Capítulo 88

E homber ricu i Lázaro

JESÚS tabata papia cu su disípelnan tocante uso correcto di riqueza material, splicando cu nos no por ta esclabo di riqueza i alabez ser esclabo di Dios. Fariseo també tabata scucha, i nan a cuminza tene mofa di Jesús pasobra nan a stima placa. Pues, el a bísanan: “Boso ta esnan cu ta declara nan mes husto dilanti hende, pero Dios ta conoce boso curazón; pasobra loke ta halto pa hende ta un cos repugnante den bista di Dios.”

E tempo a yega pa cambia e situacion completamente pa hende cu tabata ricu cu pertenencia mundano, poder político, i dominio i poder religioso. Nan tabatin cu ser rebahá. Sin embargo, hende cu a reconoce nan necesidad spiritual lo ser halzá. Jesús a siñala na un cambio asina ora el a sigi bisa fariseo:

“E Ley i Profetanan tabata te Juan [bautista]. Desde e tempo ei padilanti e reino di Dios ta ser declará como bon nobo, i tur sorto di hende ta forza padilanti den direccion di dje. Realmente, ta mas fácil pa cielo i tera pasa forbij cu pa un pida di letter dje Ley keda sin cumplimento.”

Scriba i fariseo a broma di nan obedencia ne Ley di Moisés. Bo ta corda cu ora Jesús a haci milagro di cura un homber ciegu den Jerusalem, nan a broma: “Nos ta disípel di Moisés. Nos sa cu Dios a papia cu Moisés.” Pero awor e Ley di Moisés a cumpli cu e propósito di Dios di guia hende humilde na Jesucristo, e Rey nombrá di Dios. Pues, ne principio dje ministerio di Juan, tur sorto di hende, specialmente hende humilde i pober, a haci esfuerzo pa bira ciudadano dje Reino di Dios.

Siendo cu e Ley di Moisés tabata haya cumplimento, e obligacion di wardé tabata kitá. E Ley a permiti divorcio pa varios motibo, pero awor Jesús a bisa: “Ken cu ta divorcia su esposa i ta casa cu otro ta comete adulterio, i ken cu ta casa cu hende muher divorciá di su casá ta comete adulterio.” Cuanto tal declaracion mester a irrita fariseo, specialmente desde cu nan a permiti divorcio pa hopi motibo!

Jesús a sigi papia cu fariseo i a conta un comparacion cu a destaca dos homber kende nan estado, of situacion, a cambia dramáticamente despues. Bo por determina ken e dos homber a representa i kico e cambio di nan situacion ta nifica?

Jesús a splica: “Pero un cierto homber tabata ricu i a bistié cu púrpura i linen, gozando dia tras dia cu magnificencia. Pero un cierto limosnero yamá Lázaro tabata poní na su porta, yen di úlcera i deseando di sacié cu loke a cai for di mesa dje homber ricu. Sí, además, cachó a bini i a lembe su úlcera.”

Aki Jesús a usa e homber ricu pa representa lider religioso hudío, incluyendo no solamente fariseo i scriba sino saduceo i sacerdote principal també. Nan tabata ricu den privilegio i oportunidad spiritual, i nan a comportánan mescos cu e homber ricu. Nan bistí di púrpura real a representa nan puesto di fabor, i linen blancu a simboliza ki santo nan tabata den nan mes bista.

Tal grupo di hende orguyoso cu e homber ricu a simboliza ta considera gewoon hende pober cu desprecio total, yamando nan ʽam ha·ʼaʹrets, of hende di tera. Pues, e limosnero Lázaro ta representa tal hende cu lider religioso a nenga e debido alimentacion i privilegio spiritual. P’sei, mescos cu Lázaro yen di úlcera, gewoon hende tabata despreciá como enfermo spiritualmente i cu a sirbi solamente pa asocia cu cachó. Sin embargo, e grupo cu Lázaro a simboliza tabatin hamber i sed pa alimentacion spiritual i p’sei a sinta na porta, sperando di recibi cualkier garnachi di alimento spiritual cu por cai for dje mesa dje homber ricu.

Awor Jesús a sigi pa duna detaye di cambio dje estado dje homber ricu i di Lázaro. Cua cambio a sosode, i kico nan a representa?

E Ricu i Lázaro A Experimenta un Cambio

E homber ricu a representa lider religioso cu a recibi e fabor di privilegio i oportunidad spiritual, i Lázaro a simboliza gewoon hende cu tabatin hamber pa alimento spiritual. Jesús a sigi su cuenta, pintando cambio dramático den circunstancia dje dos homber.

Jesús a bisa: “Awor cu pasamento di tempo e limosnero a muri i angel a hibé ne pecho di Abraham. També, e ricu a muri i tabata derá. I den Hades el a hiza su wowo, mientras cu el a existi den tormento, i a mira Abraham di leu i Lázaro cuné ne puesto di pecho.”

