Kapítulo Dies

Un Reino “Ku Nunka Lo No Wòrdu Destruí”

1. Ki echo susesonan mundial a enfatisá atraves di humanidat su historia?

SUSESONAN mundial ku ta tuma lugá tur dia ta enfatisá e echo ku hende no a haña felisidat dor di rechasá Yehova su gobernashon supremo i purba goberná nan mes. Ni un solo forma di gobièrnu humano a trese benefisio pa tur hende, sin hasi distinshon. Ounke hende a desaroyá nan konosementu sientífiko na un grado nunka bisto, nan no a logra vense malesa ni pone fin na morto, ni sikiera pa un solo persona. Gobernashon humano no a eliminá guera, violensia, krímen, korupshon ni pobresa. Den hopi pais, ainda gobièrnunan opresivo ta dominá hende. (Eklesiástes 8:9) Teknologia, golosidat i ignoransia ta faktornan ku huntu ta kontaminá tera, awa i aire. Debí na e mal maneho ekonómiko di outoridatnan ta difísil pa hopi hende haña e nesesidatnan di bida. Míles di aña di gobernashon humano a demostrá e echo aki bon kla: “E kaminda di hende no ta di dje mes; tampoko no ta keda na hende pa dirigí su pasonan.”—Yeremías 10:23.

2. Kiko ta e úniko solushon pa e problemanan di humanidat?

² Kiko ta e solushon? E Reino di Dios. I ta p’e Reino ei Hesus a siña su siguidónan pidi den orashon: “Ku bo reino bin. Ku bo boluntat sosodé na tera meskos ku den shelu.” (Mateo 6:9, 10) Na 2 Pedro 3:13, Dios su Reino selestial ta ser deskribí komo e “shelunan nobo” ku lo bai goberná riba e “tera nobo,” esta, un sosiedat humano hustu. Dios su Reino selestial ta asina importante ku Hesus a hasié e tema sentral di su predikashon. (Mateo 4:17) El a mustra ku e Reino ei mester tin prioridat den nos bida, bisando: “Ma buska promé e reino di Dios i Su hustisia.”—Mateo 6:33.

3. Dikon ta hopi urgente awe pa hende siña tokante e Reino di Dios?

³ Awor akí ta masha urgente pa hende siña tokante e Reino di Dios, ya ku pronto e Reino ei lo tuma akshon pa kambia e gobernashon dje tera aki pa semper. Daniel 2:44 ta profetisá: “Den e dianan di e reinan ei [gobièrnunan ku ta na mando awor] e Dios di shelu lo lanta un reino [den shelu] ku nunka lo no wòrdu destruí, i e reino ei lo no pasa pa ningun otro pueblo [nunka mas hende lo bolbe goberná mundu]; e lo garna i pone un fin na tur e reinonan aki [aktualmente], ma e mes lo dura pa semper.” Pues e Reino lo pone fin na e último dianan aki dor di destruí henter e aktual sistema di kosnan malbado. E ora ei e Reino selestial lo ta indiskutiblemente na enkargo di gobernashon dje tera. Nos mester ta hopi gradisidu ku e alivio ku esaki lo trese ta masha serka!

4. Kiko a tuma lugá den shelu na 1914 en konekshon ku e Reino, i dikon esei ta importante pa nos?

⁴ Na 1914, Kristu Hesus a keda instalá komo Rei i a haña outorisashon pa “goberná meimei di [su] enemigunan.” (Salmo 110:1, 2) E aña ei tambe “e último dianan” dje sistema di kosnan malbado aki a kuminsá. (2 Timoteo 3:1-5, 13) Na mesun tempu, susesonan ku Daniel a mira den vishon profétiko, de echo a tuma lugá den shelu. “E Ansiano di Dianan,” Yehova Dios, a duna e Yu di hende, Hesukristu, “dominio, gloria i un reino, pa tur pueblo, nashon i hende di tur idioma por sirbié.” Papiando tokante e vishon, Daniel a skirbi: “Su dominio ta un dominio eterno ku lo no pasa nunka, i su reino ta un ku lo no wòrdu destruí.” (Daniel 7:13, 14) Ora Dios a pone nos promé mayornan humano den Paradeis tabata su propósito pa e duna hende un sinfin di kos bon. Ta mediante e Reino selestial aki den man di Kristu Hesus, Dios lo hasi posibel pa amante di hustisia gosa di tur esakinan.

