Capítulo 78

Sigi vigila!

DESPUES di a adverti e multitud tocante cudishi, i di spierta su disípelnan contra prestamento di demasiado atencion na cosnan material, Jesús a animánan: “No tene miedu, trupa chikito, pasobra boso Tata a aproba di duna boso e reino.” Asina el a revela cu relativamente poco hende (identificá despues como 144.000) lo ser den e Reino di cielo. E mayor parti di hende cu ta recibi bida eterna lo ser ciudadano terrenal dje Reino.

Ki un don maraviyoso, “e reino”! Detayando e reaccion correcto cu e disípelnan mester tene ora nan ta recibié, Jesús a urgínan: “Bende loke ta di boso i duna ofrenda di misericordia.” Sí, nan mester usa nan propiedad pa beneficiá otro hende spiritualmente i asina edifica “un tesoro den cielo cu nunca ta faya.”

Anto Jesús a conseha su disípelnan pa keda cla pa su regreso. El a bisa: “Faha boso curpa i cende boso lampi, i boso mes keda manera hende sperando nan doño ora e ta bolbe for di casamento, di manera cu ora e ta yega i ta bati, nan por habri pe un bez. Feliz ta esclabo cu ora e doño ta yega ta háyanan vigilando! Berdaderamente mi ta bisa boso, Lo e faha su curpa i hácinan bini na mesa i lo yega cerca i sírbinan.”

Den e comparacion, e preparacion di sirbidor pe regreso di nan doño ta ser demonstrá den nan hizamento di nan mantel largo i hincamento di nan bao di nan faha pa nan sigi atende na nan trabao te laat anochi cu e luz di nan lampi yen di azeta. Jesús a splica: ‘Si e doño ta yega den e segundo warda [di rond di nueb’or djanochi te meianochi], of asta den e tercer warda [di meianochi te rond di tres or’ di madrugá], i ta háyanan cla, ki feliz nan ta keda!’

E doño ta recompensa su sirbidornan na moda extraordinario. E ta invitánan na mesa i ta cuminza sírbinan. E no ta trátanan como esclabo sino como amigo leal. Ki un recompensa excelente pa nan continuacion den e trabao di nan doño durante djanochi mientras cu nan a spera su regreso! Jesús a conclui: “Boso també, keda cla, pasobra na un ora cu boso ta pensa ta menos posibel, e Yiu di hende ta bini.”

Awor Pedro a puntra: “Señor, bo ta conta e comparacion pa nos of també pa tur hende?”

En bez di contesta directamente, Jesús a conta un otro comparacion. El a puntra: “Ken realmente ta e mayordomo fiel, cu su doño ta nombra riba su sirbidornan pa dúnanan nan midí di provision ne debido tempo? Feliz ta tal esclabo, si yegando su doño ta hayé haciendo asina! Mi ta bisa boso en berdad, Lo e nombré riba tur su pertenencia.”

Ta keda bisto cu e “doño” ta Jesucristo. E “mayordomo” ta simboliza e “trupa chikito” di disípel en conhunto, i e “cuerpo di sirbidornan” ta referi ne mesun grupo di 144.000 cu ta recibi e Reino celestial, pero e palabra ta destaca nan trabao como hende individual. “Pertenencia” cu e fiel mayordomo ta nombrá pa cuida ta interés real dje doño riba tera, locual ta inclui ciudadano terrenal dje Reino.

Sigiendo cu e comparacion, Jesús a indica e posibilidad di cu tur miembro di grupo di esclabo of e mayordomo lo no keda leal, splicando: “Si na un tempo e sclabo ta bisa den su curazón, ‘Mi doño ta tarda di bini,’ i ta cuminza golpea sirbidor i sirbidora, i ta come i bebe i ta bira burachi, e doño dje sclabo lo bini na un dia cu e no ta speré . . . , i lo castigué cu e mayor severidad.”

Jesús a sigi bisa cu su binimento a trece un tempo di candela pa hudío, pasobra algun a acepta i otronan a rechaza su siñanza. Mas cu tres aña promé, e tabata bautizá den awa, pero awor su bautismo den morto tabata yegando cada bez mas cerca, i manera el a bisa: “Ki angustiá mi ta sintími te cu e ta keda terminá!”

Despues di a papia asina cu su disípelnan, Jesús a papia di nobo cu e multitud. El a lamenta nan obstinacion, nengando di acepta evidencia claro di su identidad i su nificacion. El a bisa: “Ora boso ta mira un nubia subi pabao, boso ta bisa un bez, ‘Un tempestad ta bini,’ i ta sosode asina. I ora boso ta mira cu bientu ta supla di zuid, boso ta bisa, ‘Ta bai haci calor,’ i ta sosode. Hipócrita, boso sa con pa examina aparencia externo di cielo i tera, pero pakico boso no sa con pa examina e tempo special aki?” Lucas 12:32-59.

▪ Cuanto ta compone e “trupa chikito,” i kico nan ta recibi?

▪ Con Jesús a enfatiza e necesidad pa sirbidor di dje keda cla?

▪ Den e comparacion di Jesús, ken ta e “doño,” e “mayordomo,” e “cuerpo di sirbidornan,” i su “pertenencia”?