Lès 5

Kico Ta Dios Su Propósito pa e Tera?

Pakico Jehova a crea e tera? (1, 2)

Pakico e tera no ta un paradijs awor? (3)

Kico lo sosodé cu hende malbado? (4)

Den futuro, kico Jesus lo haci pa hende enfermo? hende bieu? e mortonan? (5, 6)

Pa tene parti den e futuro bendicionnan, kico bo mester haci? (7)

1. Jehova a crea e tera aki di manera cu hende lo por a disfrutá di biba riba dje pa semper. E tabata kier pa e tera ser habitá pa semper cu hende hustu i felis. (Salmo 115:16; Isaías 45:18) E tera nunca lo ser destruí; lo e permanecé pa semper.—Salmo 104:5; Eclesiástes 1:4.

2. Promé cu Dios a crea hende, El a scoge un parti chikitu dje tera i a transform’é den un bunita paradijs. El a yam’é e hofi di Eden. Tabata aki cu el a pone e promé homber i muher, Adam i Eva. E propósito di Dios tabata pa nan haña yu i yena henter e tera. Gradualmente nan lo a transformá henter e tera den un paradijs.—Génesis 1:28; 2:8, 15.

3. Adam i Eva a peca dor di violá Dios su ley deliberadamente. Pues Jehova a saca nan for dje hofi di Eden. Paradijs a bai perdí. (Génesis 3:1-6, 23) Pero Jehova no a lubidá su propósito p’e tera aki. E ta primintí di transform’é den un paradijs, caminda hende lo biba pa semper. Con lo e haci esaki?—Salmo 37:29.

4. Promé cu e tera aki por bira un paradijs, hende malbado mester ser kitá. (Salmo 37:38) Esaki lo sosodé na Armagedon, cu ta e guera di Dios pa caba cu maldad. Despues, Satanas lo ser encarcelá pa 1.000 aña. Esaki ta nificá cu lo no keda ningun malbado pa daña e tera. Solamente e pueblo di Dios lo sobrebibí.—Revelacion 16:14, 16; 20:1-3.

5. E ora ei Jesucristo lo goberná e tera aki como Rey pa 1.000 aña. (Revelacion 20:6) Gradualmente lo e kita picá for di nos mente i curpa. Nos lo bira hendenan perfecto mescos cu Adam i Eva tabata promé cu nan a peca. E ora ei lo no tin malesa, behes ni morto mas. Hende enfermo lo ser curá i hendenan bieu lo bira yong atrobe.—Job 33:25; Isaías 33:24; Revelacion 21:3, 4.

6. Durante e Reinado di Mil Aña di Jesus, hendenan fiel lo traha pa transformá henter e tera den un paradijs. (Lucas 23:43) Tambe, miyones di hende morto lo ser resucitá na bida humano riba tera. (Echonan 24:15) Si nan haci loke Dios ta rekerí di nan, nan lo sigui biba riba tera pa semper. Si no, nan lo ser destruí pa semper.—Juan 5:28, 29; Revelacion 20:11-15.

7. Asina Dios su propósito original p’e tera lo ser realisá. Lo bo tin gana di tene parti den e futuro bendicionnan aki? Si ta asina, bo mester sigui siña tocante Jehova i obedecé su rekisitonan. Asistiendo n’e reunionnan na e Salon di Reino local di Testigonan di Jehova lo yudá bo haci esei.—Isaías 11:9; Hebreonan 10:24, 25.

[Plachi na página 10]

Paradijs a bai perdí

[Plachi na página 11]

Despues di Armagedon, e tera lo ser transformá den un paradijs