5. Ki detayenan relashoná ku e Reino ta interesá nos mashá, i dikon?

⁵ Bo ta deseá di ta un fiel siudadano dje Reino? Si ta asina, lo bo ta masha interesá pa sa kon e gobièrnu selestial aki ta organisá i funshoná. Lo bo kier sa kiko e ta hasiendo awor, kiko lo e logra den futuro i kiko e ta eksigí di bo. Segun ku bo ta analisá e Reino kuidadosamente, bo apresio p’e lo oumentá. Si bo reakshoná bon riba su gobernashon, lo bo ta mihó ekipá pa konta otro hende tokante e kosnan maravioso ku e Reino di Dios lo hasi pa humanidat obediente.—Salmo 48:12, 13.

E Gobernantenan dje Reino di Dios

6. (a) Segun e Skritura, ta ken su gobernashon supremo ta ser manifestá mediante e Reino Mesiániko? (b) Loke nos siña tokante e Reino mester tin ki influensia riba nos?

⁶ Un dje promé kosnan ku tal análisis ta revelá ta ku e Reino Mesiániko aki ta un manera ku Yehova ta manifestá su propio gobernashon supremo. Ta Yehova ta esun ku a duna su Yu “dominio, gloria i un reino.” Despues ku Dios a duna su Yu poder pa kuminsá goberná komo Rei, bosnan den shelu a deklará apropiadamente: “E reino di mundu a bira e reino di nos Señor [Yehova Dios], i di Su Kristu; i e [Yehova] lo reina pa semper i semper.” (Revelashon 11:15) P’esei tur loke nos siña tokante e Reino aki i loke e ta logra, por hala nos mas serka di Yehova. Loke nos siña mester lanta den nos e deseo di someté nos mes na su gobernashon supremo pa semper.

7. Dikon nos ta masha interesá den e echo ku ta Hesukristu ta Yehova su Gobernante Asistente?

⁷ Konsiderá tambe e echo ku Yehova a pone Hesukristu riba trono komo su Gobernante Asistente. Komo e Trahadó Eksperto ku Dios a usa pa traha tera i hende, Hesus konosé nos nesesidatnan mihó ku nos mes. Ademas, for di prinsipio di historia humano el a demostrá ku su “delisia tabata den e yunan di hende.” (Proverbionan 8:30, 31; Kolosensenan 1:15-17) Su amor pa hende tabata asina grandi, ku e mes a bini na tera i a duna su bida komo reskate pa nos. (Huan 3:16) Asina el a perkurá e medio pa libra nos di piká i morto i habri e oportunidat pa nos haña bida eterno.—Mateo 20:28.

8. (a) Na kontraste ku gobernashonnan humano, dikon e gobièrnu di Dios lo dura? (b) Ki relashon e “esklabo fiel i prudente” tin ku e gobièrnu selestial?

⁸ E Reino di Dios ta un gobièrnu stabil i permanente. Nos tin e garantia ku lo e dura debí n’e echo ku Yehova mes no por muri. (Habakuk 1:12, SAB) Na kontraste ku reinan humano, Hesukristu, esun na ken Dios a konfia e reinado, tambe ta inmortal, e no por muri. (Romanonan 6:9; 1 Timoteo 6:15, 16) Huntu ku Kristu riba trono selestial lo tin 144.000 persona mas, fiel sirbidónan di Dios for di “tur tribu i lenga i pueblo i nashon.” Nan tambe ta haña bida inmortal. (Revelashon 5:9, 10; 14:1-4; 1 Korintionan 15:42-44, 53) E gran mayoria di e 144.000 ta den shelu kaba, i e restu di nan ku ainda ta riba tera ta forma e “esklabo fiel i prudente” djawe, ku fielmente ta promové asuntunan relashoná ku e Reino ei aki riba tera.—Mateo 24:45-47.

9, 10. (a) Ki influensianan ku ta korumpí hende i kousa desunion e Reino lo eliminá? (b) Si nos no kier bira enemigu dje Reino di Dios nos mester evitá di ta enbolbí den kiko?

⁹ Djis akí, na Yehova su tempu señalá, lo e manda su ehérsito di ehekushon drenta den akshon pa limpia mundu. Nan lo destruí pa semper e hendenan ku di nan propio boluntat ta nenga di rekonosé Yehova su gobernashon supremo, i ta trata ku despresio e areglonan amoroso ku e ta hasi mediante Hesukristu. (2 Tesalonisensenan 1:6-9) Esei lo ta e dia di Yehova, e tempu tan sperá p’e demostrá fuera di tur duda ku e ta e Soberano di universo. “Mira, e dia di SEÑOR ta bin, kruel, ku furia i ku rabia ardiente, . . . i e lo kaba ku e pekadornan ku tin den [e tera].” (Isaías 13:9) “E dia ei ta un dia di furia, un dia di problema i angustia, un dia di destrukshon i desolashon, un dia di skuridat i tiniebla, un dia di nubia i skuridat profundo.”—Sofonías 1:15.

