Capítulo 82

Jesús a sali atrobé rumbo Jerusalem

PRONTO Jesús tabata riba camina atrobé, siñando di stad pa stad i di pueblo pa pueblo. Evidentemente e tabata den e districto di Perea, pariba di rio Jordan i di Hudea. Pero su destino ta Jerusalem.

E filosofía hudío di cu un cantidad limitá so ta merece salbacion ta loke kizás a conmove un hende pa puntra: “Señor, esnan cu ta ser salbá ta poco?” Cu su contesta, Jesús a obliga hende di pensa di loke ta necesario pa salbacion: “Haci esfuerzo vigoroso [es decir, lucha, agoniza] pa drenta pe porta smal.”

Tal esfuerzo vigoroso ta urgente “pasobra hopi,” segun Jesús, “lo purba di drenta pero no por.” Pakico nan no por? El a splica cu ‘despues cu e doño di cas a lanta i a cera e porta na yabi i hende ta para pafó i ta bati, pidiendo, “Señor, habri pa nos,” lo e bisa: “Mi no sa di unda boso tá. Bai djaki, boso tur, hacidor di inhusticia!”’

Aparentemente hende cerá pafó a yega na un tempo conbeniente solamente pa nan mes. Pero ne tempo ei e porta di oportunidad tabata cerá i na yabi. Pa drenta, nan mester a yega mas temprán, aunque esei ne tempo ei no tabata conbeniente pa haci. En berdad, un destino tristu ta spera hende cu ta tarda pa haci e adoracion di Jehova e propósito principal den nan bida!

E mayor parti di hudío cerca ken Jesús tabata mandá pa predica no a probecha dje oportunidad maraviyoso di acepta e percuracion di Dios pa salbacion. P’sei Jesús a bisa cu nan lo yora i morde riba nan djente ora nan ta tirá afó. En cambio, hende “djariba i djabao, i di nort i di zuid,” sí, di tur nacion “lo sinta na mesa den e reino di Dios.”

Jesús a sigi: “Tin esnan cu ta último [hende despreciá no hudío, i també hudío tení abao] cu lo ser promé, i tin esnan cu ta promé [hudío di bentaha material i religioso] cu lo ser último.” E echo cu nan ta último kier men cu tal hende floho i malagradicido lo no ser den e Reino di Dios nunca.

Awor fariseo a yega cerca Jesús i a bisa: “Sali i bai djaki, pasobra Herodes [Antipas] kier matábo.” Kizás Herodes mes a principiá e rumor pa haci Jesús hui dje territorio. Tal bez Herodes tabatin miedu di enbolbele den e morto di un otro profeta di Dios manera e tabata den e matamento di Juan bautista. Pero Jesús a bisa fariseo: “Bai i bisa e zorro ei, ‘Mira! mi ta saca demoño i ta haci curacion awe i mañan, i e tercer dia mi ta caba.’”

Despues di a caba su trabao ei, Jesús a sigi su camina pa Jerusalem pasobra, manera el a splica, “no ta permití pa un profeta ser destruí pafó di Jerusalem.” Pakico tabata di spera cu Jesús lo ser matá den Jerusalem? Pasobra Jerusalem tabata e stad capital, unda e corte halto di Sanedrín di 71 miembro tabata situá i unda nan a ofrece sacrificio di animal. P’sei, no tabata permití pe “Lamchi di Dios” ser matá na ningun otro parti sino na Jerusalem.

Jesús a lamenta: “Jerusalem, Jerusalem, matador di profeta i piedrador di esnan mandá cerca dje, cuanto bez mi kier a recoge bo yiunan mescos cu galiña ta recoge su puítonan bao di su hala, pero boso no tabata kier! Mira! boso cas ta keda bandoná.” E nacion ta condená, pasobra el a rechaza e Yiu di Dios!

Ora Jesús a sigi den direccion di Jerusalem, e tabata invitá ne cas di un gobernante di fariseo. Tabata un sabat, i hende a waké intensamente, siendo cu tabatin ei un homber cu a sufri di waterzucht, un acumulacion di awa probablemente den su braza i pia. Jesús a dirigi palabra na fariseo i experto di Ley cu tabata presente, puntrando: “Ta legal riba sabat pa cura of no?”

Ningun hende a contesta. Pues, Jesús a cura e homber i a despaché. Anto el a puntra: “Cua di boso, si su yiu of toro ta cai den poz, no ta saqué un bez riba e dia di sabat?” Atrobé, ningun hende a contesta. Lucas 13:22–14:6; Juan 1:29.

▪ Jesús a mustra cu kico ta necesario pa salbacion, i pakico hopi hende ta pafó, cu e porta cerá?

▪ Ken ta e “últimonan” cu ta bira promé, i e “promé” cu ta bira último?

▪ Pakico posiblemente nan a bisa cu Herodes kier a mata Jesús?

▪ Pakico no tabata permití pa un profeta ser destruí pafó di Jerusalem?