Siendo cu e homber ricu i Lázaro no ta literalmente hende sino ta simboliza grupo di hende, lógicamente nan morto ta simbólico també. Kico nan morto ta simboliza, of ta representa?

Jesús a caba di siñala na un cambio di circunstancia bisando cu ‘e Ley i Profetanan a sigi te na Juan bautista, pero dje ora ei padilanti e reino di Dios ta ser declará.’ Pues, e predicamento di Juan i Jesucristo ta loke a causa tanto e morto dje homber ricu como di Lázaro en cuanto nan circunstancia of situacion di antes.

Hende dje grupo humilde i arrepentí cu Lazaro a simboliza a muri en cuanto nan estado spiritualmente hambrá i deprivá di antes i a drenta den un puesto di fabor divino. Mientras cu na antes nan a acudi na lider religioso pa garnachi cu a cai for di nan mesa spiritual, awor e berdad bíblico cu Jesús a duna a satisface nan necesidad. Asina nan tabata hibá ne pecho, of puesto favorecido, di Abraham Mayor, Jehova Dios.

En cambio, esnan cu ta compone e grupo cu e homber ricu a simboliza a perde e fabor di Dios pasobra nan a persisti di nenga di acepta e mensahe di Reino cu Jesús a siña. Asina nan a muri en cuanto nan puesto di antes di aparente fabor. Realmente, Jesús a menciona cu nan ta den tormento simbólico. Leza awor loke e homber ricu a bisa:

“Tata Abraham, tene misericordia di mi i manda Lázaro pa hinca e punta di su dede den awa i fria mi lenga, pasobra mi ta den agonía den flam dje candela aki.” Mensahe ardiente di huicio di Dios cu disípel di Jesús a proclama ta loke a tormenta hende dje grupo cu e homber ricu a simboliza. Nan kier pe disípelnan bandona nan declaracion di tal mensahe, i asina dúnanan un grado di alivio for di nan tormento.

“Pero Abraham a bisa, ‘Yiu, no lubida cu bo a recibi por completo bo bon cosnan durante bo bida, pero Lázaro correspondientemente cosnan perhudicial. Sin embargo, awor e ta haya consuelo aki pero bo ta den angustia. I además di tur esei, un abismo grandi a ser fihá entre nos i boso, di manera cu esnan cu kier pasa djaki pa boso no por, ni hende no por cruza djayá pa nos.’”

Ki husto i apropiado cu tal cambio dramático a tuma lugar entre e grupo cu Lázaro a simboliza i e grupo cu e homber ricu a simboliza! E cambio di situacion a sosode algun luna despues na Pentecoste di aña 33 EC, ora e pacto nobo a reemplazá e pacto bieu di Ley. Anto a bira inequibocablemente claro cu Dios a favorece disípel di Jesús i no fariseo i otro guía religioso. E “abismo grandi” cu a separa e simbólico homber ricu for di disípel di Jesús, pues, a representa e huicio husto i incambiable di Dios.

Sigientemente, e homber ricu a pidi “tata Abraham”: “Manda [Lázaro] ne cas di mi tata, pasobra mi tin cinco ruman.” Asina e homber ricu a admiti cu e tabatin un relacion mas estrecha cu un otro tata, cu realmente ta Satanás e Diabel. E homber ricu a pidi Lázaro debilita e mensahe di huicio di Dios afin di no pone su “cinco ruman,” esta, aliado religioso di dje, den “e lugar di tormento aki.”

“Pero Abraham a bisa, ‘Nan tin Moisés i e Profetanan; láganan scucha eseinan.’” Sí, pe “cinco ruman” scapa e tormento, tur loke nan tin cu haci ta di presta atencion ne skirbimento di Moisés i dje Profetanan cu ta identifica Jesús como Mesías, anto bira disípel di dje. Pero e homber ricu a keha: “No, di ningun manera, tata Abraham, pero si un hende for dje mortonan ta bai cerca nan, nan lo arrepenti.”

Sin embargo, Abraham a bisé: “Si nan no ta scucha Moisés i e Profetanan, nan lo no keda convencí tampoco si un hende ta lanta for di morto.” Dios no ta percura siñal special of milagro pa convence hende. Nan tin cu leza i aplica e Scritura pa nan obtene su fabor. Lucas 16:14-31; Juan 9:28, 29; Mateo 19:3-9; Galatio 3:24; Colosense 2:14; Juan 8:44.

▪ Pakico e morto dje homber ricu i di Lázaro mester ta simbólico, i kico nan morto a simboliza?

▪ Ora Juan a cuminza su ministerio, cua cambio a tuma lugar segun cu Jesús a indica?

▪ Kico a ser kitá despues di morto di Jesús, i con esei a afecta e asunto di divorcio?

▪ Den e comparacion di Jesús, ken e homber ricu i Lázaro a simboliza?

▪ E homber ricu a sufri di cua tormento, i el a pidi alivio foi dje pa medio di kico?

▪ Kico e “abismo grandi” ta simboliza?

▪ Ken realmente ta e tata dje homber ricu, i ken ta e cinco ruman di dje?