Interes den e Oyente

ORA nos ta prediká bèrdatnan bíbliko, nos tin ku hasi mas ku djis transmití informashon na mente di hende. Nos tin ku yega na nan kurason. Un manera pa logra esei ta dor di mustra interes personal i sinsero den nos oyentenan. Nos por mustra e interes ei den vários manera.

Tene Kuenta ku Loke Bo Oyentenan Ta Pensa. Apòstel Pablo a tene kuenta ku e background i mentalidat di esnan ku a skuch’é. El a splika: “Pa e hudiunan mi a bira manera un hudiu, pa mi por gana e hudiunan; pa esnan ku ta bou di Lei mi a bira manera bou di Lei, maske mi mes no ta bou di Lei, pa mi por gana esnan ku ta bou di Lei. Pa esnan ku ta sin lei, mi a bira manera un hende sin lei, ounke mi no ta sin lei di Dios, ma bou di lei di Kristu, pa mi por gana esnan ku ta sin lei. Pa e debilnan mi a bira debil, pa mi por gana e debilnan; mi a bira tur kos pa tur hende, pa di tur manera mi por salba algun. I mi ta hasi tur kos pa kousa di evangelio, pa mi por tuma parti den dje.” (1 Kor. 9:20-23) Kon nos awe por ‘bira tur kos pa tur sorto di hende’?

Si bo tin e chèns di opservá e personanan, maske ta pa un instante promé ku bo papia ku nan, bo por haña un idea di nan sirkunstansia i di loke ta interesá nan. Bo por saka afó ki trabou e doño di kas ta hasi? Bo ta mira ophetonan ku ta revelá su kreensianan religioso òf su situashon di famia? A base di loke bo a opservá, ta posibel ahustá bo presentashon pa hasié mas interesante pa bo oyente?

Pa bo por hasi bo presentashon mas interesante, bo tin ku pensa di antemano kon lo bo introdusí bo mes na e hendenan den bo teritorio. Den algun área nos ta asta haña hendenan prosedente di otro pais. Si esei ta e kaso den bo teritorio, bo a haña un manera efikas pa duna nan testimonio? Ya ku ta Dios su boluntat pa “tur [sorto di] hende wòrdu salbá i yega na konosementu di e bèrdat,” bo tin ku hasi esfuerso pa semper presentá e mensahe di Reino den un manera atraktivo na ken ku bo topa.—1 Tim. 2:4.

Skucha Atentamente. Ounke Yehova ta kapas pa sa kiko ku e kier, e ta skucha otro hende. Profeta Mikaias a haña un vishon den kua el a mira Yehova ta animá e angelnan pa ekspresá nan idea riba e manera pa trata un sierto asuntu. Despues Dios a permití un di e angelnan bai hasi loke esun a sugerí. (1 Rei. 22:19-22) Ora Abraham a ekspresá su preokupashon pa e sentensia kontra Sódoma, Yehova tabatin e bondat di para skuch’é. (Gén. 18:23-33) Kon nos por imitá Yehova su ehèmpel di skucha den sirbishi di vèlt?

Animá hende pa ekspresá nan mes. Hasi un pregunta apropiá i pousa un ratu pa nan por kontest’é. Skucha atentamente. Bo atenshon lo animá nan pa papia libremente. Si nan kontesta revelá algu di loke ta interesá nan, ku takto hasi algun pregunta mas. Purba konosé e persona mihó, pero sin hasi muchu pregunta personal. Ki ora ku por, elogi’é sinseramente pa loke e ta pensa. Asta si bo no ta di akuerdo ku su punto di bisa, aseptá su komentarionan ku amabilidat.—Kol. 4:6.

Pero nos mester tene kuidou pa nos interes den hende no bai mas aleu di loke ta aseptabel. E echo ku nos ta interesá den hende no kier men ku nos a haña lus bèrdè awor pa por mete den nan asuntunan privá. (1 Ped. 4:15) Si nos ta prediká na un persona di e sekso opuesto, nos tin ku tene kuidou pa e no malinterpretá nos amabilidat. Nos mester usa sano huisio, pasobra loke ta ser konsiderá interes aseptabel den otro hende ta varia di un pais pa otro, i asta di un persona pa otro.—Luk. 6:31.

Preparashon ta yuda nos bira bon skuchadó. Pasobra si nos tin un idea kla di loke nos kier bisa e doño di kas, nos lo ta relahá i di mes nos lo paga tinu na loke e ta bisa. I e na su turno lo sintié kómodo i mas inkliná na kòmbersá ku nos.

Nos ta onra otro hende dor di skucha nan. (Rom.12:10) Asina nos ta mustra nan ku nos ta duna balor na nan ideanan i sintimentunan. Esei por pone nan presta asta mas atenshon na nos mensahe. Ku bon motibu anto e Palabra di Dios ta konsehá nos pa “ta lihé pa tende, no lihé pa papia.”—Sant. 1:19.

