Parti 2: Bida Kristian

Den bo estudio di Beibel, bo a haña sa kiko Yehova ta spera di bo i kon pa kumpli ku su normanan hustu. Komo resultado, bo a hasi sierto kambionan den bo kondukta i den e manera ku bo ta mira bida. Awor ku bo a disidí di biba segun Yehova su normanan hustu, bo ta den e posishon pa sirbié na un manera aseptabel komo un proklamadó di e bon notisia.

Un repaso di e siguiente preguntanan lo yuda bo tene na mente Yehova su normanan hustu i lo yuda bo kòrda algun di e kosnan ku bo mester hasi pa bo por ta un sirbidó aprobá di dje. E informashon akí lo graba den bo mente i kurason e importansia di hasi tur kos ku un bon konsenshi i pa e onor di Yehova.—2 Kor. 1:12; 1 Tim. 1:19; 1 Ped. 3:16, 21.

E echo ku bo a yega na e punto akí den bo estudio, sin duda bo ta ansioso pa someté bo mes na Yehova su gobernashon i forma parti di su organisashon. E preguntanan i e referensianan di teksto bíbliko lo yuda bo analisá bo komprondementu di sumishon na e areglo di Yehova, sea den kongregashon, den famia òf na e gobièrnunan di e mundu akí. Lo bo balorá asta mas e areglonan ku Yehova a hasi pa eduká su pueblo i fortalesé nan fe. Eseinan ta inkluí e reunionnan di kongregashon ku lo bo asistí i partisipá na nan segun ku bo sirkunstansianan ta permití. Ademas, e sekshon akí lo trata e importansia di partisipá regularmente den e trabou di prediká e Reino, yudando otro hende siña konosé Yehova i komprondé tur loke e ta hasiendo pa hende. (Mat. 24:14; 28:19, 20) Finalmente, e repaso akí lo yuda bo komprondé e seriedat di bo dedikashon na Yehova Dios i bo boutismo. Bo por ta sigur ku Yehova ta balorá e manera ku bo a respondé na e bondat inmeresí ku el a demostrá na bo.

1. Kiko ta e norma kristian pa matrimonio? Kiko ta e úniko base bíbliko pa divorsio?

• “Boso no a lesa ku esun ku a krea hende na prinsipio a traha nan hòmber i muhé i a bisa: ‘P’esei un hòmber lo bandoná su tata i su mama i lo pega na su esposa, i nan dos lo ta ún karni’? Di manera ku nan no ta dos mas, sino ún karni. Pues, no laga ningun hende separá loke Dios a uni bou di un yugo. . . . Ken ku divorsiá di su esposa i kasa ku un otro muhé—si no ta pa motibu ku e esposa a kometé fornikashon—ta kometé adulterio.”—Mat. 19:4-6, 9.

2. Dikon un hende hòmber i hende muhé ku ta biba huntu mester ta legalmente kasá? Si bo ta kasá, bo ta sigur ku bo matrimonio ta legal i ta ser rekonosé pa gobièrnu?

• “Sigui rekordá e rumannan pa nan ta sumiso, obediente na gobièrnu i outoridat.”—Tito 3:1.

• “Laga matrimonio ta onorabel den bista di tur hende, i tene e kama matrimonial sin mancha, pasobra Dios lo husga esnan ku ta kometé fornikashon i adulterio.”—Heb. 13:4.

3. Kiko ta bo ròl den famia?

• “Mi yu, tende e instrukshon di bo tata, i no bandoná e siñansa di bo mama.”—Pro. 1:8.

• “E esposo ta kabes di su esposa meskos ku Kristu ta kabes di e kongregashon . . . Esposonan, sigui stima boso esposa, meskos ku Kristu tambe a stima e kongregashon.”—Efe. 5:23, 25.

• “Tatanan, no iritá boso yunan, ma sigui lanta nan den e disiplina di Yehova i inkulká su manera di pensa den nan.”—Efe. 6:4.

• “Yunan, obedesé boso mayornan den tur kos, pasobra esaki ta agradabel den bista di Señor.”—Kol. 3:20.

• “Esposanan, sea sumiso na boso esposo.”—1 Ped. 3:1.

4. Dikon nos mester mustra rèspèt pa bida?

• “[Dios] mes ta duna tur hende bida, rosea i tur kos. . . . Pa medio di dje nos tin bida i ta move i ta eksistí.”—Echo. 17:25, 28.

5. Dikon nos no mester mata niun hende, ni un bebi ku no a nase ainda?

• “Den kaso ku algun hòmber ta lucha ku otro i nan lastimá un muhé na estado i . . . un aksidente fatal sosodé, e ora ei bo tin ku duna bida pa bida.”—Éks. 21:22, 23, NW.