¹⁰ Tur religion falsu i tur gobièrnu humano i nan ehérsitonan ku e gobernante malbado invisibel dje mundu aki tabata manipulá, lo ser destruí pa semper. Ken ku ta indiká ku nan ta na banda di e mundu aki dor di sigui un estilo di bida egoista, desonesto i inmoral, lo ser destruí. Lo kita Satanas i su demoñonan for di tur kontakto ku e habitantenan di mundu; nan lo keda enkarselá den abismo pa mil aña. E ora ei e Reino di Dios lo tin kòntròl total riba tur asuntu di mundu. Ki un alivio esei lo ta pa tur amante di hustisia!—Revelashon 18:21, 24; 19:11-16, 19-21; 20:1, 2.

Kon e Reino Ta Logra Su Metanan

11. (a) Kon e Reino Mesiániko lo kumpli ku Yehova su propósito p’e tera? (b) Kiko e gobernashon dje Reino lo nifiká pa hende ku ta biba riba tera e tempu ei?

¹¹ E Reino Mesiániko lo kumpli kompletamente ku Dios su propósito original p’e tera. (Génesis 1:28; 2:8, 9, 15) Te awe, humanidat no ta apoyá e propósito ei. Sin embargo, “e mundu ku ta bin” lo ta sometí na e Yu di hende, Hesukristu. Tur hende ku sobrebibí e huisio ku Yehova trese riba e sistema bieu aki, lo traha unidamente bou di Kristu e Rei. Gustosamente nan lo hasi tur loke e manda, i asina tera ta bira un paradeis mundial. (Hebreonan 2:5-9) Henter humanidat lo disfrutá dje obra di nan mannan i lo benefisiá plenamente dje abundansia ku tera lo produsí.—Salmo 72:1, 7, 8, 16-19; Isaías 65:21, 22.

12. Kon e siudadanonan dje Reino lo logra perfekshon di mente i kurpa?

¹² Ora Dios a krea Adam ku Eva, nan tabata perfekto, i tabata su propósito pa yena e tera ku nan yunan, i pa nan tur huntu disfrutá di perfekshon di mente i kurpa. Bou di gobernashon dje Reino e propósito ei lo bira un realidat magnífiko. Pa logra esaki mester kita tur e efektonan di piká, i p’esei Kristu ta sirbi no solamente komo Rei sino tambe komo Sumo Saserdote. Ku pasenshi lo e yuda su siudadanonan obediente benefisiá dje sakrifisio di su propio bida humano ku tin e balor di kita piká.

13. Ki benefisionan físiko lo ser realisá bou di gobernashon dje Reino?

¹³ Bou dje gobernashon di Reino, e habitantenan di tera lo haña benefisionan físiko maravioso. “E ora ei wowo di e siegunan lo mira, i orea di e surdunan lo tende. Anto e kohonan lo bula manera biná, i lenga di e muda lo grita di alegria.” (Isaías 35:5, 6) Kueru desfigurá dor di behes òf malesa, lo bira mas yòn ku di un mucha, i na lugá di malesa króniko lo tin bon salú. “Laga su karni bira mas suave ku esun di mucha, lagu’é bolbe na e dianan di vigor di su hubentut.” (Job 33:25) Lo yega e dia ku ningun hende lo tin motibu pa bisa: “Mi ta malu.” Dikon? Pasobra hende temeroso di Dios lo ser librá dje karga di piká i di su efektonan penoso. (Isaías 33:24; Lukas 13:11-13) Sí, Dios “lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.”—Revelashon 21:4.

14. Yega na perfekshon humano ta enserá kiko?

¹⁴ Sin embargo, yega na perfekshon ta enserá hopi mas ku haña un kurpa sano i un mente sano. E ta enserá reflehá Yehova su kualidatnan debidamente, ya ku nos a ser trahá ‘den Dios su imágen, konforme su semehansa.’ (Génesis 1:26) Hopi edukashon mester tuma lugá pa logra esei. Den e mundu nobo, ‘hustisia lo biba.’ P’esei, manera Isaías a profetisá, “e habitantenan di mundu ta siña hustisia.” (2 Pedro 3:13; Isaías 26:9) E kualidat aki ta hiba na pas; pas entre hende di tur rasa, pas entre amistatnan íntimo, pas den famia i riba tur kos, pas ku Dios mes. (Salmo 85:10-13; Isaías 32:17) Esnan ku siña hustisia, progresivamente lo siña kiko ta Dios su boluntat pa nan. Segun ku amor pa Yehova ta bira firme den nan kurason, nan lo sigui su normanan i su manera di hasi kos den tur aspekto di nan bida. Nan lo por bisa meskos ku Hesus: ‘Semper mi ta hasi e kosnan ku ta agradá mi Tata.’ (Huan 8:29) Esta dushi bida lo ta ora esei ta e kaso di henter humanidat!