Yuda Otro Hende Progresá. Nos interes den otro hende lo motivá nos pa sigui pensa riba esnan ku mustra interes i bolbe bishitá nan pa kompartí e bèrdatnan bíbliko ku mas ta satisfasé nan nesesidatnan. Promé ku e siguiente bishita, pensa riba loke bo sa kaba di e persona. Prepará informashon riba un tema ku ta preokup’é. Enfatisá e balor práktiko di e informashon, i yud’é mira kon e por benefisiá di loke e ta siñando.—Isa. 48:17.

Si bo oyente konta bo di un situashon òf problema ku ta preokup’é, konsiderá esaki komo un bon chèns pa kompartí e bon nobo kuné. Sigui e ehèmpel di Hesus, kende semper tabata kla pa konsolá hende den angustia. (Mar. 6:31-34) Resistí e tentashon di ofresé un solushon rápido òf di duna un konseho superfisial, pasobra esaki lo por laga e persona sinti ku bo no ta sinseramente interesá den dje. Mas bien, mustra kompashon. (1 Ped. 3:8) Despues buska informashon den e publikashonnan bíbliko, i kompartí nan kuné pa yud’é trata ku su situashon. Klaru ku debí na e interes ku bo tin den bo oyente, lo bo no bai revelá asuntunan konfidensial ku el a konta bo, a ménos ku tin bon motibu pa esei.—Pro. 25:9.

Nos mester mustra interes personal foral den esnan ku nos ta studia Beibel kuné. Resa pidi Yehova yuda bo komprondé e nesesidatnan di kada un di nan i prepará e studio ku nan nesesidatnan na mente. Puntra bo mes: ‘Kiko e persona aki tin ku hasi awor p’e sigui progresá den sentido spiritual?’ Ku amor yud’é mira e balor di loke Beibel i e publikashonnan di “e esklabo fiel i prudente” ta bisa di e asuntu. (Mat. 24:45) Den algun kaso, kisas un splikashon so no ta basta. Podisé bo tin ku hasi algu huntu ku e studiante pa mustr’é kon pa pone un sierto prinsipio bíbliko na práktika.—Huan 13:1-15.

Nos mester usa sano huisio i ser balansá pa por yuda e studiantenan pone nan bida na armonia ku e normanan di Yehova. Kada un tin nan background i abilidat, i no ta tur ta progresá mes lihé. Sea rasonabel den loke bo ta spera di nan. (Fil. 4:5, NW) No pone preshon riba nan pa hasi kambio den nan bida. Mas bien, laga Dios su Palabra i spiritu motivá nan. Yehova kier pa hende sirbié ku un kurason boluntario, no obligá. (Sal. 110:3) Evitá di ekspresá bo opinion riba desishonnan personal ku otro hende tin ku tuma, i asta ora nan pidi bo duna bo opinion, no disidí pa nan.—Gal. 6:5.

Duna Yudansa Práktiko. Ounke Hesus a preokupá prinsipalmente pa e bienestar spiritual di su oyentenan, e tabata interesá den nan otro nesesidatnan tambe. (Mat. 15:32) Asta si nos tin poko rekurso, tin hopi manera práktiko ku nos por yuda.

Interes den otro hende lo pone nos tene konsiderashon ku nan. Por ehèmpel, si kondishon di wer ta kousa molèster pa bo oyente, hala bai na un lugá mas adekuá òf hasi areglo pa sigui ku e kòmbersashon un otro dia. Si bo a pasa na un momentu inoportuno, ofresé e persona pa bolbe mas despues. Si un bisiña òf un persona interesá ta malu òf na hospital, mustra bo interes dor di manda un karchi p’e òf un karta kòrtiku òf pasa hasié un bishita. Si ta apropiá, lo bo por hiba un kuminda simpel p’e òf hasi kualkier otro akto di bondat.

Segun ku studiantenan di Beibel ta progresá, kisas nan ta sinti un bashí emoshonal dor ku nan no ta pasa dje hopi tempu ei mas ku nan amistatnan di ántes. Abo bira nan amigu. Dediká tempu na papia ku nan despues di e studio bíbliko i na otro okashonnan. Animá nan pa buska bon kompania. (Pro. 13:20) Yuda nan asistí na reunionnan kristian. Sinta huntu ku nan durante e programa i yuda nan ku nan yunan, di manera ku nan tur por saka mas tantu probecho di e informashon.

Mustra Interes Sinsero. Mustra interes den hende no ta un téknika ku bo mester siña dominá, e ta algu ku ta sali di kurason. E grado di nos interes ta bisto den vários manera: na e manera ku nos ta skucha hende, na loke nos ta bisa nan, i na e bondat i konsiderashon ku nos ta mustra nan. Asta ora nos no bisa ni hasi nada, nos aktitut i nos ekspreshon di kara lo laga nan sa ku di bèrdat nos tin nan bienestar na pechu.

E motibu mas importante pa mustra interes sinsero den otro hende ta ku dor di hasi esei, nos ta imitá e amor i miserikòrdia di nos Tata selestial. Asina nos ta yuda nos oyentenan hala mas serka di Yehova i mas serka di e mensahe ku el a manda nos plama. P’esei, segun ku bo ta kompartí e bon nobo, hasi un esfuerso pa “no buska [bo] interes personal so, ma buska tambe interes di otronan.”—Fil. 2:4.