Capítulo 37

Jesús a consola un biuda

POCO tempo despues di a cura e criá dje oficial militar, Jesús a bai pa Naín, un stad mas cu 32 km zuidwest di Capernaum. Su disípelnan i un multitud grandi a compañé. Probablemente tabata cerca djanochi ora nan a yega na oriya di Naín, unda nan a contra cu un grupo bayendo pa entierro. Nan tabata hiba e fayecido, un hoven, pa entierro pafó dje stad.

E situacion dje mama tabata specialmente trágico, pasobra e tabata biuda i esei tabata su único yiu. Ora su esposo a muri, e por a recibi consuelo dje echo cu e tabatin un yiu homber. Su speranza, su deseo, i ambicion tabata enbolbí den su futuro. Pero awor no tabatin ningun hende cu por a duné consuelo. Su tristeza tabata grandi mientras cu pueblo dje stad tabata compañé ne lugar di entierro.

Ora Jesús a haya bista dje mama, su tristeza extremo a toca su curazón. Pues, cu ternura, i toch cu firmeza cu ta duna confianza, Jesús a bisé: “Stop di yora.” Su manera i accion a hala atencion dje multitud. Pues, ora el a yega cerca e cama riba locual nan tabata carga e morto i a toqué, cargador di dje a para. Tur hende mester a puntra den nan mes kico e ta bai haci.

Ta cierto cu hende cu a compaña Jesús a miré haci milagro i cura hopi hende di maleza. Pero ta parce cu nan nunca a miré lanta hende for di morto. E por a haci un cos asina? Dirigiendo palabra ne fayecido, Jesús a manda: “Hoven, mi ta bisábo, Lanta!” I e hoven a lanta sinta! El a cuminza papia, i Jesús a duné na su mama.

Ora e pueblo a mira cu e hoven en berdad tabata na bida, nan a cuminza bisa: “Un profeta grandi a ser lantá den nos.” Otronan a bisa: “Dios a dirigi su atencion na su pueblo.” Noticia dje obra asombroso a plama lihé te na tur Hudea i den tur e país einan.

Juan bautista tabata den prisón ainda i kier a tende mas tocante obra cu Jesús por a haci. Disípel di Juan a informele tocante tal milagro. Con el a reacciona? Lucas 7:11-18.

▪ Kico tabata sosode ora Jesús a yega cerca Naín?

▪ Con loke Jesús a mira a afecté, i kico el a haci?

▪ Con e pueblo a reacciona ne milagro di Jesús?