• “Bo wowo a mira asta mi èmbrio, i den bo buki tur su partinan a ser skirbí, enkuanto e dianan ora ku nan a ser formá i ainda no tabatin ningun di nan.”—Sal. 139:16, NW.

• ‘SEÑOR ta odia . . . mannan ku ta drama sanger inosente.”—Pro. 6:16, 17.

6. Kiko ta Dios su mandamentu enkuanto sanger?

• ‘Sigui apstené . . . di sanger [i] di karni di bestia strangulá.”—Echo. 15:29.

7. Dikon nos mester stima nos rumannan?

• “Mi ta duna boso un mandamentu nobo: stima otro; meskos ku ami a stima boso, boso tambe stima otro. Na esaki tur hende lo sa ku boso ta mi disipelnan, esta, si boso ta stima otro.”—Huan 13:34, 35.

8. Pa evitá di pega otro hende ku un malesa kontagioso òf ku por ta mortal, e siguiente preguntanan ta importante: (a) Dikon un hende ku tin un malesa asina no mester tuma inisiativa pa ekspresá su kariño ku por ehèmpel brasa òf sunchi? (b) Dikon e hende ei no mester reakshoná malu si un persona opta pa no invit’é na su kas? (c) Dikon un hende ku kisas a ser eksponé na un malesa kontagioso ta hasi bon di skohe boluntariamente pa hasi un tèst promé ku e kuminsá ku un namorashon? (d) Dikon un hende ku tin un malesa kontagioso, mester pone e koordinadó di e kuerpo di ansiano na altura promé ku e batisá?

• “No debe ningun hende nada; úniko debe ku boso tin ta di stima otro . . . ‘Stima bo próhimo meskos ku bo mes.’ Un hende ku tin amor no ta hasi malu ku su próhimo.”—Rom. 13:8-10.

• “No buska boso mes interes so, ma tambe interes di otro hende.”—Flp. 2:4

9. Dikon Yehova ta ferwagt ku nos ta pordoná otro hende?

• “Sigui soportá otro i pordoná otro libremente, asta si un di boso tin motibu pa keha un otro. Meskos ku Yehova a pordoná boso libremente, boso tambe mester hasi meskos.”—Kol. 3:13.

10. Kiko bo mester hasi si un ruman kalumniá bo òf estafá bo?

• “Si bo ruman kometé un piká kontra bo, bai i mustr’é riba su fout, abo kuné so. Si e skucha bo, bo a gana bo ruman bèk. Ma si e no skucha bo, bai ku un òf dos hende mas pa asina pa medio di boka di dos òf tres testigu, tur asuntu por keda konfirmá. Si e no skucha nan, papia ku e kongregashon. Si e no skucha ni sikiera e kongregashon, lag’é ta pa bo meskos ku un hende di e nashonnan i meskos ku un kobradó di belasting.”—Mat. 18:15-17.

11. Kiko Yehova ta pensa di e siguiente pikánan?

▪ Inmoralidat seksual

▪ Uso di imágen den adorashon

▪ Homoseksualidat

▪ Hòrtamentu

▪ Wega di plaka

▪ Buracheria

• “No gaña boso mes. Ni fornikadó, ni adoradó di dios falsu, ni hende ku ta kometé adulterio, ni hòmber ku ta someté nan mes na aktonan innatural, ni hòmber ku ta drumi ku hòmber, ni ladron, ni hende golos, ni buraché, ni hende ku ta kana zundra, ni hende ku ta chantagiá otronan lo no risibí e Reino di Dios.”—1 Kor. 6:9, 10.

12. Pa loke ta trata inmoralidat seksual, ku ta inkluí diferente akto seksual pafó di matrimonio, kiko bo ta determiná pa hasi?

• “Hui di fornikashon.”—1 Kor. 6:18.

13. Dikon nos mester apstené nos mes di supstansia adiktivo ku no ta remedi òf di supstansia ku ta afektá nos mente?

• “Presentá boso kurpa komo un sakrifisio bibu, santu, agradabel pa Dios, esta, un sirbishi sagrado ku boso ta rindi ku boso kapasidat di pensa. I stòp di laga e mundu akí forma boso, ma transformá boso mes dor di renobá boso mente, pa boso por komprobá pa boso mes kiko ta e boluntat di Dios, ku ta bon, agradabel i perfekto.”—Rom. 12:1, 2.

