Capítulo 93
Ora e Yiu di hende ta ser revelá
MIENTRAS cu Jesús tabata panort ainda (sea den Samaria of den Galilea), fariseo a puntré tocante yegamento dje Reino. Nan a kere cu e lo bini cu mashá splendor i ceremonia, pero Jesús a bisa: “E reino di Dios no ta bini cu manifestacion riparabel, ni hende lo no bisa, ‘Mira aki!’ of ‘Ayá!’ Pasobra, mira! e reino di Dios ta en medio di boso.”
E palabra di Jesús “en medio di boso” aveces a ser traducí “den boso.” Pues, algun hende ta kere cu Jesús kier men cu e Reino di Dios ta reina den curazón di sirbidor di Dios. Pero, claramente e Reino di Dios no tabata den e curazón di tal fariseo no creyente cu locual Jesús tabata papia. Sin embargo, e tabata en medio di nan, ya cu e Rey nombrá dje Reino di Dios, Jesucristo, tabata ei mes en medio di nan.
Probablemente tabata despues cu fariseo a bai, cu Jesús a papia mas cu su disípelnan tocante e binimento dje Reino. E tabata pensa specialmente riba su futuro presencia cu poder di Reino ora el a adverti: “Hende lo bisa boso, ‘Mira ayá!’ of ‘Mira aki!’ No sali ni corre tras di nan. Pasobra mescos cu weerlicht, sacando rayo, ta luza di un parti bao di cielo te na otro parti bao di cielo, asina e Yiu di hende lo tá.” Asina, Jesús a indica cu mescos cu weerlicht ta ser mirá desde leu, evidencia di su presencia cu poder di Reino lo ser claramente visibel pa tur hende cu kier miré.
Anto Jesús a haci comparacion cu suceso di antigua pa mustra con e actitud di hende lo tá durante su presencia di futuro. El a splica: “Además, mescos cu a sosode den dia di Noé, asina lo ta també den e dianan dje Yiu di hende . . . Di igual manera, net manera a sosode den dia di Lot: nan tabata come, nan tabata bebe, nan tabata cumpra, nan tabata bende, nan tabata planta, nan tabata edifica. Pero riba e dia cu Lot a sali for di Sodoma a yobe candela i swafel foi cielo i a destruí nan tur. Lo ta mescos riba e dia ora e Yiu di hende lo ser revelá.”
Jesús no a bisa cu hende di dia di Noé i di Lot tabata destruí simplemente pa motibo cu nan tabata sigi tras di actividad normal di come, bebe, cumpra, bende, planta, i edifica. Asta Noé i Lot i nan famía a haci tal cosnan. Pero otro hende a sigi tras di tal actividad diario sin haci caso dje boluntad di Dios, i p’sei mes nan tabata destruí. Pe mesun motibo, hende lo ser destruí ora Cristo ta ser revelá durante e tribulacion grandi riba e sistema di cosnan aki.
Dunando énfasis ne importancia di reacciona lihé na evidencia di su futuro presencia cu poder di Reino, Jesús a agrega: “Riba e dia ei laga hende cu ta riba balcón di dak di cas pero nan muebel ta den e cas, no baha i coge e cosnan ei, i hende cu ta den cunucu, láganan tampoco bolbe ne cosnan patrás. Corda esposa di Lot.”
Ora evidencia dje presencia di Cristo ta presenta, hende no por laga nan amor pa pertenencia material stróbanan di dal paso un bez. Ora esposa di Lot tabata sali for di Sodoma, ta parce cu el a mira atrás anhelando loke a keda atrás, i el a bira pilar di salu.
Jesús a sigi duna detaye dje situacion cu lo existi durante su presencia di futuro, bisando su disípelnan: “Den anochi ei lo tin dos homber riba un cama; uno lo ser hibá, pero e otro lo ser bandoná. Lo tin dos muher mulando ne mesun molina; uno lo ser hibá, pero e otro lo ser bandoná.”
Nan hibamento ta corresponde cu e drentamento di Noé cu su famía den e arca i cu angel hibando Lot i su famía for di Sodoma. Esei kier men salbacion. En cambio, esnan bandoná kier men cu nan ta haya destruccion.
E ora ei e disípelnan a puntra: “Unda, Señor?”
Jesús a contesta: “Unda e curpa tá, ei també águila ta reuni.” Esnan “hibá” pa salbacion ta manera águila cu bon bista pasobra nan ta reuni hunto cerca e “curpa.” E curpa ta referi ne berdadero Cristo den su presencia invisibel cu poder di Reino i ne banquete spiritual cu Jehova Dios ta percura. Lucas 17:20-37; Génesis 19:26.
▪ Di ki manera e Reino tabata en medio di fariseo?
▪ Di ki manera e presencia di Cristo ta manera weerlicht?
▪ Pakico hende lo ser destruí pa nan accion durante e presencia di Cristo?
▪ Kico kier men ser hibá, i ser bandoná?