Capítulo 45

Un disípel dificultoso

KI UN bista spantoso Jesús a mira ora el a yega tera! Dos homber extraordinariamente feroz a sali for di un santana ei cerca i a corre den su direccion. Demoño a dominánan. Siendo cu uno di nan tabata posiblemente mas violento cu e otro i a sufri pa hopi mas tempo bao di dominacion di demoño, el a hala atencion.

Pa mashá tempo e homber lamentable ei a biba desnudo den santana. Continuamente, di dia i djanochi, e tabata sclama i corta su mes cu piedra. E tabata asina violento cu ningun hende tabatin e curashi pa pasa den e camina ei. Nan a haci esfuerzo pa maré, pero el a kibra e cadena i a kibra heru poní riba su pia. Ningun hende tabatin e forza pa dominé.

Ora e homber a yega cerca Jesús i a cai na su pia, demoño cu a dominé a hacié grita: “Kico mi tin cu ber cu bo, Jesús, Yiu di Dios Haltísimo? Mi ta ponébo bao di huramento por Dios pa no tormentámi.”

Jesús a sigi bisa: “Sali for dje homber, spiritu impuro.” Pero e ora ei Jesús a puntra: “Con bo nomber tá?”

El a contesta: “Mi nomber ta Legion, pasobra nos ta hopi.” Demoño ta gusta mira sufrimento di hende cu nan por domina, i aparentemente ta gusta uni hunto contra hende den un actitud di cobardía di un multitud desordená. Pero ora Jesús a confrontánan, nan a cuminza roga pe no mándanan na abismo. Di nobo nos ta mira e gran poder cu Jesús tabatin pa vence asta demoño malicioso. Esei ta mustra també cu demoño sa cu e abismo ta spéranan hunto cu nan lider, Satanás e Diabel, como e huicio di Dios pa nan finalmente.

Un tao di rond di 2.000 porco tabata come den ceru ei cerca. P’sei, e demoñonan a pidi: “Mándanos den e porconan, pa nos drenta den nan.” Ta parce cu demoño ta haya un sorto di placer innatural i sadística invadiendo curpa dje creacion carnal. Ora Jesús a permitínan drenta den e porconan, tur 2.000 porco a corre hunto i a cai for di precipicio i a hoga den lamá.

Ora hende cu tabata cuida e porconan a mira esei, nan a corre pa plama e noticia den e stad i den e país. Ora nan a tende, e pueblo a sali pa mira kico a sosode. Ora nan a yega, wel, atá e homber di locual e demoñonan a sali. Sí, bistí i cu su sano huicio, sintá na pia di Jesús!

Testigo ocular a bisa e pueblo con e homber a wordu saná. Nan a conta també tocante e morto straño dje porconan. Ora e pueblo a tende esei, un gran miedu a dominánan, i nan a pidi Jesús encarecidamente bandona nan tera. Pues, Jesús a complacénan i a barca. E homber ex-endemoniá a pidi Jesús lagué bai cu nan. Pero Jesús a bisé: “Bai cas cerca bo famía, i bísanan tur loke Jehova a haci pa bo i e misericordia cu el a tene di bo.”

Generalmente Jesús a bisa hende cu el a cura pa no redé, siendo cu Jesús no tabata kier pa pueblo yega na conclusion a base di informacion sensacional. Pero tal excepcion tabata apropiado pasobra e homber ex-endemoniá por a duna testimonio den e pueblo cu awor Jesús probablemente no a haya oportunidad pa alcanza. Además, e presencia dje homber por a duna testimonio dje poder di Jesús di haci bon, contrarestando cualkier informacion desfavorable cu por a plama tocante perdimento dje porconan.

Cumpliendo cu e instruccion di Jesús, e homber ex-endemoniá a bai. El a cuminza proclama den tur Decápolis tur loke Jesús a haci pe, i e pueblo a keda simplemente asombrá. Mateo 8:28-34; Marco 5:1-20; Lucas 8:26-39; Revelacion 20:1-3.

▪ Pakico, kizás, atencion tabata enfocá riba un solo homber endemoniá ora tabatin dos presente?

▪ Kico ta mustra cu demoño sa di nan tiramento den abismo den futuro?

▪ Pakico, aparentemente, demoño ta gusta domina hende i bestia?

▪ Pakico Jesús a haci un excepcion cu e homber ex-endemoniá, i a duné instruccion pa bisa otro hende loke el a haci pe?