Capítulo 39

Hende orguyoso i hende humilde

DESPUES di a menciona birtud di Juan bautista, Jesús a dirigi su atencion na hende orguyoso i caprichoso rond di dje. El a bisa: “E generacion aki ta manera muchanan sintá na plaza cu ta grita nan compañé, bisando, ‘Nos a toca fluit pa boso, pero boso no a balia; nos a lamenta, pero boso no a bati boso pecho den desconsuelo.’”

Kico Jesús kier men? El a splica: “Juan a bini sin come ni bebe, pero hende a bisa, ‘E tin un demoño’; e Yiu di hende sí a bini comiendo i bebiendo, toch hende a bisa, ‘Mira! un hende glotón i biciá na bebimento di biña, amigo di cobrador di belasting i pecador.’”

Ta imposibel pa satisface hende. Nada ta agradánan. Juan a hiba un bida severo nengando su mes como un nazareo, conforme cu e declaracion dje angel di cu “e no mag bebe biña ni ningun bebida sterki absolutamente.” I toch hende a bisa cu e tabata endemoniá. En cambio, Jesús a biba manera otro hende, sin practica ningun severidad, i nan a acusé di a come i bebe di mas.

Ta ki dificultoso pa agrada hende! Nan ta mescos cu mucha den wega, algun di locual ta nenga di balia ora otro mucha ta toca fluit ni no ta yora ora otro mucha ta lamenta. No obstante, Jesús a bisa: “Sabiduría ta keda probá husto mediante su obra.” Sí, evidencia, esta, obra a haci claro cu acusacion contra tanto Juan como Jesús tabata falso.

Jesús a sigi pa mencioná specialmente stad cu a merece reproche, Corazín, Betsaida, i Capernaum, unda el a haci mayor parti di su obranan poderoso. Segun Jesús, si el a hácinan den Tiro i Sidón, stad di Fenicia, nan lo a arrepentínan den paña di sacu i shinishi. Condenando Capernaum, cu aparentemente tabata su central durante su ministerio, Jesús a bisa: “Lo ta mas soportabel pe tera di Sodoma i Gomorra riba e Dia di Huicio cu lo ta pa boso.”

Sigientemente, Jesús a alaba públicamente su Tata celestial. E tabata conmoví pa haci esei pasobra Dios a sconde berdad spiritual precioso for di hende sabí i intelectual pero a revela tal cosnan maraviyoso na hende humilde manera mucha chikito.

Pa caba, Jesús a duna un invitacion atractivo: “Bini cerca mi, boso tur cu ta afaná i cargá, i lo mi refrescá boso. Tuma mi yugo riba boso i siña di mi, pasobra mi tin un genio suave i un curazón humilde, i boso lo haya refrescamento pa boso alma. Pasobra mi yugo ta suave i mi carga ta lihé.”

Con Jesús a ofrece refrescamento? El a haci esei dunando libertad for di tradicion esclabizador cu locual guía religioso a pone como carga pisá riba hende, incluyendo, por ehempel, ley estricto di warda sabat. També, Jesús a mustra e camina di alivio pa hende cu a sinti e peso aplastador di dominacion di autoridad político i pa hende cu a sinti e peso di nan mes picá bao di un concenshi afligí. El a revela na tal hende afligí con pa haya pordón di picá i con pa disfruta di un relacion precioso cu Dios.

E yugo suave cu Jesús a ofrece ta e yugo di un dedicacion completo na Dios, haciendo nos capaz pa sirbi nos Tata celestial, locual ta mustra compasion i misericordia. I e carga lihé cu Jesús ta ofrece na hende cu ta acudi na dje ta obedencia na requisito di Dios pa bida, cua mandamento di dje ta pará skirbí den e Bijbel. I obedencia na nan no ta un carga pisá. Mateo 11:16-30; Lucas 1:15; 7:31-35; 1 Juan 5:3.

▪ Di ki manera hende orguyoso i caprichoso dje generacion di Jesús tabata manera mucha?

▪ Pakico Jesús a sintié conmoví pa alaba su Tata celestial?

▪ Di ki manera hende ta cargá cu carga pisá, i cua alivio Jesús a ofrece?