14. Ki ta algun praktiká di demoño ku Dios ta kondená?

• “Entre boso no mag wòrdu hañá . . . ningun hende ku ta praktiká adivinashon òf ku ta praktiká bruheria, òf ku ta pronostiká, òf ku ta praktiká magia, ni ningun hende ku ta plega hende, òf ku ta montadó òf spiritista, òf ku ta konsultá ku e mortonan.”—Deu. 18:10, 11.

15. Si un persona kometé un piká grave i ke drecha su relashon ku Yehova, kiko e mester hasi mesora?

• “Mi a atmití mi piká na bo, i mi inikidat mi no a skonde; mi a bisa: ‘Lo mi konfesá mi transgreshonnan na SEÑOR.’”—Sal. 32:5.

• “Tin un hende den boso ku ta malu? Lag’é manda yama e ansianonan di kongregashon, i laga nan hasi orashon p’e i hunt’é ku zeta den nòmber di Yehova. I e orashon hasí ku fe lo kura esun ku ta malu, i Yehova lo lant’é. Ademas, si el a kometé piká, lo e ser pordoná.”—Sant. 5:14, 15.

16. Kiko bo mester hasi si bo sa di un ruman ku a kometé un piká grave?

• “Awor si un persona peka pasobra e no ta papia despues ku el a tende un yamada públiko pa testifiká enkuanto un kos ku el a mira òf a tende di dje, e ora ei e mester karga su kulpa.”—Lev. 5:1.

17. Si hasi anunsio ku un persona no ta un Testigu di Yehova mas, kon nos mester trat’é?

• “Stòp di anda ku esun ku ta yama su mes ruman, pero ku ta un fornikadó òf un persona golos, òf un adoradó di dios falsu, òf un hende ku ta zundra otro, òf un buraché òf un hende ku ta chantagiá otronan, i pa boso ni sikiera kome ku un hende asina.”—1 Kor. 5:11.

• “Si un hende ta bini serka boso i no ta trese e siñansa akí, no risibié nunka den boso kas ni kumind’é.”—2 Huan 10.

18. Dikon bo amigunan será mester ta hende ku ta stima Yehova?

• “Esun ku anda ku hende sabí lo ta sabí, ma un kompañero di hende bobo lo sufri daño.”—Pro. 13:20.

• “No laga hende gaña boso. Mal kompania ta daña bon kustumber.”—1 Kor. 15:33.

19. Dikon Testigunan di Yehova ta keda neutral den asuntu polítiko?

• “Nan no ta parti di mundu, meskos ku ami [Hesus] no ta parti di mundu.”—Huan 17:16.

20. Dikon bo mester obedesé gobièrnu?

• “Laga tur alma ta sumiso na outoridatnan superior, pasobra no tin outoridat sin Dios su pèrmit; ta Dios a pone esnan ku ta eksistí den nan posishon relativo.”—Rom. 13:1.

21. Si e leinan di hende ta na konflikto ku lei di Dios, kiko bo mester hasi?

• “Nos tin ku obedesé Dios na promé lugá, i no hende.”—Echo. 5:29.

22. Ki ta algun teksto di Beibel ku por yuda bo keda separá di mundu ora di skohe un trabou?

• “Nashon lo no lanta spada kontra nashon, i nunka mas nan lo no train pa guera.”—Mik. 4:3.

• “Sali for di dje [Babilonia e Grandi], mi pueblo, si boso no ke ta kómplise di su pikánan, i si boso no ke risibí parti di su plaganan.”—Rev. 18:4.

23. Ki sorto di entretenimentu òf rekreo lo bo skohe, i ki sorto lo bo rechasá?

• “Yehova . . . ta odia tur hende ku stima violensia.”—Sal. 11:5, NW.

• “Odia loke ta malu, pega na loke ta bon.”—Rom. 12:9.

• “Tur loke ta berdadero, tur loke ta digno di konsiderashon serio, tur loke ta hustu, tur loke ta puru, tur loke ta promové stimashon, tur loke hende ta papia bon di dje, tur loke tin birtut i tur loke ta digno di elogio, sigui konsiderá e kosnan ei.”—Flp. 4:8.

24. Dikon Testigunan di Yehova no ta adorá Dios huntu ku otro religion?

• “Boso no por ta kome na “e mesa di Yehova” i na e mesa di demoño.”—1 Kor. 10:21.

• “‘Separá boso,’ Yehova ta bisa, ‘i stòp di mishi ku loke ta impuru’”; “‘i lo mi risibí boso.’”—2 Kor. 6:17.

