Un Buki cu Bo Tin cu Lesa

“No mester tuma Bijbel na serio.” Asina un profesor di universidad a bisa un mucha muher franco.

“Bo a yega di lesa e Bijbel?” e hóben a puntra.

Sorprendí, e profesor mester a admití cu no.

“Con bo por expresá un conviccion fuerte tocante un buki cu bo no a lesa nunca?”

E hóben tabatin un bon punto ei. E profesor a dicidí di lesa e Bijbel i despues forma un opinion riba dje.

BIJBEL, consistiendo di 66 obra skirbí, a ser describí como “probablemente e coleccion di buki cu mas influencia den historia humano.”¹ En berdad, el a influenciá algun dje arte, literatura i música mas importante di mundu. E tabatin un impacto significativo riba ley. El a ser aclamá pa su estilo literario i pa hopi persona bon educá e tabatin un balor masha haltu. Su influencia riba e bida di hende di tur nivel social tabata specialmente profundo. El a inspirá den hopi di su lectornan un grado notabel di lealtad. Algun hende a asta risca nan bida djis pa les’é.

Na e mésun tempu, tin duda tocante Bijbel. Tin hende cu tin opinionnan claramente definí tocante dje, maske nan nunca a les’é personalmente. Kisas nan ta reconocé cu e tin balor literario of histórico, pero nan ta puntra nan mes: Con por ta cu un buki skirbí miles di aña pasá por ta relevante den e mundu moderno aki? Nos ta biba den e “era di informacion.” Informacion al dia riba sucesonan actual i tecnologia ta na nos punta di dede. Conseho “experto” riba prácticamente tur problema dje bida djawendia ta fácilmente disponibel. Di berdad Bijbel por contené informacion cu ta práctico awe?

E foyeto aki ta trata di contestá preguntanan asina. E no ta diseñá pa imponé creencia of puntonan di bista religioso riba bo, sino su intencion ta pa mustra cu e buki aki, Bijbel, cu tabatin hopi influencia atrabes di historia, ta merecé bo consideracion. Un informe publicá na 1994 a comentá cu algun educadó ta kere firmemente cu Bijbel ta forma asina un parti integral dje cultura di Occidente cu “cualkier persona, sea creyente of incrédulo, cu no conocé siñansa i relatonan bíblico lo ta un analfabeta cultural.”²

Kisas, despues di lesa loke a ser publicá aki den, lo bo bai di acuerdo cu​—⁠sea un persona ta religioso of no​—Bijbel ta, por lo ménos, un buki cu bo tin cu lesa.

[Kuadro/Plachi na página 3]

“En realidad, mi debe mi iluminacion na un buki cu mi a lesa.—Un buki? Sí, anto e ta un buki bieu i simpel, modesto manera naturalesa mes, i mes natural . . . I e nomber dje buki aki ta masha simpel, e buki, Bijbel.”—Heinrich Heine, escritor aleman di siglo 19.³