Capítulo 76

Comiendo cu un fariseo

DESPUES cu Jesús a contesta hende crítico cu a duda e fuente di su poder di cura un homber cu no por papia, un fariseo a invité pa come. Promé cu nan a come, fariseo a cumpli cu e ceremonia di laba nan man te na elleboog. Nan a haci esei promé cu nan a come i despues i asta entre plato. Aunque e tradicion no a viola e ley skirbí di Dios, el a bai mas ayá cu loke Dios a exigi den e asunto di limpieza ceremonial.

Ora Jesús no a sigi e tradicion, su anfitrión a sorprende. Aunque kizás e no a expresa su sorpresa verbalmente, Jesús a detecta esei i a bisa: “Awor, boso, fariseo, ta haci limpi exterior di copi i tayó, pero e interior di boso ta yen di plunder i maldad. Hende irrazonabel! Esun cu a traha e exterior també a traha e interior, no ta berdad?”

Asina Jesús a denuncia hipocresía di fariseo cu den ceremonia a laba nan man pero no a laba nan curazón di maldad. El a conseha: “Duna como ofrenda di misericordia loke ta padén, i, mira! tur otro cos ta limpi en cuanto boso.” Curazón amoroso mester a conmovénan pa duna, i no un deseo di impresiona hende cu nan pretexto di husticia.

Jesús a sigi: “Ai di boso, fariseo, pasobra boso ta duna un décimo di yerbabuena i di ruda (wijnruit) i di tur otro berdura, pero ta pasa por halto dje husticia i amor di Dios! Boso ta bao di obligacion di haci esei, pero e otro cosnan boso no mag evita.” E Ley di Dios duná na Israel a exigi pagamento di décimo, of diez porciento, di producto di campo. Yerbabuena i ruda ta mata chikito of yerba usá pa sazona cuminda. Fariseo cuidadosamente a paga un décimo di tal yerba insignificante, pero Jesús a condenánan pasobra nan a ignora e requisito di mas importante di mustra amor, eherce bondad, i ser modesto.

Dunando mas condenacion, Jesús a bisa: “Ai di boso, fariseo, pasobra boso ta gusta sinta den e promé banki den sinagoga i saludos den plaza! Ai di boso, pasobra boso ta mescos cu graf memorial cu no ta keda na bista, di manera cu hende ta camna riba nan sin sa!” Nan contaminacion no ta keda bisto. E religion di fariseo tabatin hopi cos pa mira pero ningun balor interno! E tabata fundá ariba hipocresía.

Scuchando na tal condenacion, un abogado, uno di esnan studiá den e Ley di Dios, a keha: “Maestro, ora bo ta bisa esei bo ta insultános també.”

Jesús a tene tal experto den e Ley responsabel també, bisando: “Ai di boso també cu ta studiá den e Ley, pasobra boso ta carga hende cu carga duro pa wanta, pero boso mes no ta mishi cu e carga ni cu un di boso dede! Ai di boso, pasobra boso ta traha graf memorial pe profetanan, pero boso antepasado a mátanan!”

Carga cu Jesús a menciona tabata tradicion oral, pero tal abogado ni sikiera a kita un reglamento chikito pa aliviá e pueblo. Jesús a mustra cu nan asta a consenti cu e matamento di profeta, i el a adverti: “‘E sanger di tur profeta bashá desde fundamento di mundo [lo] ser exigí dje generacion aki, desde e sanger di Abel te ne sanger di Zacarías, cu tabata matá entre e altar i e cas.’ Sí, mi ta bisa boso, esei lo ser exigí dje generacion aki.”

E mundo di humanidad rescatable tabatin su comienzo cu e nacimento dje yiunan di Adam i Eva; pues, Abel a biba ne “fundamento di mundo.” Despues dje asesinato malicioso di Zacarías, un ehército di Siria a plunder Hudá. Pero Jesús a profetiza di un plundermento mas malu di su mes generacion pa motibo di su maldad mas grandi. Tal plundermento a sosode 38 aña despues, na aña 70 EC.

Sigiendo cu su condenacion, Jesús a bisa: “Ai di boso cu ta studiá den e Ley, pasobra boso a kita e yabi di conocimento; boso mes no a drenta, i esnan drentando boso a stroba!” Experto den e Ley tabatin deber di splica e Palabra di Dios ne pueblo, splicando su nificacion. Pero nan no a haci esei i asta a kita for di pueblo e oportunidad di comprende.

Fariseo i experto di Ley a keda furioso cu Jesús pa su denuncio di nan. Ora el a sali for dje cas, nan a cuminza oponele ferozmente i a ataké cu pregunta. Nan a purba di cogé den trampa, pe bisa algo pa locual nan por a laga aresté. Lucas 11:37-54; Deuteronomio 14:22; Miqueas 6:8; 2 Crónica 24:20-25.

▪ Pakico Jesús a condena fariseo i experto di Ley?

▪ Cua carga abogado a pone riba hende?

▪ Na ki tempo tabata “fundamento di mundo”?