Edifikante i Positivo

E MENSAHE ku nos a ser asigná pa prediká ta un evangelio, es desir, un bon notisia. Hesus a bisa: “E evangelio mester wòrdu prediká promé na tur nashon.” (Mar. 13:10) Hesus mes a pone un ehèmpel dor di presentá “e bon notisia tokante reino di Dios.” (Luk. 4:43, BPK) Loke e apòstelnan a prediká tambe ta ser deskribí komo “e evangelio di Dios” i “e evangelio di Kristu.” (1 Tes. 2:2; 2 Kor. 2:12) E mensahe ei ta edifikante i positivo.

Na armonia ku e “evangelio eterno” ku e ‘angel ku ta bula meimei di shelu’ ta deklará, nos ta hasi un yamada riba hende pa nan: “Teme Dios i dun’é gloria.” (Rev. 14:6, 7) Rònt mundu nos ta papia ku hende tokante e Dios berdadero, tokante su nòmber, su kualidatnan magnífiko, su obranan maravioso, su propósito amoroso, su rekisitonan i ku un dia nos tin ku rindi kuenta na dje. E bon nobo ta inkluí e echo ku Yehova Dios lo destruí e malbadonan, kendenan ta desonr’é i ta kousa hopi sufrimentu pa otro hende. Pero no ta keda na nos pa husga e personanan ku nos ta prediká na dje. Nos deseo sinsero ta pa e mayor kantidat posibel reakshoná faborabel na e mensahe di Beibel di manera ku esaki lo resultá di ta realmente un bon notisia pa nan.—Pro. 2:20-22; Huan 5:22.

Limitá Informashon Negativo. Klaru ku bida tin su kosnan negativo, i nos no ta sera wowo pa e realidatnan ei. Pa kuminsá un kòmbersashon, bo por plantia un problema ku ta preokupá hende den bo teritorio i komentá brevemente riba dje. Pero por lo general, no tin sentido pa bai den hopi detaye. Konstantemente hende ta tende notisia ku ta kousa angustia, p’esei si nos tambe bin papia tokante kosnan desagradabel nos por pone nan sera porta òf sera nan orea. P’esei den bo kòmbersashon, purba dirigí atenshon na e bèrdatnan refreskante di e Palabra di Dios mas pronto posibel. (Rev. 22:17) E ora ei, asta si e persona no kier sigui ku e kòmbersashon, bo a lag’é ku algu edifikante pa pensa ariba, i talbes na un otro okashon lo e ta mas dispuesto pa skucha.

Asina tambe, si bo haña invitashon pa duna un diskurso, no yena bo ouditorio ku informashon negativo djis pasobra esei ta loke ta reina tur kaminda. Si e oradó keda papia muchu largu riba e frakaso di gobernantenan humano, di kriminalidat i violensia, i di e inmoralidat ku ta reina, su diskurso por desanimá e ouditorio. Referí na e aspektonan negativo di e tema solamente si nan ta sirbi un propósito útil. Tin biaha, dor di menshoná djis algun kos negativo bo por enfatisá kon oportuno bo diskurso ta. Tambe esei por identifiká e faktornan importante ku a kontribuí na sierto situashon i di e manera ei bo por mustra e balor práktiko di e solushon ku Beibel ta ofresé. Hasi esfuerso pa bo ta spesífiko pero sin amplia muchu riba e problemanan.

Normalmente no ta posibel ni kumbiniente pa eliminá tur informashon negativo for di un diskurso. E reto ta pa presentá e fasetanan positivo i negativo di tal manera ku e efekto general ta positivo. Pa logra esaki bo mester determiná kiko pa inkluí, kiko pa laga afó i kiko pa enfatisá. Den e Sermon Riba Seru, Hesus a konsehá su oyentenan pa evitá e práktikanan egoista di e eskriba- i fariseonan, i el a sita un par di kaso komo ehèmpel. (Mat. 6:1, 2, 5, 16) Sin embargo, en bes di keda amplia riba e ehèmpelnan negativo di e lidernan religioso ei, Hesus a enfatisá e importansia di komprondé e kamindanan berdadero di Dios i sigui nan. (Mat. 6:3, 4, 6-15, 17-34) E efekto tabata sumamente positivo.

Mantené un Tono Positivo. Si bo haña e asignashon pa duna un diskurso den bo kongregashon riba un aspekto di aktividat kristian, sòru pa bo ta konstruktivo, i no krítiko. Wak bon pa bo mes ta un bon ehèmpel den loke bo ta animando otronan pa hasi. (Rom. 2:21, 22; Heb. 13:7) Bo palabranan mester ta motivá pa amor i no pasobra bo ta malkontentu. (2 Kor. 2:4) Si bo tin sigur ku bo rumannan den fe kier agradá Yehova, bo palabranan lo reflehá e konfiansa ei, i esaki lo tin un efekto benefisioso. Ripará kon apòstel Pablo a ekspresá e konfiansa ei na 1 Tesalonisensenan 4:1-12; 2 Tesalonisensenan 3:4, 5; i Filemon 4, 8-14, 21.

