‘E Evangelio Akí Lo Wòrdu Prediká’!
1. Kiko ta mustra nos ku nada no por stòp e trabou di prediká?
1 No tin nada ku por stroba Yehova di kumpli ku su boluntat. (Isa. 14:24) Ounke a parse imposibel pa Hues Gideon i su 300 hòmbernan gana e bataya kontra e ehérsito di 135.000 madianita, Yehova a bis’é: “Bai . . . i libra Israel for di man di Madian. No ta ami a manda bo?” (Hues. 6:14) Ki trabou tin Yehova su sosten awe? Hesus a bisa: “E evangelio akí di e reino lo wòrdu prediká den henter mundu komo un testimonio na tur nashon.” (Mat. 24:14) Ningun hende no por stòp e trabou akí!
2. Dikon nos por spera ku Yehova lo yuda kada un di nos den e ministerio?
2 Yehova Ta Yuda Kada un di Nos: Nos tin sigur ku Yehova lo yuda su Testigunan logra éksito komo grupo. Pero nos por spera ku lo e yuda kada un di nos? Durante un tempu di nesesidat, apòstel Pablo personalmente a eksperensiá Yehova su sosten mediante su Yu, Hesus. (2 Tim. 4:17) Nos por tin konfiansa ku n’e mesun manera Yehova lo bendishoná esfuerso di kada un di nos pa nos por logra kumpli ku su boluntat.—1 Juan 5:14.
3. Den ki sirkunstansianan Yehova ta yuda nos?
3 Ansiedat di bida ta laga bo ku masha tiki energia pa bo kumpli ku bo ministerio? “E ta duna forsa na esun kansá.” (Isa. 40:29-31) Bo ta enfrentá persekushon òf oposishon? “Tira bo karga riba SEÑOR, i e lo sostené bo.” (Sal. 55:22) Tin bes bo sa sinti ku bo falta konfiansa? “Bai . . . i ami, sí ami, lo ta ku bo boka.” (Eks. 4:11, 12) Bo no por hasi hopi den sirbishi debí ku bo tin problema ku salú? Yehova ta balorá e esfuerso ku bo ta hasi di henter bo kurason i por usa esei sin importá kon tiki e ta.—1 Kor. 3:6, 9.
4. Ki efekto konfiansa den Yehova lo tin riba nos?
4 Yehova su man ta “ekstendí, ken por hal’é bèk?” (Isa. 14:27) Ku konfiansa den Yehova su bendishon riba nos ministerio, laga nos sigui prediká sin stòp “ku tur frankesa [“pa medio di outoridat di Yehova,” NW].”—Echo. 14:3.