Capítulo 49

Un otro paseo pa predica den Galilea

DESPUES di rond di dos aña di predicamento intensivo, Jesús a cuminza floha i sosega? Al contrario, el a extende su actividad di predica saliendo pa haci otro paseo, esun di tres di Galilea. El a bishita tur stad i pueblo den e territorio, siñando den sinagoga i predicando e bon nobo di Reino. Loke el a mira durante e paseo a convencele mas cu nunca dje necesidad di intensifica e trabao di predica.

Unda cu Jesús a bai, el a mira multitud di hende den necesidad di curacion spiritual i consuelo. Nan tabata manera carné sin wardador, raspá i plamá, i el a compadecénan. El a bisa su disípelnan: “Sí, e cosecha ta grandi, pero trahador ta poco. P’sei, pidi e Doño dje cosecha manda mas trahador den su cosecha.”

Jesús tabatin e trabao planeá. El a yama e 12 apóstol cu el a scoge casi un aña promé. El a pártinan den par, formando seis par di predicador, i a dúnanan instruccion, bisando: “No bai den camina dje nacionan, ni no drenta den stad samaritano; sino, mas bien, bai continuamente cerca carné perdí dje cas di Israel. Mientras cu boso ta bai, predica, bisando, ‘E reino di cielo a yega cerca.’”

E Reino cu nan tabatin cu predica tabata esun cu Jesús a síñanan pidi den e oracion modelo. E Reino a yega cerca den e sentido di cu e Rey cu Dios a nombra, Jesucristo, tabata presente. Pa identifica su disípelnan como representante dje gobierno sobrehumano, Jesús a dúnanan poder pa cura hende enfermo i asta lanta hende morto. El a instruínan pa rindi tal sirbishi gratis.

Sigientemente, el a bisa su disípelnan pa no haci preparacion material pa nan biahe di predica. “No percura ni oro ni plata ni coper pa potmoni na boso custía, ni sacu di cuminda pe biahe, ni dos bistí djabao, ni sandalia ni bara; pasobra e trahador ta merece su cuminda.” Esnan cu a aprecia e mensahe a reacciona i a contribui cuminda i posada. Manera Jesús a bisa: “Den cualkier stad of pueblo cu boso ta drenta, busca hende merecedor, i keda ei te cu boso ta bai.”

Anto Jesús a duna instruccion en cuanto con pa acercá doño di cas cu e mensahe di Reino. “Ora boso drenta cas,” segun Jesús, “saluda e famía; i si e cas ta merecedor, laga e paz cu boso ta deseá pe bini riba dje; pero si e no ta merecedor, laga e paz di boso bolbe na boso. Unda cu hende no ta recibi boso ni no ta scucha boso palabra, ora boso sali for dje cas of dje stad, sagudi e stof for di boso pia.”

Jesús a mustra cu e huicio riba un stad cu a rechaza nan mensahe lo ta realmente severo. El a splica: “En berdad mi ta bisa boso, Lo ta mas soportable pe tera di Sodoma i Gomorra riba e Dia di Huicio cu pe stad ei.” Mateo 9:35–10:15; Marco 6:6-12; Lucas 9:1-5.

▪ Na ki tempo Jesús a cuminza su tercer paseo di Galilea pa predica, i esei a convencele di kico?

▪ Ora el a manda su 12 apóstol pa predica, cua instruccion el a dúnanan?

▪ Pakico tabata correcto pe disípelnan siña cu e Reino a yega cerca?