Tin biaha e ansianonan tin ku spièrta e rumannan kontra kondukta ku no ta sabí. Pero humildat lo yuda nan trata ku nan rumannan ku un spiritu di suavedat. (Gal. 6:1) E manera ku nan ta bisa kosnan mester reflehá e rèspèt ku nan tin pa e miembronan di kongregashon. (1 Ped. 5:2, 3) Beibel ta konsehá hòmbernan mas hóben pa tene masha kuenta ku esaki. (1 Tim. 4:12; 5:1, 2; 1 Ped. 5:5) Ora e ansianonan tin ku reprendé, eduká òf korigí, nan mester hasié a base di loke Beibel mes ta bisa. (2 Tim. 3:16) E oradó nunka mester bai mas ayá ku e aplikashon di un teksto djis pa apoyá un idea personal ku e gusta. Asta ora mester duna konseho pa korigí un asuntu, e diskurso por keda positivo si e diskursante pone mas énfasis riba e manera pa evitá mal kondukta, pa solushoná problema, pa vense difikultat, pa korigí un mal proseder i tambe riba e protekshon ku e rekisitonan di Yehova ta brinda nos.—Sal. 119:1, 9-16.

Ora bo ta prepará bo diskurso, reflekshoná riba e manera ku bo mester konkluí kada punto prinsipal, i tambe e diskurso den su totalidat. Loke bo bisa último ta loke hende lo keda kòrda mas tempu. Bo konklushon lo ta positivo?

Ora Nos Ta Kòmbersá ku Rumannan den Fe. Sirbidónan di Yehova ta balorá e oportunidat ku reunionnan kristian ta brinda pa asosiá ku nan rumannan den fe. Esakinan ta okashonnan refreskante den sentido spiritual. Beibel ta animá nos mashá pa kòrda “enkurashá otro” ora nos reuní na nos lugánan di adorashon. (Heb. 10:25) Nos ta hasi esei no solamente ku nos diskurso- i komentarionan durante reunion, sino tambe dor di kòmbersá ku otro promé i despues di reunion.

Ounke ta normal pa nos kòmbersá riba asuntunan di bida diario, loke ta animá nos mas tantu ta e temanan spiritual, manera por ehèmpel, e eksperensianan ku nos tabatin den sirbishi sagrado. Tambe ta edifikante pa nos mustra interes sano den otro.

Nos mester tene kuidou pa e mundu rònt di nos no influensiá nos. Ora Pablo a skirbi e kristiannan na Efeso, el a bisa: “Poniendo mentira un banda, kada un di boso papia bèrdat ku su próhimo.” (Efe. 4:25) Papia bèrdat en bes di mentira ta enserá ku nos no ta glorifiká e kosnan ni e hendenan ku mundu ta atmirá komo ídolo. Asina tambe Hesus a spièrta nos kontra “e engaño di rikesa.” (Mat. 13:22) P’esei ora nos ta papia ku otro, nos mester tene kuidou pa nos no promové e engaño ei dor di hasi komo si fuera poseshon di kosnan material ta algu masha atraktivo.—1 Tim. 6:9, 10.

Apòstel Pablo ta konsehá nos pa ta edifikante i no husga òf menospresiá un ruman ku kisas ta evitá sierto kosnan pasobra e ta “débil den fe,” es desir, pasobra e no ta komprondé kon leu e libertat kristian ta bai. De echo, pa nos kòmbersashon por ta edifikante, nos tin ku tene kuenta ku e background i nivel di desaroyo spiritual di nos oyentenan. Lo ta masha tristu si nos ‘pone opstákulo òf piedra di trompeká den un ruman su kaminda.’—Rom. 14:1-4, 13, 19.

Un ruman ku ta lucha ku problemanan personal grave—por ehèmpel, un malesa króniko—ta apresiá un kòmbersashon edifikante. Kisas e persona ei ta hasi hopi esfuerso pa asistí na reunion. Esnan ku konosé su situashon podisé ta puntr’é kon e ta sinti. Ounke sin duda e ta apresiá nan interes, no ta tur ora e tin gana di papia tokante su estado di salú. Talbes palabranan di apresio i di elogio lo enkurash’é mas tantu. Bo ta mira prueba di su amor konstante pa Yehova i di su perseveransia den un situashon difísil? E ta animá bo ora e duna komentario? En bes di enfoká riba su limitashonnan, lo no ta mas edifikante pa destaká su puntonan fuerte i loke e ta hasi na fabor di e kongregashon?—1 Tes. 5:11.

Pa nos kòmbersashon edifiká otro hende, ta masha importante pa nos tene kuenta ku Yehova su opinion di loke nos ta papiando. Den Israel di pasado, Yehova a rabia mashá ku esnan ku a papia kontra su representantenan i a keha tokante e mana. (Num. 12:1-16; 21:5, 6) Ora nos ta mustra rèspèt pa e ansianonan i apresio pa e alimento spiritual ku ta ser perkurá via e esklabo fiel i prudente, nos ta demostrá ku nos a siña for di e ehèmpelnan ei.—1 Tim. 5:17.

Normalmente no ta un problema pa haña kosnan bon pa papia ariba ku nos rumannan kristian. Sin embargo, si e komentario di un ruman ta muchu krítiko, tuma e inisiativa pa kambia e kòmbersashon i dirigié riba un tema mas edifikante.

Sea ku nos ta dunando testimonio, papiando for di plataforma òf ku nos rumannan den fe, laga nos demostrá sano huisio i saka for di e tesoro di nos kurason “palabra ku ta bon pa edifikashon, konforme e nesesidat di e momentu, pa esaki por duna grasia na esnan ku ta tende.”—Efe. 4:29.