Logronan Ku Ta Bisto Kaba

15. Usa e preguntanan den e paragraf aki pa destaká algun logro dje Reino i mustra kiko nos lo mester ta hasiendo awor.

¹⁵ E logronan impreshonante dje Reino di Dios i di su siudadanonan ta bisto. E siguiente preguntanan i tekstonan bíbliko lo kòrda bo di algun dje logronan aki, i tambe di loke tur siudadano dje Reino por hasi i lo mester ta hasiendo awor.

Kontra ken e Reino a tuma akshon promé, i ku ki resultado? (Revelashon 12:7-10, 12)

Reunimentu huntu dje miembronan ku a sobra di kua grupo ta risibí atenshon desde ku Kristu a ser entronisá? (Revelashon 14:1-3)

Manera ta pará skirbí na Mateo 25:31-33, ki trabou Hesus a profetisá ku lo e hasi despues ku e gran tribulashon kuminsá?

Ki trabou preliminar ta tumando lugá awe? Ken ta partisipá den dje? (Salmo 110:3; Mateo 24:14; Revelashon 14:6, 7)

Kon bini opositornan polítiko i religioso no por a stòp e trabou di prediká? (Zakarías 4:6; Echonan 5:38, 39)

Ki kambionan a tuma lugá den bida di esnan ku ta someté nan mes na e gobernashon dje Reino? (Isaías 2:4; 1 Korintionan 6:9-11)

Reino di Mil Aña

16. (a) Pa kuantu tempu Kristu lo reina? (b) Ki kosnan maravioso lo tuma lugá durante i despues di e tempu ei?

¹⁶ Despues di sera Satanas i su demoñonan den abismo, Hesukristu i su 144.000 ko-heredero lo goberná komo rei i saserdote pa mil aña. (Revelashon 20:6) Durante e periodo ei, humanidat lo bira perfekto, i piká i morto kousá dor di Adam lo keda eliminá pa semper. Na fin dje Reinado di Mil Aña, despues di a kumpli eksitosamente ku su asignashon komo Rei i Saserdote Mesiániko, Hesus “ta entregá e reino” na su Tata, “pa Dios por ta tur [kos] den tur.” (1 Korintionan 15:24-28) E ora ei, Satanas lo ser librá for di abismo pa un poko tempu pa tèst humanidat reskatá, pa wak si nan lo apoyá Yehova su derecho di goberná komo esun supremo den universo. Despues ku kompletá e tèst final ei, Yehova lo destruí Satanas i e rebeldenan ku a tuma parti p’e. (Revelashon 20:7-10) Esnan ku a apoyá Yehova su soberania—su derecho di goberná—lo a demostrá kabalmente nan fieldat inkebrantabel. E ora ei nan lo drenta den un relashon apropiado ku Yehova, i lo e aseptá nan komo su yunan hòmber i muhé, divinamente aprobá pa bida eterno.—Romanonan 8:21.

17. (a) Kiko lo pasa ku e Reino na fin dje mil aña? (b) Den ki sentido ta sierto ku e Reino “nunka lo no wòrdu destruí”?

¹⁷ Pues, e papel di Hesus i esun dje 144.000 lo kambia relashoná ku tera. Kiko lo ta nan siguiente aktividat? Beibel no ta bisa. Pero si nos apoyá Yehova su soberania fielmente, nos lo ta na bida na fin dje Reinado di Mil Aña pa haña sa kiko ta Yehova su propósito pa nan i tambe pa su universo impreshonante. Pero tòg, Kristu su gobernashon di mil aña “ta un dominio eterno” i su Reino “lo no wòrdu destruí.” (Daniel 7:14) Den ki sentido? Un faktor ta ku e outoridat di goberná lo no kai den man di personanan ku tin otro meta, ya ku Yehova lo ta e Gobernante. Tambe, e Reino “nunka lo no wòrdu destruí” pasobra su logronan lo keda pa semper. (Daniel 2:44) I e Rei-Saserdote Mesiániko huntu ku su ko-gobernantenan rei-saserdote lo ser onrá pa semper debí na nan fiel sirbishi na Yehova.

Komo Repaso

• Dikon e Reino di Dios ta e úniko solushon pa e problemanan di humanidat? Na ki tempu e Rei dje Reino di Dios a kuminsá goberná?

• Kiko en partikular abo ta gusta tokante e Reino di Dios i di loke lo e logra?

• Ki logronan dje Reino nos por mira kaba, i ki partisipashon nos tin den esakinan?

[Plachi na página 92, 93]

Bou di e Reino di Dios, tur hende lo siña hustisia