Capítulo 13

Siñando for di tentacion di Jesús

UN BEZ despues di su bautismo, e spiritu di Dios a hiba Jesús na desierto di Hudea. E tabatin hopi cos pa pensa, pasobra ora el a bautiza “cielo a habri,” di manera cu e por a distingi cosnan celestial. En berdad, e tabatin hopi cos pa medita!

Jesús a pasa 40 dia i 40 anochi den desierto i no a come nada durante e tempo ei. Anto, ora Jesús tabatin hopi hamber, e Diabel a yega cerca dje pa tenté, bisando: “Si bo ta yiu di Dios, bisa e piedranan aki bira pan.” Pero Jesús tabata sa cu ta incorrecto pe usa su poder milagroso pa satisface deseo personal. Pues, el a nenga di laga esei tenté.

Pero e Diabel no a kita. El a purba un otro tacto. El a tenta Jesús pa bula for di muraya halto dje tempel pe angel di Dios scapé. Pero Jesús no a wordu tentá pa haci co’i spectáculo asina. Citando texto di Scritura, Jesús a mustra cu ta incorrecto pa pone Dios na prueba ne moda ei.

Den e tercera tentacion, e Diabel a mustra Jesús tur reino di mundo na un moda milagroso i a bisé: “Lo mi dunábo tur esei si bo cai abao i rindi un acto di adoracion na mi.” Pero atrobé Jesús a nenga di entrega na tentacion di haci malu, escogiendo di keda fiel na Dios.

Nos por siña for di tal tentacion di Jesús. Por ehempel, esei ta mustra cu e Diabel ta un berdadero persona invisibel i no ta simplemente e facultad di maldad, manera algun hende ta bisa. E tentacion di Jesús ta mustra també cu tur gobierno di mundo ta propiedad di Diabel. Pasobra con e oferta di Diabel di nan na Cristo por a ser un berdadero tentacion si nan realmente no ta di dje?

I corda esaki: E Diabel a bisa cu el a keda dispuesto di duna Jesús un recompensa pa un solo acto di adoracion, asta duné tur reino di mundo. E Diabel por wel purba di téntanos di igual manera, kizás poniendo dilanti nos e tentacion di oportunidad di obtene riqueza, poder, of puesto di mundo. Pero, ta ki sabí pa nos sigi ehempel di Jesús, kedando fiel na Dios apesar di cua tentacion cu ta presenta! Mateo 3:16; 4:1-11; Marco 1:12, 13; Lucas 4:1-13.

▪ Aparentemente Jesús a medita riba kico durante su 40 dia den desierto?

▪ Con e Diabel a purba di tenta Jesús?

▪ Kico nos por siña for di tentacion di Jesús?

Capítulo 14

E promé disípelnan di Jesús

DESPUES di 40 dia den desierto, Jesús a bolbe cerca Juan cu a bautizé. Ora Jesús a yega cerca, ta parce cu Juan a siñalá na dje i a sclama na hende presente: “Mira, e Lamchi di Dios cu ta kita picá di mundo! E ta esun di ken mi a bisa, Tras di mi ta bini un homber cu a pasa dilanti mi, pasobra el a existi promé cu mi.” Aunque Juan tabata mayor cu su primo Jesús, Juan tabata sa cu Jesús a existi promé cuné como un persona spiritual den cielo.

Sin embargo, un poco simán promé, ora Jesús a bini pa bautiza, ta parce cu Juan no tabata sa sigur cu Jesús lo ser Mesías. Juan a admiti: “Ami ni sikiera a conocé, pero e motibo cu mi a bini bautizando cu awa tabata pe por ta manifestá na Israel.”

Juan a sigi splica na oyentes loke a pasa ora el a bautiza Jesús: “Mi a mira e spiritu bahando manera paloma foi cielo, i a keda riba dje. Ami ni sikiera a conocé, pero Esun mes cu a mandámi pa bautiza den awa a bisámi, ‘Riba ken cu bo mira e spiritu bahando i kedando riba dje, esei ta esun cu ta bautiza cu spiritu santo.’ I mi a miré, i mi a duna testimonio cu esei ta e Yiu di Dios.”

Su mañan Juan tabata pará cu dos disípel di dje. Atrobé, ora Jesús a yega cerca, el a bisa: “Mira, e Lamchi di Dios!” Cu esei, e dos disípel di Juan bautista a sigi Jesús. Uno di nan tabata Andrés, i e otro aparentemente tabata e mesun persona cu a skirbi e cuenta, cu també tabata yamá Juan. Juan ei, segun indicacion, també tabata primo di Jesús, siendo yiu di Salomé, ruman di María.

Birando i mirando cu Andrés i Juan tabata sigié, Jesús a puntra: “Kico boso ta busca?”

Nan a puntra: “Maestro, unda bo ta keda?”

Jesús a contesta: “Bini, i boso lo mira.”

Tabata rond di cuat’or’ djatardi, i Andrés i Juan a keda cerca Jesús e resto dje dia. Despues, Andrés tabata asina excitá cu el a bai purá pa busca su ruman, cu tabata yamá Pedro. El a bisé cu “Nos a haya Mesías.” I el a hiba Pedro cerca Jesús. Tal bez ne tempo ei Juan a haya su ruman Santiago i a hibé cerca Jesús; sin embargo, característicamente, Juan no a menciona tal informacion personal den su Evangelio.

Su mañan, Jesús a haya Felipe, cu tabata di Betsaida, e mesun stad di unda Andrés i Pedro tabata originalmente. El a invité: “Sea mi sigidor.”

Anto Felipe a haya Natanael, cu també tabata yamá Bartolomeo, i a bisa: “Nos a haya esun di ken Moisés, den e Ley i Profeta a skirbi, Jesús, yiu di José di Nazaret.” Natanael a keda dudoso. El a puntra: “Algo bon por sali for di Nazaret?”

Felipe a invité: “Bini i mira.” Ora nan a yega cerca Jesús, el a bísanan tocante Natanael: “Mira, un israelita por cierto, den ken no tin engaño.”

Natanael a puntra: “Ta con bini cu bo conocémi?”

Jesús a contesta: “Promé cu Felipe a yamábo, ora bo tabata bao di mata di figu, mi a mirábo.”

Natanael a keda asombrá, i a contesta: ‘Maestro, bo ta Yiu di Dios, bo ta Rey di Israel.’

Jesús a puntra: “Pa motibo cu mi a bisábo cu mi a mirábo bao dje palu di figu, bo ta kere? Lo bo mira cosnan mas grandi cu esei.” Anto el a priminti: “Cu mayor berdad mi ta bisa boso, Boso lo mira cielo habri i angel di Dios subiendo i bahando ne Yiu di hende.”

Mashá pronto despues di esei, Jesús i su disípelnan recién ganá a bandona e valle di Jordan i a bai na Galilea. Juan 1:29-51.

▪ Ken tabata e promé disípelnan di Jesús?

▪ Con Pedro, i kizás Santiago, tabata introducí na Jesús?

▪ Kico a convence Natanael cu Jesús tabata Yiu di Dios?