25. Ki prinsipio di Beibel por yuda bo disidí si lo bo partisipá na sierto selebrashon?

• ‘Nan a meskla ku e nashonnan i a siña nan práktikanan, i a sirbi nan ídolonan, ku a bira un trampa pa nan.’—Sal. 106:35, 36.

• “E mortonan no sa nada.”—Ekl. 9:5.

• “Nan no ta parti di mundu, meskos ku ami no ta parti di mundu.”—Huan 17:16.

• “Den pasado boso a dediká sufisiente tempu kaba na kumpli ku boluntat di hende di e nashonnan, esta, tempu ku boso tabata hiba un bida di kondukta sinbèrgwensa, di pashonnan desenfrená, buracheria, paranda, fiestanan di bebementu i idolatria repugnante.”—1 Ped. 4:3.

26. Kon e ehèmpelnan den Beibel por yuda bo mira si ta bon pa selebrá hasimentu di aña?

• “E di tres dia, ku tabata Fárao su hasimentu di aña, ku el a pone un fiesta pa tur su sirbidónan; i el a halsa kabes di e hefe di e koperonan i kabes di e hefe di e panaderonan meimei di su sirbidónan. I el a pone e hefe di e koperonan bèk na su puesto, . . . ma el a horka e hefe di e panaderonan.”—Gén. 40:20-22.

• “Durante selebrashon di Heródes su kumpleaño, e yu muhé di Herodías a baila i a agradá Heródes asina tantu ku el a primintí e mucha muhé bou di huramentu di dun’é kiko ku lo el a pidi. Anto riba instrukshon di su mama, e mucha muhé a bis’é: ‘Duna mi riba e skalchi akí e kabes di Huan Boutista.’ Di manera ku el a manda un hende bai kita e kabes di Huan den prizòn.”—Mat. 14:6-8, 10.

27. Dikon ta bon pa bo sigui guia di e ansianonan?

• “Obedesé esnan ku ta dirigí boso i sea sumiso, pasobra nan ta vigilá boso alma i tin ku duna kuenta i rason pa esaki; pa nan por hasié ku goso i no ku suspiro, pasobra esei lo ta perhudisial pa boso.”—Heb. 13:17.

28. Dikon ta importante pa abo i bo famia apartá tempu pa lesa i studia Beibel regularmente?

• “Su delisia ta den e lei di SEÑOR, i den Su lei e ta meditá di dia i anochi. I e lo ta manera un palu, plantá kantu di koridanan di awa, ku ta duna su fruta na su tempu, i su blachi no ta marchitá; i tur loke ku e hasi ta prosperá.”—Sal. 1:2, 3.

29. Dikon bo ta gusta bai e reunionnan i partisipá na nan?

• “Lo mi anunsiá bo nòmber na mi rumannan; meimei di e asamblea lo mi alabá bo.”—Sal. 22:22.

• “Laga nos presta atenshon na otro pa nos por stimulá otro pa mustra amor i hasi bon obra, i no keda sin bai e reunionnan, manera algun a tuma pa kustumber, sino mas bien animá otro, i muchu mas ainda ku boso ta mira e dia ta yega serka.”—Heb. 10:24, 25.

30. Kiko ta e trabou di mas importante ku Hesus a bisa ku nos mester hasi?

• “P’esei bai, i hasi hende di tur nashon mi disipel, i batisá nan . . . , i siña nan kumpli ku tur loke mi a manda boso.”—Mat. 28:19, 20.

31. Ki aktitut Yehova ta keda kontentu kuné ora nos ta hasi donashon pa e trabou di Reino òf ora nos ta yuda nos rumannan?

• “Onra SEÑOR ku bo rikesa.”—Pro. 3:9.

• “Laga kada hende hasi manera el a disidí den su kurason, no di mala gana, ni fòrsá, pasobra Dios ta stima hende ku ta duna ku alegria.”—2 Kor. 9:7.

32. Ki difikultat tur kristian por spera?

• “Felis ta esnan ku a ser persiguí pa motibu ku nan ta hasi loke ta hustu, ya ku e Reino di shelu ta di nan. Felis boso ta ora hende ta insultá boso i ta persiguí boso i ta saka tur sorto di mentira malisioso kontra boso pa mi motibu. Sea kontentu i bula di alegria, ya ku boso rekompensa den shelu ta grandi, pasobra ta asina nan a persiguí e profetanan promé ku boso.”—Mat. 5:10-12.

33. Dikon ta un gran privilegio di por batisá komo Testigu di Yehova?

• “Bo palabra ta bira pa mi e húbilo i alegria di mi kurason; pasobra bo nòmber a ser yamá riba mi, o Yehova Dios.”—Yer. 15:16, NW.