiritualmente secu aki. Sí, nos tambe ta anda entre colebranan i scorpionnan, aunke probablemente no esnan literal. Kisas nos ta haña nos mes den contacto diario cu hende cu sin ningun escrúpulo ta arohá abla venenoso cu fácilmente por infectá nos manera di pensa. (Efesionan 5:3, 4; 1 Timoteo 6:20) Mester encomendá esnan cu ta haci esfuerso pa sirbi Dios apesar dje obstáculonan aki. Nan fieldad ta evidencia fuerte cu Jehova en berdad ta sosteniendo nan.

E Ceritunan di Carmelo

E nomber Carmelo ta nificá “Plantacion di Fruta.” E region fértil aki den nort, rond di 50 kilometer largu, ta decorá cu cunucu di wijndruif, plantacion di mata di olijfi i palu di fruta. E parti mas haltu dje área yen di ceritu aki ta inolvidabel pa su gracia i bunitesa. Isaías 35:2 ta papia di “e splendor di Carmelo” como un símbolo dje gloria fructífero dje tera restorá di Israel.

Vários suceso notabel a tuma lugá na Carmelo. Tabata aki cu Elías a desafiá e profetanan di Baal i cu “e candela di Jehova a bini cayendo” como prueba di Su supremacia. Tambe, tabata for dje top di Carmelo cu Elías a hala atencion na e nubia chikitu cu a bira un yobida grandi, terminando asina milagrosamente e secura na Israel. (1 Reynan 18:17-46) E sucesor di Elías, Eliseo, tabata n’e Ceru di Carmelo ora e muher di Sunem a bin busca su yudansa pa su yu morto, kende Eliseo a resucitá despues di esei.—2 Reynan 4:8, 20, 25-37.

E subidanan di Carmelo ainda ta contené plantacionnan di fruta, di matanan di olijfi i di wijndruif. Durante primavera, e subidanan aki ta ser cubrí cu un tapijt consistiendo di un despliegue magnífico di flornan. “Bo cabes riba bo ta manera Carmelo,” Sálomon a bisa e mosa sulamita, tal bes refiriendo na su cabei bunita i yen of n’e manera den cua su cabes cu bunita forma a surgi di un manera mahestuoso for di su garganta.—Cantica di Sálomon 7:5.

E splendor cu tabata característico p’e ceritunan di Carmelo ta recordá nos dje bunitesa spiritual cu Jehova a concedé na su organisacion di adoradornan dje tempu actual. (Isaías 35:1, 2) Testigonan di Jehova berdaderamente ta biba den un paradijs spiritual, i nan ta di acuerdo cu e sintimentunan di Rey David, kende a skirbi: “E cabuyanan di midi mes a cai pa mi den lugánan agradabel. Realmente, mi propio posesion a cai na mi agrado.”—Salmo 16:6.

Ta cierto cu tin desafionan difícil cu e nacion spiritual di Dios djawe mester enfrentá, mescos cu e israelitanan di antigwedad a topa cu oposicion continuo for dje enemigunan di Dios. Sin embargo, cristiannan berdadero nunca ta perde bista dje bendicionnan cu Jehova a percurá—incluyendo e lus semper aumentante dje berdad bíblico, un hermandad mundial i e oportunidad pa gana bida eterno riba un tera paradísico.—Proverbionan 4:18; Juan 3:16; 13:35.

“Manera e Hofi di Jehova”

E Tera Primintí di antigwedad tabata atractivo pa e bista. El a ser describí apropiadamente como un tera cu “ta abundá cu lechi i miel.” (Génesis 13:10; Exodo 3:8) Moises a yam’é “un bon tera, un tera di vayenan cu coriente di awa, fontein i un gran cantidad di awa brotando den e sabana di vaye i den e region di ceru, un tera di trigu i cebada i palunan di wijndruif i figu i granatapel, un tera di olijfi cu hopi zeta i di miel, un tera unda boso lo no come pan cu scarcedad, unda boso lo no falta nada, un tera di cua e piedranan ta heru i for di su cerunan boso lo mina koper.”—Deuteronomio 8:7-9.

Si Jehova por a percurá un patria asina ricu i bunita pa su pueblo antiguo, siguramente e por duna su fiel sirbidornan dje tempu actual un glorioso paradijs cu ta extendé rond mundu—cu cerunan, vayenan, riunan i lagonan. Sí, e Tera Primintí di antigwedad cu tur su variacion tabata solamente un proef delantá dje paradijs spiritual cu Su Testigonan ta disfrutá di dje awe i dje futuro Paradijs dje mundu nobo. Ei e promesa registrá na Salmo 37:29 lo ser cumplí: “E hustunan mes lo poseé e tera, i nan lo biba pa semper riba dje.” Ora Jehova duna e hogar paradísico ei na humanidad obediente, ki felis nan lo ta pa inspeccioná tur su “cuartonan” i pa por haci esei pa eternidad!

[Nota]

[Mapa na página 4]

(Pa e teksto den su formato kompleto, wak e publikashon)

GALILEA

Ceru di Carmelo

Laman di Galilea

SAMARIA

SEFELA

Cerunan di Huda

Laman Salu

[Rekonosementu]

NASA photo

[Mapa na página 4]

(Pa e teksto den su formato kompleto, wak e publikashon)

Sefela tabata un barera entre e pueblo di Dios i nan enemigunan

MI 0 5 10

KM 0 8 16

Sabana di Filistea

Sefela

Region di Ceru di Huda

Desierto di Huda

Vaye di Rift

Laman Salu

Tera di Amon i di Moab

[Mapa/Plachi na página 5]

(Pa e teksto den su formato kompleto, wak e publikashon)

Tunel di Ezekías: 533 meter largu, cobá dor di baranca sólido

Vaye di Tiropoeo

Siloam

STAD DI DAVID

Vaye di Kidron

Gihon

[Plachi na página 6]

Den e Desierto di Huda, David a busca refugio for di Saul. Mas despues aki Jesus a ser tentá dor dje Diabel

[Rekonosementu]

Pictorial Archive (Near Eastern History) Est.

[Plachi na página 7]

Ceru di Carmelo, unda Elías a humiyá e profetanan di Baal

[Rekonosementu]

Pictorial Archive (Near Eastern History) Est.

[Plachi na página 8]

“Jehova bo Dios ta treciendo bo den un bon tera, un tera di vayenan cu coriente di awa, fontein i un gran cantidad di awa brotando den e sabana di vaye i den e region di ceru.”—Deuteronomio 8:7