Lès 4

Ken e Diabel Ta?

Satanas e Diabel—di unda el a bini? (1, 2)

Con Satanas ta gaña hende? (3-7)

Pakico bo mester resistí e Diabel? (7)

1. E palabra “diabel” ta nificá un persona cu ta papia mentiranan malicioso di un otro. “Satanas” ta nificá un enemigu of opositor. Esakinan ta nomber cu a ser duná na e enemigu principal di Dios. Na principio, e tabata un angel perfecto den shelu huntu cu Dios. Sin embargo, mas despues el a pensa demasiado di su mes i kier a ricibí e adoracion cu debidamente ta pertenecé na Dios.—Mateo 4:8-10.

2. E angel aki, Satanas, a papia cu Eva pa medio di un colebra. Dor di cont’é mentira, el a pone Eva desobedecé Dios. Dje manera ei Satanas a atacá loke ta ser yamá Dios su “soberania,” of posicion como e Haltísimo. Satanas a pone na duda di cu si Dios ta goberná den un manera digno i den e mihó interes di Su súbditonan. Tambe Satanas a lanta duda en cuanto si cualkier humano lo keda leal na Dios. Dor di haci esaki, Satanas a haci su mes un enemigu di Dios. Ta p’esei el a yega di ser yamá Satanas e Diabel.—Génesis 3:1-5; Job 1:8-11; Revelacion 12:9.

3. Satanas, usando engaño, ta purba pone hende ador’é. (2 Corintionan 11:3, 14) Un manera cu e ta gaña hende ta mediante religion falsu. Si un religion ta siña mentiranan tocante Dios, en realidad e ta sirbi e propósito di Satanas. (Juan 8:44) Hende cu ta miembro di religionnan falsu tal bes ta kere sinceramente cu nan ta adorando e Dios berdadero. Pero en realidad nan ta sirbiendo Satanas. E ta ‘e dios dje mundu aki.’—2 Corintionan 4:4.

4. Spiritismo ta un otro manera cu Satanas ta usa pa trece hende bou di su poder. Hende por inbocá spiritunan pa protehá nan, pa haci daño na otronan, pa pronosticá e futuro of pa efectuá milagernan. Satanas ta e forsa malbado tras di tur e prácticanan aki. Pa agradá Dios, nos no mester tin nada di haci cu spiritismo.—Deuteronomio 18:10-12; Echonan 19:18, 19.

5. Satanas ta gaña hende tambe mediante orguyo racial extremo i e adoracion di organisacionnan político. Algun hende ta di opinion cu nan nacion of rasa ta mihó cu di otronan. Pero esaki no ta berdad. (Echonan 10:34, 35) Otronan ta confia den organisacionnan político pa resolvé problemanan di humanidad. Dor di haci esaki, nan ta rechasando e Reino di Dios. Esei ta e único solucion pa nos problemanan.—Daniel 2:44.

6. Un otro manera cu Satanas ta gaña hende ta dor di tenta nan cu deseonan pecaminoso. Jehova ta bisa nos pa evitá prácticanan pecaminoso, pasobra e sa cu nan lo haci nos daño. (Galationan 6:7, 8) Algun hende kisas kier pa bo uni cu nan den prácticanan asina. Pero, corda, realmente ta Satanas ta esun cu kier pa bo haci e cosnan aki.—1 Corintionan 6:9, 10; 15:33.

7. Satanas por usa persecucion of oposicion pa poné bo bandoná Jehova. Kisas algun di bo stimánan por rabia mashá pa motibu cu bo ta studiando e Bijbel. Otronan por haci mofa di bo. Pero na ken bo ta debe bo bida? Satanas kier spantá bo pa bo stop di siña tocante Jehova. No laga Satanas gana! (Mateo 10:34-39; 1 Pedro 5:8, 9) Dor di resistí e Diabel, bo por haci Jehova contentu i mustra cu bo ta apoyá Su soberania.—Proverbionan 27:11.

[Plachi na página 9]

Religion falsu, spiritismo i nacionalismo ta gaña hende

[Plachi na página 9]

Resistí Satanas dor di sigui siña tocante Jehova